Македонија
Некои од музичарите тврдат дека се изиграни: Од Владата ни кажаа дека ќе настапиме на културна манифестација

Некои од изведувачите што утре треба да настапат на прославата што ја организира Владата за поканата за членство во НАТО јавно реагираат велејќи дека не биле информирани дека ќе настапат на манифестација по повод поканата на Македонија за влез во алијансата, туку им било кажано дека ќе настапат на културна манифестација за што потпишале и договор.
„Ни кажаа дека е културен настан на кој ќе настапуваат повеќе артисти низ повеќе градови, без присуство на политички странки, говори, пропаганден материјал и слично. Станува збор за големо недоразбирање. Излезе дека повеќе артисти не знаеле за каков тип на настан станува збор, меѓутоа некои од нас веќе имаат потпишано договор за настап за кој немаше подетаљни информации. Не се криеме и не бегаме од тоа дека настап на ваков настан не ни е во прилог и е против нашата идеологија, но се надеваме ќе разберете во која ситуација се најдовме без да сакаме и самите ние“, велат од бендот Conquering Lion, кои се против Македонија да влезе во НАТО.
Членот на рап-бендот С.А.Ф., Митко Гаштаровски – Пикисипи, вели дека е против промена на името во Северна Македонија и на „Фејсбук“ напиша дека ќе настапи на прославата затоа што тоа било единствен начин да се сочува ова парче земја кое се вика Македонија.
„Ќе настапам како дел од формацијата С.А.Ф. затоа што тоа е единствен начин (според мене) да се сочува ова парче земја кое се вика Македонија, без понатамошно делење итн. Покана за НАТО???? Не со услов!!! Песните наши ги знаете, не се баш за славење. Единствената песна што е за прослава, ‘Раце горе’, нема да ја изведуваме бидејќи денеска или на 14 јули не чувствувам дека треба да славам. Нека биде последен концерт засекогаш! Сите овие години откако творам како што знам, никому не сум му украл ништо, мирно спијам. Никогаш не сум настапувал за некаква политичка опција. Изненаден од фактот дека сме добиле покана за НАТО и од желба да се видам со другарите: реков – во ред, ако сакаат другите, ќе дојдам и јас, но без политички амблеми. Мора да признам дека сум изненаден од блуењето од т.н. фанови кои веднаш знаат да маваат со камења. Јас ќе останам доследен на своето дело и тие што ќе бидат на концертот во Струга ќе може од прва рака да слушнат што мислиме како С.А.Ф. за новонастанатата ситуација. Истата оваа Влада (партијата) ни го цензурира концертот од 1998 година кога беше напишан албумот. Сега нè кани на заедничка прослава иако на плакатот нема партиски обележја“, напиша Гаштаровски-Пикисипи.
На „Фејсбук“ се огласи и Златко Ориѓански, кој иронично вели дека за неговиот настап утре Владата ќе му плати 50 милиони долари и плац на Водно.
„Ме прашуваат за колку пари сум се нафатил да свирам на прославата, па еве јавно да одговорам. Нешто малку повеќе од оние што ги земаа како провизија за автопатот и хонорарот за Ацо на плоштад, значи, побарав и ќе ми дадат 50 милиони долари и плац на Водно… Дали е во ред?“, напиша Ориѓански.
Адвокатот Јанаки Митровски од Скопје им понуди бесплатна правна помош на изведувачите што сметаат и велат дека се изгирани.
„Повеќе артисти се јавија дека биле во заблуда или на некој начин не знаеле во што се впуштаат кога потпишале договор за прослава на некаква си покана за НАТО. Заблуда, во согласност со Законот за облигационите односи, е основ за раскинување договор. Му нудам на секој артист бесплатна правна помош доколку сака да го раскине договорот. Доколку треба артистите да плаќаат пенали поради тоа, фер е да се помогне. И тоа прво од оние што сте најгласни. Отвораме сметка и донираме пари за таа цел. Јас прв ќе донирам. Артисти, охрабрете се, можеби ќе изгубите еден хонорар, ама ќе добиете милион фанови, за интегритет да не зборуваме“, пишува Митровски на социјалните мрежи.
Кога вчера Владата објави дека ќе има прослава во 15 града, имаше бурни реакции во јавноста дека тоа е непотребно трошење пари. Многумина, пак, реагираат на изјавите на некои од изведувачите дека биле изиграни и дека не знаеле за што се договараат да настапат.
„Во наредните денови, кога ќе се утврдат сите детали за прославата, јавно и транспарентно ќе ги соопштиме сите информации за трошоците и организацијата на настанот“, изјави Миле Бошњаковски, портпарол на Владата, за „Макфакс“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Левица: Уште еден закон одбиен – власта не гласаше за предлогот за денови на жалост

