Македонија
(Видео) Пенков: СДСМ во Неготино ги наполни јавните институции со партиски кадри

Актуелното раководство на Социјалдемократскиот сојуз Неготино на чело со Градоначалникот Делков и Претседателот на Советот Витанов, на локалните избори во 2017-та година ветуваа „Живот во Неготино“, но живот во Неготино за жал, има само за нив и за дел од нивните семејства и сопартијци, изјави на прес-конференција Златко Пенков, пратеник на ВМРО-ДПМНЕ.
„ Сведоци сме дека во изминативе речиси четири години единствена константа во нивното работење се партиските вработувања. Најпрво на чело на институциите во општината поставија раководни кадри кои во најголемиот дел се одликуваат со неспособност и некадарност, но истите покажаа исклучителна способност во вршењето мобинг и притисоци врз вработените лица во институциите“ рече Пенков.
Тој нагласи дека за четири години направени се повеќе од 200 нови вработувања во државни и јавни институции во општина Неготино. Во најголемиот дел, како што рече, станува збор за вработувања на лица кои не поседуваат никаков квалитет, освен што се партиски војници на Социјалдемократскиот сојуз или се во роднинска врска со високи партиски функционери.
„ Во недостиг на нови инвестиции и отворање на нови стопански капацитети во општина Неготино, кои очигледно воопшто не им се предизвик на Социјалдемократскиот сојуз, најголемиот дел од нив се вработени во ТЕЦ Неготино и „Македонија пат“. Во „Македонија пат“ досега се вработени повеќе од 30 лица, а посебен е случајот со ТЕЦ Неготино каде што досега се вработени повеќе од 50 лица, а во најава се вработување на уште нови лица. Јавно прашуваме: Од каде е потребата за нови вработувања во ТЕЦ кога дел од нововработените воопшто не одат на работа, а земаат плата?!
Исто така, во најава има и нови вработувања на ЈП Паркинзи за нови 14 лица, од кои најголеми дел се повторно ќе бидат административци. ВМРО-ДПМНЕ повторно предупредува дека ова претпријатие според сите параметри ќе работи нерентабилно, ќе служи само за вработување на партиски кадри од Социјалдемократскиот сојуз и ќе служи како инструмент за предизборни лажни ветувања и манипулации“ истакна Пенков.
Тој додаде дека очекуваат трендот на нови вработување и огласи да продолжи во наредниот период, се со цел сега предизборно да се згрижат што е можно повеќе активисти на СДСМ.
„ При тоа најавуваме ревизија на секој оглас и на секое вработување посебно, како и одговорност од страна на раководните кадри. Трендот на партиски вработувања мора да запре. Затоа, ВМРО-ДПМНЕ во пресрет на локалните избори, ќе понуди нови луѓе со визија, цел и личен интегритет на кои приоритет ќе им бидат потребите на граѓаните, а не семејно-партиските вработувања врз товар на Буџетот од граѓаните. Истовремено, ВМРО-ДПМНЕ ќе понуди и сериозна Програма за вистинско решавање на проблемите на нашите сограѓани и за просперитет и развој на општина Неготино“ порача Пенков.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Грковска во Вашингтон: Западен Балкан е во срцето на Европа и тоа го прави клучен за стабилноста

