Македонија
„Го замолуваме Филипче да не ги лаже младите и да им се извини за тоа што ги заборавија изминатите 7 години“, реагира ВМРО-ДПМНЕ

„Сериозно сме изненадени од настапите на Филипче по локалните средби со млади коишто си ги правел во текот на вчерашниот ден. Филипче им говорел на своите членови од младината, како тешко се живее во Македонија, дека младите се иселувале, дека платите биле ниски, говорел и за инфлацијата и рангот на универзитетите од Македонија на Шангајската листа“, реагираат од ВМРО-ДПМНЕ на изјавите на Венко Филипче.
„Да го потсетиме господинот Филипче дека до пред само една година, или еве поточно 15 месеци, тој и неговите пајташи и криминалци од СДС и ДУИ, како Заев, Ахмети, Груби, Османи и останати, ја водеа оваа држава, на начин на кој на сите им е познат.
Господинот Филипче, се нашол за достоен да говори за младите, за инвестициите, за платите и инфлацијата. Епа господине Филипче, да ве потсетиме како беше во ваше време.
Инфлацијата беше над 20%, историски највисока. Платите беа мизерни, инфлацијата ги поразуваше и оние срамни покачувања кои ги имало во периодот кога тие ја водеа Владата. Пензиите да не ги спомнуваме, навистина е срамно СДС и Филипче да говорат за тоа, бидејќи во нивно време се зголемуваа за 185 денари, а сега за само 18 месеци ќе бидат зголемени за 7000 денари. Јавниот долг беше над 60%, а задолжувања, анекси и камати, го празнеа Буџетот на државата, поради неспособноста на СДС. Салата на УКИМ така стои 7 години, со прст не мрднаа, ФИНКИ и ФФК можеби и не знаеле дека постојат па затоа и не ги реновирале, учениците немаа учебници по цела година, учеа од скрипти или ако се снајдеа на некаков друг начин. Студентските домови беа оставени на милост и немилост, градовите и селата се празнеа, младите го бараа спасот надвор од државата, а велеа дека ќе ги врателе оние 600 илјади кои биле избегани од државата, кога доаѓаа на власт. И секако, за сето ова што го направија, добија казна на изборите со најлош историски резултат во нивната историја. Нешто слично ќе им се случи сега на изборите во октомври.
Но, господинот Филипче, можеби сè уште е со паметот на грчките плажи и јахтите со Заев, па еве да му пренесеме што се новата Влада предводена од ВМРО-ДПМНЕ направи за само година дена.
Платите се покачени во администрацијата, здравството, образованието, културата, полицијата, социјалата. Дел од овие се историски највисоки зголемувања направени со синдикатите во вид на колективни договори. Инфлацијата се контролира и не е веќе 20%, а јавниот долг се намали. Странските директни инвестиции достигнаа историски рекорд, од милијарда и 250 милиони евра. Се отвораат нови работни места, се вложува во енергетиката, дигитализацијата и образованието. Се реконструираат студентски домови, факултети и училишта. Книгите учениците ги добиваат на први септември. Младите добиваат по 250 евра за електронски уред, финансиска поддршка за стартап бизнис, финансиска поддршка за млади земјоделци, како и многу мерки и поволности за вработување со оперативниот план за 2025 година.
Ова се само дел од проектите и мерките коишто за година дена ги имаме преземено како нова власт, од минус во секоја можна државна институција, сега сме на нула и одиме напред, градиме темели на иднината и ги правиме промените кои граѓаните ги заслужуваат“, се додава во реакцијата на ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Уште колку ќе молчите за трагедијата во „Пулс“, прашаа блиските на жртвите

