На локалните избори, граѓаните јасно и недвосмислено им покажаа на актуелните и владејачки и опозициски криминогени политичари и нивното коруптивно функционирање дека се непожелни во оваа држава, како и дека им е смачено од истите националистички наративи, истите празни ветувања и истата токсична политичка пропаганда која е сеприсутна во јавниот дискурс истакнуваат од граѓанската иницијатива Зелен хуман град.

Според нив, во првиот круг на локалните избори била забележана, како што велат, најниска излезност од независноста на Македонија.

„Првпат под 50%, во четири општини не беше исполнет ни цензусот да гласаат минимум една третина од избирачите поради што изборите за градоначалник ќе се повторат, имаше рекордни речиси 54.000 неважечки гласачки ливчиња за градоначалници и над 50.000 неважечки ливчиња за членови на советите. Во вториот круг на изборите беше забележана историски најниска излезност од само 40%, а за градоначалник на Град Скопје гласале едвај 35% од граѓаните. Повторно беше забележан и голем број на неважечки ливчиња“.

Како што оценуваат, таквите изборни факти не се апатија, туку се протест.

„Вакви изборни резултати укажуваат дека освен партиските приврзаници кои гласаат затоа што се дел од овој партиско-капиталистички систем во кој државните институции се целосно картелизирани и ставени во служба на големите партии и имаат личен интерес да гласаат (поради хонорар, вработување, тендери и слично), огромен број на граѓани сметаат дека во моментот не постои политичка опција која го заслужува нивниот глас. Но, како би можела да постои, доколку самите граѓани не ја создадат?

Појаснуваат дека тие почнле како граѓанска иницијатива со намера не само нивното делување туку и нивната форма, како што велат, да бидат контратежа на големите партии.

„Нашето постоење ја разоткри вистината дека вистинската промена не доаѓа од тие што го создадоа системот, туку од луѓето кои имаат храброст да му се спротивстават. Ја согледаа заканата која им ја претставуваме и стануваат сѐ подрски во методите на задушување на граѓанскиот глас. Принудени сме да се приспособиме за да останеме во борбата!

Затоа ве повикуваме сите вас кои сте незадоволни од актуелната состојба во Македонија – од енормниот степен на загадување, екстремната суровост кон бездомните животни, нефункционалните институции кои служат единствено за партиски потреби, а не за потребите на граѓаните, партиската узурпација на секој јавен ресурс и од многу други неправилности – да ни се придружите во Зелен хуман град.

Дај го својот потпис за да формираме партија со која ќе можеме непречено и заеднички да се бориме за позелено и похумано општество“.