Македонија
Горан Заев: Николоски не докажа дека Вице Заев е главен бизнис-фактор во државата

Во Граѓанскиот суд во Скопје попладнево заврши судското рочиште во кое братот на премиерот, Вице Заев, го тужи потпретседателот на ВМРО-ДПМНЕ, Алексансар Николоски, за навреда и клевета за телeфонската изјава дека е главен бизнис-фактор во државата и дека местењето тендери на Вице Заев не се европски вредности.
Судијката Кети Германова на денешното судење ги изведе доказите, меѓу кои и снимката од спорната изјава, а беа изнесени завршните зборови.
Горан Заев, адвокатот на Вице Заев, рече дека од изведените докази се покажало дека со клеветата на Николоски се компромитираат личноста на Вице Заев и почитта од сограѓаните.
„Слободата на изразување сепак во определени услови може да биде санкционирана и ограничена во случај кога со слободното изразување се нарушуваат угледот и правата на другите“, рече адвокатот на Вице Заев и појасни дека со изјавата му се нарушени честа и угледот.
Николоски во завршните зборови рече дека изјавата е дадена како потпретседател на ВМРО-ДПМНЕ и должност на опозицијата е да отвора прашања во јавноста со цел јавноста да врши надзор и критика над работењето на власта.
„Изјавата е дадена со цел да даде критика на власта предводена од СДСМ и е насочена кон работата на Владата и за големиот број афери што постојано излегуваат во јавноста“, рече Николоски. Тој пред судот рече: „Немав намера да го навредам тужителот. Делот со наместени тендери е изваден од контекст и не се однесува на тужителот, туку на работата на Владата“.
Причината за тужбата е поради тоа што Николоски во телефонско интервју рекол дека Вице Заев и неговото семејство ги добиваат сите главни бизниси во државата.
Вредноста на спорот е 30 илјади денари. Вице Заев беше повикан на распит и објасни дека тужбата е поради лагите и манипулациите што ги изнел Николоски во телевизиската емисија, со што му ги нарушил честа и угледот.
Објавата на пресудата судијката Германова ја закажа за 22 април.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Изгаснат пожарот кај Липково, гори на две локации

До 12 часот активни се два пожари на отворен простор, еден пожар е под контрола, а еден е изгаснат.
Активните пожари се наоѓаат во село Богомила во општина Чашка, каде гори мешана шума, како и во село Грешница во општина Македонски Брод, во деградирана нискостеблеста шума, соопшти ЦУК.
Пожарот кој е под контрола е во село Стровија во општина Долнени, зад местото викано Гајдарец-Клепало, во нискостеблеста шума.
Пожарот што е изгаснат се наоѓа во село Слупчане во општина Липково, каде горела ниска вегетација.
Македонија
Задутре времен застој на ГП „Делчево“ заради градежни работи

Регионалниот центар за гранични работи „Исток“ ја информира јавноста дека задутре ГП и ГН „Делчево“, односно од бугарска страна ГКПП „Станке Лисичково“ целосно ќе бидат затворени за секаков сообраќај во периодот од 08:00 до 14:00 часот.
Причина за тоа, според официјалното известување добиено од бугарските гранични полициски служби, се градежните работи на патната делница кај ГКПП „Станке Лисичково“. По завршувањето на работите сообраќајот и функционирањето на граничните премини ќе продолжи непречено да се одвива.
Македонија
Апел за поддршка: Помогнете на ранливите граѓани да аплицираат за субвенција за струја

Инженери на Република Македонија упатија апел до јавноста за помош на ранливите категории граѓани во процесот на аплицирање за финансиска поддршка од Министерството за енергетика. Станува збор за јавен оглас за субвенција од 1.000 денари месечно на сметката за електрична енергија, кој важи 12 месеци.
Апелот е насочен кон инженери, техничари, информатичари и сите граѓани што се снаоѓаат со институционални постапки, да им помогнат на лица со интелектуална или телесна попреченост, целосна слепост или глувост, лица во социјален ризик и сиромаштија, кои се соочуваат со бариери при собирање на документи, пополнување формулари и поднесување на пријави.
Постапката за аплицирање вклучува преземање формулари од www.energy.gov.mk, фотокопирање документи, обезбедување на нотарска изјава и испраќање на пријавата по пошта во затворен плик. Рокот за пријавување е 30 дена од денот на објавата на јавниот оглас.
Според Државниот завод за статистика, над 38.000 домаќинства примаат гарантирана минимална помош, но само околу 4.000 домаќинства ја користат оваа субвенција. Останатите над 90 отсто не аплицираат, најчесто поради технички пречки, а не поради неисполнување на условите.