Министерот за надворешни работи на Србија, Ивица Дачиќ изјави дека Србија не и честитала на Македонија за договорот за решавање на спорот со Грција околу името, бидејќи нема што да се честита, пренесе „Б92“.

Тој додаде дека Србија има позитивен став, но не гледа причина зошто би се мешале кога не се повикани.

„Не честитавме бидејќи немаме што да честитаме. Имаме позитивно мислење и го поддржуваме секој договор во кој страните се договараат да ги решат проблемите на мирен начин“, изјави Дачиќ одговарајќи на прашање дали Србија и честитала на Македонија.

Додаде дека сите го очекуваат крајот на процесот околу договорот меѓу Македонија и Грција.

Министерката за правда, Рената Дескоска, денеска оствари средба со Џеф Голдстајн, вршител на должност Шеф на Мисијата на ОБСЕ во Скопје, на која се разговараше за Планот 18 – реформските приоритети во областа на правосудството во Македонија, кон кој ќе биде насочена работата на министерството во наредниот период.

За време на средбата, Дескоска потенцираше дека посакува законски измени со висок квалитет, за кои очекува поддршка и консензус од сите политички партии застапени во Собранието.

Министерката за правда додаде дека законските решенија ќе бидат изготвувани од експерти, и истакна дека сите решенија ќе бидат предмет на широка јавна дебата со цел да се изнајде долготрајно решение кое ќе ја гарантира независноста и непристрасноста на судството.

В.д. шефот на Мисијата на ОБСЕ во Скопје, г. Џеф Голдстајн и честиташе на Дескоска за именувањето на функцијата и истакна дека организацијата која ја претставува ќе даде поддршка на реформските процеси на Македонија.

Покрај реформските приоритети во правосудството, на средбата се разговараше и за кодификација на кривичниот законик, Законот за управните постапки, како и за Законот за бесплатната правна помош.

Во моментот, Министерството за правда соработува со Мисијата на ОБСЕ во Скопје на измените во кривичниот законик во делот на одредбите кои се однесуваат на криминалот од омраза.

Собранието денеска кажа „да“ за македонската иднина, велат од владејачкиот СДСМ во врска со ратификувањето на договорот со Грција. Како што велат од таму, конечниот договор за решение на 25-годишниот спор што ја влечеше земјава надолу ги отвора евро-атлантските перспективи.

„Веста дека Северноатлантскиот совет прифатил поканата за влез на Македонија во НАТО да биде ставена на дневен ред на следниот самит на алијансата е уште една потврда дека договорот е патриотски чин кој обезбедува сигурна иднина на државата, на граѓаните. Лидерството е препознаено, Македонија чекори кон целосна интеграција во НАТО и ЕУ“, се вели во соопштението.

Од СДСМ велат дека со договорот се зајакнува и заштитува македонскиот идентитет, никогаш повеќе да не биде негиран или оспоруван. „Конечниот збор за решението ќе го имаат граѓаните. Убедени сме дека на референдумот граѓаните ќе кажат „да“ за обезбеден и гарантиран македонски идентитет, „да“ за целосна интеграција во ЕУ и НАТО, ќе кажат „да“ за македонската иднина“, велат од СДСМ.