За Северна Македонија, како најнова членка на НАТО Алијансата партнерството со САД, како и зачувувањето на безбедноста и стабилноста на Западен Балкан е од врвен приоритет. Западен Балкан е регион од стратешко значење за НАТО“, порача заменичката на претседателот на Владата задолжена за политики за добро владеење, Славица Грковска, во синоќешното обраќање во Вашингтон, на панелот „Како да се спротивставиме на руското и кинеското влијание на Западен Балкан“, во организација на меѓународната независна Трансатлантската мрежа на лидери, со што и ја заврши работната недела во САД.
Таа нагласи дека е неопходна силна определба и упорност, независно од тоа што и Северна Македонија, како и останатите земји од регионот е изложена на руско влијание.
„Не смееме да дозволиме политички предизвици да станат безбедносни проблеми“ порача вицепремиерката Грковска, и дополни дека со се подолгото одложување на отпочнувањето на пристапните преговори граѓаните губат доверба во политиките кои се во насока на исполнување на нашата најважна стратешка цел – да бидеме дел од ЕУ. Следствено, со тоа и расте влијанието од Русија и Кина како резултат на зголемената недоверба на граѓаните.
За да се намали и спречи ваквото влијание, додаде вицепремиерката Грковска, важно е државите да ги негуваат демократските вредности, да го промовираат и унапредуваат владеењето на правото, еднаквоста пред законите, како и доследно да ги имплементираат принципите на доброто владеење. За крај, вицепремиерката порача дека силна економија во ЕУ значи стабилен регион. А тоа не можеме да го постигнеме без поддршката од САД.
Македонија
Алијанса за Албанците ги осуди говорот на омраза и инцидентите во Скопје од „Комитите“ и навредите од Бугарите

Алијанса за Албанците го осудува говорот на омраза и инцидентите предизвикани во центарот на Скопје од страна на „Комитите“, како и навредите од некои бугарски државјани упатени кон припадниците на македонската полиција на граничниот премин Деве Баир.
„ Ваквата ескалација не придонесува за релаксација на односите меѓу двете земји и европската интеграција на Македонија. Ваквите антиевропски сцени се срамни и од нив треба да се дистанцира политиката во Скопје и Софија.
Алијанса за Албанците апелира на итно смирување и умерено дејствување. Страните треба да ги решаваат недоразбирањата меѓу министерствата за надворешни работи, во европски дух и фокусирајќи се на спроведувањето на договорот за пријателство меѓу двете земји“ велат од партијата.
Македонија
(Видео) Димитриевски за БНТ: Гоце Делчев е симболот на македонизмот, политичари од Бугарија доаѓаа во Македонија и нѐ навредуваа

Градоначалникот на општина Куманово Максим Димитриевски во емисијата „Говори сега“ на бугарската национална телевизија БНТ1 во Софија рече дека стигнал во Бугарија поради тоа што не навредувал полицајци, не бил агресивен и се однесувал културно и европејски.
„ Секогаш ги слушаме изјавите на политичарите и велат сакаме да врвиме напред, всушност тие се главната причина зошто одиме назад. И секогаш пред избори, во предизборниот период особено тука во Бугарија името на Гоце Делчев и односите помеѓу Македонија и Бугарија се користат во предизборна кампања, се собираат политички поени. А, дали сакаме да одиме напред, да секако. Гоце Делчев е симболот на македонизмот, Гоце Делчев е Македонија и Македонија е Гоце Делчев. Ние го почитуваме и сакаме и тоа во секој кабинет во Македонија. Јас го почитувам ставот на господин Христов, но Гоце Делчев кажува за самиот себе што е и каков е“, изјави Димитриевски.
Тој потсети дека во Македонија доаѓаа политичари од Бугарија и навредуваа, кажувајќи дека Македонија е Бугарија, од Охридско езеро до Црно море, дека Охрид е најубавиот град во Бугарија итн.
„ Замислете ја реакцијата на македонската јавност. Зошто дојде до ова? Во континуитет македонскиот народ, македонската државност се навредува. Да се вратиме на минатото на кое ќе базираме и иднина, ќе го почитуваме минатото. Јас бев првиот политичар во Македонија којшто одбележа заеднички датум од историјата, позитивната историја на македонскиот и бугарскиот народ, борбата на Страцин, првата година Иван Сечанов дојде претседателот на здружението на воените ветерани на Бугарија ја кажа целата вистина, дека Бугарија била фашистичка во Втората светска војна, дека таа војна е водена таму заедно со македонските партизани“, посочи Димитриевски.