Македонија
Градоначалникот на Штип му се пожали на техничкиот министер за труд: Две години молиме за вработувања во градинките, враќаме деца дома

По две години игнорантски однос од Министерството за труд, градоначалникот на Штип, Иван Јорданов, денес се срестна со техничкиот министер за труд, Ѓоко Велковски, и му се пожали за неодобрените вработувања во градинките поради што не може да ги згрижат сите дечиња, па морале некои од нив да вратат дома. Техничкиот министер Велковски најави дека веќе имаат решение на овој проблем, но побара неколку дена за да го соопшти.
„Барањата за согласности не беа одобрени од страна на Министерството, но не само барањата за согласности за пополнување на испразнетите места, туку и можноста за добивање лиценци за воспитувачи и негуватели беше скратена како право и практично бевме дискриминирани на штета на младите генерации дечињата. Повеќе од 60 места, кои се испразнети по основ на пензионирање, побаравме во изминатите две години да бидат пополнети за да може да не биде доведен во прашање воспитно-згрижувачкиот процес. Две години молевме буквално за најмалдите да го имаат основното право за воспитно-згрижувачки процес. Навистина се срамам што живеам во ваква држава, во која се молиме за да функционираме во согласност со законот“, рече градоначалникот Јорданов.
Тој нагласи дека поради проблемите со вработувањата постојано се зголемува листата на дечиња што чекаат да бидат згрижени во градинка.
Техничкиот министер за труд е оптимист и вели дека набргу е можно решение на проблемот.
„Ќе дадеме решение многу бргу. Веќе имаме некој модел на решение со кое ќе се откочи целата оваа работа и да може оние луѓе што поднеле да се стекнат со лиценци, но оставете ни простор уште некој ден да го објавиме решението на овој проблем“, рече техничкиот министер за труд, Велковски.
Тој потврди дека комуникацијата на Министерството со Општината и со градинките одела многу бавно и речиси ја немало, а за неодобрените вработувања на местото на пензионираните, Велковски рече дека се резултат на несоодветно планирање.
„За жал, мора да констатирам дека Министерството за труд и социјална политика во изминатиот период не ги планирало доволно добро ресурсите за замена на овие лица кои заминале по пат на пензионирање или по пат на нивно заминување. Не давале согласност, односно не ги пополнувале местата и тие останале празни. Денеска, градоначалникот рече дека дечињата, за жал, дури се враќаат дома, не се вклучени во образовните групи“, рече техничкиот министер Велковски.
За лиценцирање, според техничкиот министер, чекаат над 900 лица, кои поднеле барања во 2020, 2021, 2022 и во 2023 година. Најави дека и овој процес ќе продолжи иако стоел поради тоа што никој не се погрижил да избере фирма што ќе го врши лиценцирањето.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
62 балони летнаа кон небото во знак на сеќавање и почит кон загинатите во пожарот во „Пулс“

Во знак на сеќавање и почит кон загинатите во пожарот од 16 март годинава во дискотеката „Пулс“, попладнево во Центарот за култура „Бели мугри“ во Кочани се одржа комеморативен настан што го организираше Општината со подршка на Црвениот крст, како дел од програмата за одбележување на Петровден, празникот на градот.
Со многу емоции, членовите на семејствата на настраданите, облечени во црни маички, два часа ја следеа актерката Наталија Теодосиевска, кочанчанка, која со збор и фотографија ги спомена сите загинати што потекнуваат од Кочани, Оризари и општината Чешиново – Облешево.
Комеморацијата заврши на отворена сцена, на јужната страна од ЦК „Бели мугри“ каде од рацете на деца во воздух летнаа 62 балони со имињата на прерано прекинатите 62 млади животи.
На присутните во салата на кочанската Национална установа им се обрати и Живко Гроздановски, претседател на Друштвото на писателите на Македонија.
Потоа, членовите на семејствата на загинатите во пожарот во „Пулс“ од 16 –ти март, придружувани од граѓани, заминаа на протестен марш во чест на нивните ангели низ улиците на Кочани.
Македонија
Муцунски од „Дубровник Форум“: Во 21-ви век нема место за национализам во Европа