Родителите на младите кои трагично загинаа во пожарот во дискотеката „Пулс“ денеска по 21 пат излегоа на улиците на Кочани, барајќи правда и побрза реакција од институциите.
Протестниот „Марш за ангелите“ повторно ја помина добро познатата траса – од „Паркот на револуцијата“, покрај Трговскиот центар, Општината, Управата за јавни приходи и полициската станица, сè до Основниот суд и Обвинителството.
Од таму, роднините се обратија директно до судиите и обвинителите, потсетувајќи дека веќе три месеци се чека на оценка на обвинителниот акт.
„Одолговлекување без оправдана причина е спротивно на законот и претставува основ за реакција од страна на оштетените и јавноста. Ние ве прашуваме – постои ли рок во кој Советот мора да донесе одлука? Ако не постои, барем кажете кога може да се очекува завршување на оваа постапка“, изјави Розета Џамова, сестра на една од жртвите.
Протестот се одржа само еден ден откако Обвинителството ја прошири истрагата за трагедијата во „Пулс“. Поднесено е ново обвинение против реалниот сопственик на агенцијата за обезбедување „Рубикон Секјурити Солушн“, кој се товари за тешки дела против општата сигурност поради сериозни пропусти во организацијата и мерките за заштита во дискотеката.
Обвинителството до Основниот кривичен суд Скопје достави и предлог за продолжување на сите претходно определени мерки за обезбедување присуство на обвинетиот.
Со ова, случајот „Пулс“ добива нова димензија, додека семејствата на жртвите продолжуваат да бараат одговорност и правда – јавно, гласно и упорно.
Македонија
Петровска откри зошто декласификацијата предизвикува нервоза кај власта

Пратеничката од СДСМ, Славјанка Петровска, изјави дека барањето за целосна декласификација на документите предизвикало паника и нервоза кај власта, која наместо да одговори транспарентно – се обидела да се претстави како жртва.
„Приоритет е целосна декласификација на документите за да се обезбеди транспарентност и граѓаните да добијат одговори на стотиците прашања што се поставуваат. Најавата за целосна декласификација предизвика нервоза кај оние кои сакаа да се прикажат како жртви, затоа што ќе бидат објавени информации кои можеби нема да им се допаднат“, изјави Петровска во гостување во „Дневник“ на Сител телевизија.
Таа потсети дека претседателот на комисијата, Скендер Реџепи, го поднел барањето за безбедносен сертификат уште кон крајот на 2024 година, но шестмесечниот рок одамна е пробиен.
„Тоа отвора сериозни прашања за законитоста на надзорот“, додаде Петровска.
Пратеничката истакна и дека неколку пати биле закажувани и откажувани седници на кои требало да претседава Реџепи, а потоа тој самостојно закажал седница, што според неа создало негативен впечаток за работата на Собранието.
„Надзорот мора да биде јавен, пред медиумите и граѓаните, со јасна одговорност од сите. АНБ не е сопственост на ниту една партија, туку столб на државата. Реформите мора да продолжат, но со вклучување на експерти, академската заедница и невладини организации“, нагласи Петровска.
Таа посочи дека Собранието нема истражна функција и пратениците мора да внимаваат да не ја попречуваат предистрагата.
Македонија
(Видео) Фабриката „Винчини“ во пламен, ангажирани пожарникари од повеќе градови

Голем пожар ја зафати фабриката за слатки „Винчини“ во Виница, каде што огнените јазици уништија магацини и неколку производствени погони.
Инцидентот бил пријавен денеска околу 18:40 часот во Центарот за управување со кризи преку бројот Е-112. Огнот избувнал во магацинскиот простор и брзо се проширил во производствените хали со редни броеви 6, 7 и 8, каде што биле складирани суровини и дел од опремата.
На местото веднаш интервенирале екипите на Територијалната противпожарна единица од Виница со неколку возила и пожарникари, но поради обемот на пожарот била побарана помош од соседните општини.
„Во гаснењето се вклучени и противпожарните сили од Кочани со сите свои капацитети, а дополнителна поддршка е побарана од Македонска Каменица и Штип,“ соопштија од ЦУК.
Директорот на Центарот за управување со кризи, Мухамед Али, изјави дека станува збор за специфичен урбан пожар, што бара исклучиво интервенција на професионални пожарникари и координација на повеќе општини.