Република Северна Македонија е држава во која принципот на еднаквост и недискриминација се применува во сите области од општественото живеење: социјалната заштита, здравството, образованието, работните односи и правосудството. Почитувањето и унапредувањето на човековите права и слободи е наш приоритет како Влада, истакна министерката за труд и социјална политика, Јагода Шахпаска, во видеообраќањето на виртуелната конференција организирана од меѓународната Коалиција за еднакви права, во која членува и нашата земја.

Во насока на креирање политики и преземање активности за справување со дискриминацијата во државата, министерката Шахпаска ги посочи двата закона што неодамна беа донесени во нашата држава.

„Минатата година во октомври го донесовме Законот за спречување и заштита од дискриминацијата, во кој првпат како основ за дискриминација се дефинирани сексуалната ориентација и родовиот идентитет. Формиравме национално координативно тело за недискриминација и еднаквост, со цел промовирање на концептот за недискриминација и еднакви можности, како и следење на состојбите на ова поле во сите сфери на општественото живеење“, рече Шахпаска.

Таа посочи дека оваа година вторпат се одржа Парадата на гордоста со поддршка на владините институции и граѓанскиот сектор. Сето тоа придонесе Република Северна Македонија да се искачи 12 места погоре во однос на минатата година на картата на Rainbow во однос на елиминирање на дискриминацијата на ЛГБТ-лицата во нашата држава.

„Убавината на мозаикот ја прават различностите. Градиме општество што се темели на еднаквост, слобода и правда. Нашата цел е секој да се чувствува слободно во избор на својата ориентација, професија, остварување на својата визија. Општество што ќе интегрира, а нема да дискриминира. Градиме општество без предрасуди. Општество во кое секој граѓанин ќе го прави својот избор“, порача Шахпаска.

Оваа конференција претставуваше подготовка во креирање глобална стратегија за еднакви права на ЛГБТИ-заедницата, на која учествуваа и министри од други земји, како и граѓански организации, информираат од кабинетот на Шахпаска.