На вчерашната собраниска седница, владејачкото мнозинство повторно не ја надмина својата партиска суета и не гласаше за предлог-законот на Левица за денови на жалост, соопштија од партијата.
„Бидејќи во Македонија никако не е регулиран медиумскиот простор при денови на жалост, пратеничката група на Левица поднесе законско решение за регулирана медиумска програма без забавни и политички содржини за време на деновите на жалост, како и за воведување едноминутно молчење и санкции за недолично однесување“, наведуваат од партијата.
Пратеникот Амар Мециновиќ од Левица, образложувајќи го предлогот, истакна дека „тагата не смее да биде дел од политички наратив“ и дека со законот се бараат јасни и унифицирани критериуми за прогласување денови на жалост, кои не би зависеле исклучиво од одлуката на Владата.
При образложување на предлог-законот, пратеникот Мециновиќ потенцира дека овој закон не навлегува во правото на слобода за изразување и во регулирањето на приватните субјекти, туку ги подразбира измените кои ќе дозволат како нација да ја доживееме тагата во која што сме се нашле и да се дозволи на вистински начин да закрепнеме од колективните трагедии.
Предлогот се однесува на јавниот и на институционалниот домен, со фокус на одбележување трагични настани на национално и локално ниво.
Во предлогот стои дека целта на законот е обезбедување на правна основа за правилно одбележување на деновите на жалост на национално и локално ниво, преку организирано, унифицирано и достоинствено одбележување на трагични настани кои влијаат на националната и колективна меморија на државата, преку достоинствено оддавање почит кон настраданите и нивните блиски, како и поттикнување на човечноста, солидарноста и на националното единство.
„Жално е што дури и при една катарза кое му се случи на македонското општество, власта предводена од ВМРО-ДПМНЕ не гласаше за конструктивно законско решение, кое треба да го пополни правниот вакуум каде Македонија е ретка држава која нема Закон за денови на жалост“, велат од Левица.
Македонија
Масовно непрописно фрлање кабаст и градежен отпад на јавни површини, велат од Комунална хигиена Скопје

ЈП Комунална хигиена Скопје информира за масовно непрописно одлагање кабаст и градежен отпад на јавни и сообраќајни површини.
„Дрскоста на несовесните и неодговорно граѓани оди до таму што иако знаат дека согласно закон контејнерите се исклучиво за комунален отпад од домаќинствата, се исфрла градежен, кабаст и други видови отпад со кои сериозно се нагрдува градот, се загадува животната средина и загрозува здравјето на граѓаните.
Многу често контејнерите се преполни со кабаст и градежен отпад поради што останатите граѓани не можат да го одложат комуналниот отпад прописно, а зачестени се и појавите на непрописно одлагање отпад покрај садовите кога тие се сосема празни“, велат од Комунална хигиена Скопје.
„ЈП Комунална хигиена Скопје на терен задно со инспекциските служби на град Скопје има затекнато и казнето при непрописно и неконтролирано фрлање отпад над 600 лица во изминатите 4 месеци, и апелира за зголемена свесност да не се исфрла отпадот на јавни површини со што се создаваат диви депонии и се загрозува животна средина.
Од почетокот на годинава, екипите на претпријатието подигнаа над 3500 кубни метри отпад одложен на јавни и сообраќајни површини, а само во текот на месецот април се отстранети 950 кубни метри отпад од диви депонии покрај контејнерите, составен од кабаст и градежен отпад.
Ги информираме граѓаните дека секое исфрлање отпад надвор од наменски поставените садови претставува прекршување на Законот за јавна чистота и подлежи на санкции, исто како и фрлањето друг отпад освен комуналниот од домаќинствата. Контејнерите поставени на јавни површини се наменети исклучиво за одлагање мешан комунален отпад и во истите не смее да се одлага кабаст или градежен отпад.
Согласно Законот за јавна чистота, граѓаните и правните субјекти се ОБВРЗАНИ градежниот отпад да го одложат преку лиценцирано лице или директно на депонијата Дрисла и со истиот не смее да се загадува низ градот, во или покрај контејнерите поставени на јавни површини.
Во ЈП Комунална хигиена Скопје жителите на градот Скопје БЕЗ паричен надомест можат да го одложат својот кабаст отпад, во кој спаѓа мебел, електронските и електричните апарати, односно можат да го одложат во Центарот за селекција на отпад во Карпош секој ден во неделата, во терминот од 07 до 19 часот“, соопшти Комунална хигиена Скопје.
Македонија
Посебен режим на сообраќај во Скопје поради протест

СВР Скопје ги известува граѓаните дека утре со почеток во 11.00 часот поради одржување на протест, Единицата за безбедност на патниот сообраќај ќе преземе мерки за посебен режим на сообраќајот.
Протестот предвидено е да започне пред зградата на ССМ на улицата „Мирче Ацев“ со движење лево по улицата „Филип Втори Македонски“, десно по улицата „11-ти Октомври“, право по улицата „Димитрие Чуповски“, десно по улицата „Васил Главинов“, право по булеварот „ВМРО“, лево по булеварот „Илинден“ до пред Влада на Република Северна Македонија.
СВР Скопје апелира до сите граѓани учесници во сообраќајот да се почитуваат наредбите кои ќе ги даваат полициските службеници.