Македонија
„Гардијан“: Северна Македонија и Србија имаат најзагаден воздух во Европа
Европа се соочува со голема јавно здравствена криза бидејќи речиси сите Европејци живеат во области со опасни нивоа на загаденост на воздухот, покажува истражувањето на британски „Гардијан“.
Анализата на податоците, собрани со најсовремена методологија, покажале дека 98 отсто од луѓето во Европа живеат во области што се загадени со многу штетни фини честички и далеку над границата поставена од Светската здравствена организација (СЗО).
Речиси две третини од Европејците живеат во области во кои загаденоста на воздухот е повеќе од двапати од дозволената граница, пренесува „Хина“.
Најтешко погодена европска земја е Северна Македонија, а потоа Србија.
Во двете земји повеќе од половина од населението живее во области во кои загаденоста на воздухот е четирипати поголема од препорачаната.
Србија е една од седумте земји во Источна Европа, заедно со Северна Македонија, Романија, Албанија, Полска, Словачка и Унгарија, каде што речиси сите жители живеат во области со најмалку двојно поголемо ниво на загаденост.
Ситуацијата во Источна Европа е многу потешка отколку во Западна Европа.
Исклучок е Италија, каде што повеќе од една третина од населението во долината По и околните области дише воздух кој е четирипати позагаден од препорачаното.
Истражувањето на „Гардијан“ се однесува на ситните честички ПМ 2,5, кои главно се создаваат со согорување фосилни горива, а може да навлезат во белите дробови и крвотокот и да влијаат на речиси секој орган во телото.
Според упатствата на СЗО, просечната годишна концентрација на ПМ 2,5 честичките не треба да надминува пет микрограми на квадратен метар.
Истражувањето покажа дека само два отсто од европската популација живее во области со дозволена концентрација на овие честички.
Експертите предупредуваат дека загадувањето на воздухот со ПМ 2,5 честички предизвикува околу 400.000 смртни случаи годишно во Европа.
Во Шведска нема област во која концентрацијата на ПМ 2,5 честичките е повеќе од двојно поголема од границата на СЗО, а некои региони на северот на Шкотска се меѓу ретките во Европа во кои загадувањето е во дозволените граници, пренесува „Ал џезира“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Одлуки за учество на припадници на Армијата на вежби во Германија, Бугарија, Косово
Владата на денешната седница донесе и повеќе одлуки на предлог на Министерството за одбрана, меѓу кои и за испраќање на припадници на Армијата на Република Северна Македонија за учество на вежбата „BEYOND HORIZON 24“, во Република Бугарија, за испраќање на припадници на Армијата на Република Северна Македонија за учество во НАТО операцијата „КФОР“ во Република Косово и за испраќање на припадници на Армијата на Република Северна Македонија за учество на вежбата „Combined Resolve 24-2“ во Сојузна Република Германија.
Македонија
Личните документи ќе можат да се подигнат и в среда, извести МВР
Во пресрет на претстојните Претседателски и Парламентарни избори што ќе се одржат утре, Министерството за внатрешни работи ги известува граѓаните дека Одделот за граѓански работи, односно сите отсеци за управни работи на оваа организациона единица при МВР на 08.05.2024 ќе работат за издавање на лични документи со работно време од 08.00 до 19.00 часот.
„Исто така ги известуваме граѓаните дека сите барања за лични карти кои се поднесени до 03.05.2024 година, се веќе изготвени и граѓаните можат да ги подигнат“, соопшти МВР.
Македонија
Пронајдени три полуавтоматски пиштоли и 139 куршуми, ОЈО Велес отвори истрага за недозволено држење оружје
Основното јавно обвинителство Велес донесе Наредба за спроведување истражна постапка против едно лице за кривично дело – Неовластено изработување, држење, посредување и тргување со оружје или експлозивни материи од член 396 став 5 во врска со став 3 на Кривичниот законик.
„При претрес во домот на осомничениот во селото Мелница, општина Чашка, полицијата пронашла поголемо количество оружје и муниција – три полуавтоматски пиштоли и 139 куршуми со различен калибар. За осомничениот поднесен е предлог за определување мерка притвор“, соопшти Обвинителството.
ОЈО Велес продолжува да постапува и да презема дејствија за проверка на сомненијата за изборен поткуп во однос на овој осомничен и на уште едно лице во велешко кај кое во текот на вчерашниот ден беа извршени претреси, се додава во соопштението.