Денеска, во временски период од 10:00 до 15.00 часот, сообраќајот на регионалниот пат Куманово – граничен премин Пелинце, на потег од раскрсница за село Драгоманце до Меморијален центар АСНОМ во село Пелинце ќе биде затворен поради одржување на велосипедска трка, извести АМСМ.

Интензитетот на сообраќај на патните правци надвор од градските средини е зголемен. На граничните премини од македонска страна, нема подолги задржувања за влез и излез од државата, соопшти АМСМ.

„20-годишните празни ветувања на ДУИ ги претвораме во градба на вистински патишта. ДУИ речиси две децении ѝ владееше на државата, но регионите каде што живеат Албанците добија ништо. Ниту еден крупен инфраструктурен проект не беше изграден, ниту еден километар автопат кон Гостивар, Кичево, Струга, Блаце или Ќафасан. Албанците добиваа само цвеќиња, ленти и фотографии на Фејсбук со ликот на Артан и Бујар“, велат од „Влен“.

„Патишта се градеа секаде освен таму каде што живеат Албанците. Додека државата градеше кон Криви Паланка, Штип, Кочани, Радовиш, Струмица и Гевгелија, ДУИ не се интересираше за градба на патишта во западниот дел на државата.

Автопатот Скопје–Блаце беше ветуван повеќе од 20 години, а за тоа време беа неколку пати „промовирани“ два незавршени километри. Експерти за реклама и за маркетинг, никако за работа. ДУИ стана позната по церемонии без реални резултати, ленти без асфалт, ветувања без бетон. Денес реалноста е поинаква, благодарение на „Влен“. Градежна офанзива гледаме секаде низ западните региони. Од Тетово, преку Гостивар, до Кичево и Струга, булдожери, камиони и асфалтни бази сведочат дека конечно се гради и таму“, соопштува „Влен“.

„Тивко, посветено, одлучно. „Влен“ работи без помпа, но резултатите се видливи секој ден: нови траси, реконструирани делници и проекти во корист на сите граѓани.

Покрај патиштата, вложуваме преку 300 милиони во локална економија, инфраструктура, образование и зелена транзиција, затоа што развојот мора да стигне до секое село и град.

Граѓаните не забораваат. Тие гледаат кој гради, а кој позира. Срамот е на ДУИ, работата е на ВЛЕН. Додека ДУИ продолжува со празни зборови, ВЛЕН ќе продолжи со конкретни дела, затоа што фотографиите не градат патишта, туку инженери, работници и вистински проекти“, се наведува во соопштението на „Влен“.

Претседателката Гордана Сиљановска – Давкова вчеравечер го прогласи за отворен Летниот европски младински олимписки фестивал и рече дека организацијата на ваков реномиран меѓународен спортски настан претставува голема чест за државата.

Според неа, 4.000 спортисти-учесници ja манифестираат убавата страна на сегашноста, ја гарантираат светлата иднина на европскиот и на светскиот спорт.

За претседателката, ова не е само врвен спортски собир, туку е симбол на младоста, генератор на заедништвото и солидарноста, креатор на европскиот културен и спортски дијалог, во кој спортистите не се претставуваат само себеси и своите земји, туку промовираат и спортско витештво, пријателство и фер однос и кога победуваат и кога губат.

Сиљановска-Давкова ги охрабри младите да продолжат да го развиваат олимпискиот дух, нагласувајќи: Верувам дека уште еднаш ќе покажеме и ќе докажеме дека сме хумани и добри домаќини, народ со страсна спортска публика, што знае да бодри, поттикнува и наградува.

Летниот европски младински олимписки фестивал се одржува од 20 до 26 јули во Скопје и Куманово. На свеченото отворање, покрај претседателката Сиљановска-Давкова се обрати претседателот на Европскиот олимписки фестивал, Спирос Капралос, а беше изведена „Парада на делегациите“и танцова изведба од Националната опера и балет.