Македонија
(Видео) По години трупање смет, се чисти депонијата на патот кон Езерани

По години трупање смет, утрово, ученици од Преспа и механизација од ЈКП „Пролетер“ почнаа да го чистат ѓубрето од депонијата на патот кон Езерани во близина на Преспанското Езеро во акција со мото „Преспа? Разбуди се за чиста средина“, организирана од Институтот за комуникациски студии.
Околу Преспа досега се мапирани над 30 диви депонии, кои веќе се ставени на листа за чистење.
Градоначалникот на Ресен, Јован Тозиевски, најави дека заедно со чистењето на депониите на домаќинствата бесплатно ќе им поделат канти за селектирање на отпадот, а ќе работат и на подигање на свеста кај населението за фрлањето ѓубре.
„Влегуваме во чистење 30 вакви локации, но и на подигање на јавната свест за селектирање на отпадот, компостирање и сл. Да ги замолам граѓаните да престанат да фрлаат ѓубре, депонијата бесплатно може да ја користат“, рече градоначалникот Тозиевски.
Со проектот организиран од Институтот за почеток ќе бидат исчистени осум диви депонии.
Од Институтот велат дека целта им е да иницираат промени.
„Истражувањата покажуваат дека главните извори на загадување се ниската еколошка свест, недоволната опременост и неефикасното собирање на отпадот. Со оваа кампања сакаме да иницираме промена во секојдневните навики на граѓаните и да ги мотивираме да станат дел од решението“, нагласи Дејан Андонов од ИКС.
Ист е и ставот на ЈКП „Пролетер“, од каде што неодамна со европски пари го засилиле возниот парк.
„Преку партнерство со граѓаните ќе настојуваме да дојдеме до трајно решение за отпадот. Досега ситуацијата ни беше лоша со опременоста со возила, но преку проектот ‘ЕУ за Преспа’ добивме камиони за собирање смет и ќе почнеме да го собираме онаму каде што до сега не се собираше“, рече директорот ЈКП „Пролетер“, Марчел Русу.
Акцијата за чистење е поддржана од „Екогерила Преспа“, од каде што сметаат дека главен проблем за трупањето отпад на недозволени места е ниската свест кај жителите.
Градоначалникот Тозивски рече дека ќе настојуваат со облагодарување на локациите, кои се претворени во депонии, ќе настојуваат да им укажат на жителите дека тоа не се места за фрлање ѓубре оти за казнување немаат капацитет со тројцата инспектори што ги имаат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ПРП терапијата за пациентите од пожарот во „Пулс“ е достапна во Кочани, нема да мора да патуваат до Скопје

Десет лица повредени во трагедијата во „Пулс“, за првпат во болницата во Кочани, биле третирани со ПРП терапија (плазма збогатена со тромбоцити), соопшти вечерва директорот на Фондот за здравствено осигурување Сашо Клековски.
Интервенциите ги извел тим од болницата „Св. Наум Охридски“ од Скопје. Претходно 9 лица беа третирани од Клиниката за пластична хирургија Скопје.
„Ова е голем чекор напред – ПРП терапијата сега е достапна во Кочани, без потреба од патување до Скопје!“, напиша Клековски на социјалните мрежи.
ПРП е иновативна метода што користи плазма од сопствената крв за да го забрза заздравувањето на оштетената кожа.
Македонија
Филипче: Скопје е затрупано со ѓубре, Мицкоски и ВМРО-ДПМНЕ го држат градот во заложништво

Претседателот на СДСМ, Венко Филипче, се обрати пред членовите на градската организација на партијата во Скопје и ги критикуваше локалните и централните политики на ВМРО-ДПМНЕ.
Филипче рече дека она што се случува во Скопје е најеклатантен пример на неспособноста, негрижата и корупцијата на власта.
Филипче рече дека пропаста на Скопје е директна последица на пропаднатите зделки меѓу Мицкоски и Арсовска, на блокадите од советниците на ВМРО-ДПМНЕ и на политичката калкулација на Владата која, и покрај тоа што има механизми, свесно го остава градот да се распаѓа.
„Скопјани не смеат да заборават дека Скопје тоне четири години заради пропаднатите бизнис зделки на Мицкоски со Арсовска. ВМРО-ДПМНЕ го држи Скопје во заложништво. Нивните функционери и советници од градот четири години немаат друга работа освен да попречуваат, блокираат и се расправаат со Арсовска. Скопје е најдобар пример за тоа како владее ВМРО-ДПМНЕ, со прст не мрдаат ако од тоа немаат личен и политички интерес. За ова треба да бидат казнети на локалните избори“, истакна Филипче.
Тој се осврна и на Трајко Славески, за кој рече дека како претседавач со Советот, не придонел со ништо за Скопје, но сепак бил награден од ВМРО-ДПМНЕ со функцијата гувернер на Народната банка.
Македонија
Во Кочани ќе се гради споменик во помен на загинатите во „Пулс“

Собеанието со амандман обезбеди 2 милиони денари (околу 32.000 евра) како првични средства за идејно решение и отпочнување на активности за спомен-обележје во чест на младите кои ги загубија животите во трагедијата во дискотеката „Пулс”. Информацијата на социјалните мрежи ја сподели пратеникот од ВМРО-ДПМНЕ, Миле Лефков.
Ова барање, како што истакнува пратеникот, е координирано со родителите на настраданите и произлегува заедничката желба, макар само дел од болката да се преточи во достоинствено сеќавање, а трагедијата да не се заборави.
Споменикот според планот ќе биде поставен во централното градско подрачје, и ќе биде тивок сведок на болката, но и силна порака за солидарност, сеќавање и обврска да не дозволиме ваква трагедија никогаш повеќе, вели Лефков.
Упати благодарност до Владата што го прифатила амандманот, и до колегите пратеници што ја дале својата поддршка.