Претседателот на Владата, Зоран Заев заедно со Спасе Додевски – координатор со Националното координативно тело за имплементација на Конвенцијата на ОН за правата на лицата со попреченост и Христијан Стојанов, Вера Апостоловска и Кристијан Лазарев, претставници на лицата со попреченост преку видео запис го одбележаa 3 декември – Меѓународниот ден на лицата со попреченост.

Премиерот Заев истакна дека е горд за силното темпо и огромните чекори кои се направени во претходниот мандат и за одржувањето на континуитетот во спроведувањето на најдобрите светски практики за поддршка и вклучување на лицата со попреченост во сите области на социјалниот живот, во здравството, образованието и социјалната заштита.

„Воведовме право за надоместок за лица со интелектуална попреченост. Го зголемивме надоместокот за скратено работно време до 50 % од просечна плата. Секогаш ќе бидеме со овие наши сограѓани рамо до рамо и секогаш ќе бидат директно вклучени во процесите кои се за нив, според принципот „ништо за нив – без нив“, подвлече премиерот Заев и заклучи дека продолжува да се спроведуваат активности за подигање на свеста за потребите на лицата со попреченост.

Националниот координатор за имплементација на Конвенцијата на ООН за правата на лицата со попреченост Спасе Додевски истакна дека мерките и обврските кои произлегуваат од Конвенцијата се патоказ кон стимулативно рамноправно општество.

Времето ќе биде значително облачно со повремени локални врнежи од дожд, претежно во западните делови. Ќе дува умерен, по должината на Повардарието повремено засилен југоисточен ветер. Минималната температура ќе биде во интервал од -2 до 4, а максималната ќе достигне од 5 до 11 степени.

Во Скопје ќе биде облачно со услови за повремен слаб дожд. Ќе дува умерен до засилен ветер од југоисточен правец. Минималната температура ќе се спушти до -2, а максималната ќе достигне 8 степени.

Во следните денови ќе преовладува значително облачно време, на места со врнежи од дожд. Ќе дува умерен, повремено засилен ветер од југоисточен правец. Температурите ќе бидат во пораст, особено за време на викендот кога ќе има и сончеви периоди. Пообилни врнежи се очекуваат в недела во текот на ноќта и в понеделник претпладне.

Од ЈП „Водовод и канализација“ информираат дека поради реконструкција на водоводна мрежа ф-2 на „Вера Јоциќ“ 14, со прекинато водоснабдување ќе бидат корисниците од оваа улица и од „Георги Димитров“. Водоснабдувањето ќе биде прекинато од 9 часот до завршување со активностите (општина Кисела Вода).