Македонија
ВМРО-ДПМНЕ од Прилеп: Полициски кадар се вработува само со партиска книшка

ВМРО-ДПМНЕ, ОК Прилеп на полицијата ѝ го честитаа 7 мај-Денот на македонската полиција, но велат дека граѓаните ја имаат изгубено довербата во полицијата поради нестручни кадри кои се поставени на раководни позиции во ОВР Прилеп. Тие обвинуваат за лоша безбедносна состојба во градот поради непрофесионалност и неспособност за менаџирање со полицискиот кадар.
-Последните 6 години откако СДСМ ја предводи централната власт, а на чело на МВР е Оливер Спасоски, единствен критериум за вработување на нов полициски кадар е членската книшка на СДСМ?! Најдобар доказ за тоа е последниот бран нови вработувања во ОВР Прилеп и новите лица кои потпишаа договори за отпочнување со обука како кандидати за полициски службеници. Командирот нека излезе во јавност да одговори дали можеби лице од неговото семејство се има најдено на овој список за нови вработувања?, велат од ВМРО-ДПМНЕ, ОК Прилеп.
Тие додаваат дека прилепчани се сведоци на секојдневната нелегална сеча и транспорт на дрва која се случува благодарение на неажурноста на полицијата, вклучително и огромниот број случаи на запалени автомобили на пратеници, директори на јавни претпријатија и други видно истакнати прилепчани, кои до ден денешен се нерасчистени.
– Неколку месечната „опсада“ на нашиот град од страна на раководни кадри од Скопје, најдобро сведочи за хаосот во Прилеп. Прашуваме дали е покрената дисциплинска постапка од внатрешна контрола против командирот на ПС Прилеп за несовесно работење во службата? Дали ваква постапка, дали лошата статистика за работата на полицијата, или пак приватните бизниси, се причина командирот да не се појавува на седниците на совет на Општина Прилеп? И наместо со професионално работење, високи полициски службеници во време на СДСМ купуваат ексклузивни имоти, поседуваат ресторани и бркаат некакви приватни бизниси, а сето тоа на штета на безбедноста на прилепчани, велат од ВМРО-ДПМНЕ.
Тие најавија дека „после проментата и преземањето на централната власт од страна на ВМРО-ДПМНЕ, ваквите кадри ќе бидат заменети со професионалци кои со своето знаење, мотивираност и стручност ќе го вратат сјајот на ОВР Прилеп“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Филипче: Македонија годинава ќе биде со најнизок економски раст во регионот

Претседателот на СДСМ, Венко Филипче, денеска беше во посета на Радовиш, каде што се сретна со граѓаните и разговараше за предизвиците со кои се соочуваат во секојдневниот живот.
„По десет месеци од новата власт, разочарувањето е големо. Цените продолжуваат да растат, платите стагнираат, а граѓаните сè потешко врзуваат крај со крај“, истакна претседателот на СДСМ, Венко Филипче.
Филипче нагласи дека СДСМ со месеци дава конкретни предлози и закони за раздвижување на економијата и зголемување на платите, но дека власта останува глува.
„СДСМ со месеци дава конкретни предлози и закони со кои ќе се раздвижи економијата и ќе се зголемат платите, но власта е глува. Со месеци предупредувавме дека економијата тоне, а денес таа потврда стигна и од проекциите на Светската банка. Македонија, за жал, оваа година ќе биде со најмал економски раст во регионот. Владата ветуваше дека ќе бидеме лидери во регионот, но очигледно ќе бидеме последни. Ова е резултат на погрешни економски политики, но и целосна негрижа за граѓаните“, изјави Филипче.
Во своето обраќање, тој подвлече дека СДСМ останува на страната на граѓаните и ќе продолжи да работи за подобар живот за сите
„СДСМ ќе продолжи да работи и нуди решенија, силно верувам дека граѓаните ќе ја препознаат искрената намера и чесните политики кои се наменети за подобар живот“, додаде претседателот на СДСМ.
Македонија
СДСМ: Тошковски мораше да го признае скандалот со братот на Стефковски – треба да си даде оставка

Откако СДСМ денеска го објави скандалот со братот на градоначалникот Стефковски со видео докази, Тошковски беше принуден јавно да го признае. Ниту ќе го признаел, ниту ќе бил било кој санкциониран за ова, иако јавна тајна е дека функционерите на ДПМНЕ се однесуваат како шерифи, а Тошковски тоа добро го знае, велат од СДСМ.
„Денешното признание на Тошковски потврдува две работи: прво, дека СДСМ изнесува вистини и, второ, дека функционерите на ДПМНЕ, нивните браќа, сестри и роднини не ги почитуваат законите, а Тошковски тоа го овозможува. Граѓаните не се наивни — да не објавеше СДСМ, Тошковски ќе го криеше и натаму скандалот“, велат од СДСМ.
Според нив, веќе не се ни бројат скандалите кои го тресат МВР.
„Владее хаос, своеволие кои допрва ќе излегуваат на виделина. Уште што треба да се случи за Тошковски да поднесе оставка? СДСМ ќе продолжи гласно да ја брани правдата, законитоста и интересите на граѓаните“, велат од СДСМ.
Македонија
Гаши засега ќе се воздржи од коментари за претседателката на Антикорупциска

Во врска со актуелните настани поврзани со претседателката на Државната комисија за спречување на корупцијата, Татјана Димитровска, од кабинетот на Претседателот на Собранието, Африм Гаши, велат дека тој засега ќе се воздржи од коментари, а ако наводите се потврдат во судска постапка, тој ќе иницира постапка за разрешување.
„Почитувајќи го начелото на презумпција на невиност и независноста на судските органи, Претседателот на Собранието се воздржува од какви било прерани коментари. Основен приоритет е да им се овозможи на надлежните институции да ја завршат својата работа без било какви притисоци или влијанија. Сепак, доколку наводите бидат потврдени низ судска постапка, Претседателот на Собранието ќе постапи без двоумење и ќе иницира соодветна собраниска процедура за разрешување“, се наведува во соопштението од Кабинетот на Африм Гаши.
Одговорноста за зачувување на кредибилитетот и интегритетот на институциите, велат од таму, е врвен приоритет и обврска која не трпи компромис.
Претседателката на антикорупциската комисија, Татјана Димитровска, е осомничена во дополнетата истрага за предметот „Адитив“. Таа се сомничи дека преку апликациите за пораки „Вибер“ и „Воцап“ му одавала службени тајни на друг обвинет за поведени постапки за отворање предмети и одлуки против сега обвинетите фирми и лица во предметот „Адитив“, како и податоци за проверка на имотот и на неговото семејство.
Покрај тоа што ѝ e одземен пасошот, Кривичниот суд определи и забрана за преземање одредени работни активности поврзани со кривичното дело, што подразбира дека осомничената не смее да има контакт со предмети, пошта и друга документација поврзана со работењето на ДКСК, а воедно не може да гласа и да распределува предмети.