На покана на министерот за надворешни и европски работи на Република Хрватска, Гордан Грлиќ Радман, министерот за надворешни работи и надворешна трговија, Тимчо Муцунски, учествуваше на 18. издание на „Дубровник Форум“ – меѓународна конференција што се одржува денеска и утре во Дубровник, Република Хрватска.
Фокусот на дискусиите, како што соопшти МНРиНТ, бил ставен на безбедноста на Западен Балкан и процесите на Евроатлантска интеграција.
Министерот Муцунски имал обраќање во рамки на панелот посветен на овие теми, на кој беа разгледани и пошироки прашања како трансатлантските односи, европските предизвици, одбранбените капацитети на Европа и перспективите на Иницијативата „Три мориња“.
На панелот за Западен Балкан биле разменети ставови за напредокот на државите од регионот, значењето на европските и евроатлантските интеграции, како и за актуелните безбедносни предизвици. Учесниците заклучиле дека, во услови на зголемени ризици, е потребен засилен ангажман на меѓународната заедница за зачувување на стабилноста и просперитетот на регионот.
-Случувањата во Европскиот парламент не беа само семантика. Тоа беше политички чин на негирање на идентитетот. И сакам да бидам јасен – национализмот од 19-ти и 20-ти век нема место во Европа на 21-от век. Идентитетот не е прашање за преговори, туку основно човеково право. Добрососедството не подразбира толерирање на провокации. За жал, мнозинството во Европскиот парламент го поддржа ова бришење, но имаше и пратеници кои гласаа против или се воздржаа. Еден од нив е со нас денес. Му благодарам нему и на сите што постапија принципиелно – тоа е доказ дека совеста сè уште постои во европската политика, истакнал Муцунски.
Во своето излагање, министерот Муцунски ја нагласил посветеноста на Република Северна Македонија кон зачувувањето на мирот и стабилноста во регионот, укажувајќи дека глобалните безбедносни предизвици бараат поголемо внимание од меѓународната заедница. Западен Балкан, поради својата геополитичка положба, претставува нераскинлив дел од европската безбедносна архитектура.
Тој подвлекол дека предвидливите и достижни европски и евроатлантски процеси се потврдени механизми за унапредување на реформите, постигнување на долготраен мир и спречување на негативни надворешни влијанија. Муцунски ја потенцирал и потребата од зајакнување на регионалниот дијалог, соработка и меѓусебна поддршка во интегративните процеси, истакнувајќи дека земјите од регионот имаат заедничка одговорност да ги поддржуваат иницијативите за помирување и решавање на отворените прашања.
Во заклучоците, министерот Муцунски ја нагласил и неопходноста од зајакнување на капацитетите на земјите од регионот за справување со современите безбедносни предизвици, со што ќе се зајакне нивната и отпорноста на целиот регион, како директен придонес кон европската безбедност.
Македонија
Ангелов: Најсериозен е пожарот во дојранското село Николиќ во близина на границата со Грција

Во моментов најсериозен е пожарот во дојранското село Николиќ во близина на границата со Грција. Тоа е пожар кој гори неколку дена. Рано утрово испративме еден армиски хеликоптер, кој прецизно дејствуваше по линијата на пожартот, но, поради ветрот кој постојано го менува својот правец овој пожар беше многу тешко да се стави под контрола, изјави попладнево директорот на Дирекцијата за заштита и спасување, Стојанче Ангелов.
Според него, бидејќи е раширен на поголема територија, претставува опасност да ги зафати и околните шуми.
-Во соработка со колегите од грчка страна кои понудија поддршка од два канадери го активиравме Европскиот механизам за цивилна заштита за употреба на овие канадери кои треба да дејствуваат. По потреба на располагање имаме еден полициски и еден армиски хеликоптер, како и два ЕР трактори на ДЗС, затоа што вториот предмалку слета во Скопје, рече Ангелов.
Информира дека предмалку избил нов пожар на територија на Крива Паланка во близина на местото каде беснееше пожарот пред неколку дена.
Во текот на вчерашниот и денешниот ден, како што информира Ангелов, регистрирани се повеќе од 40 пожари на отворен простор.