Лидерот на ВМРО-ДПМНЕ, Христијан Мицкоски смета дека коалицијата меѓу СДСМ и Алтернатива е последен чин од обидот за уништување на Македонија. Тој смета дека најавите за нови министерства се дополнителен и непотребен трошок, за да се продолжи векот на траење на премиерот Зоран Заев.

„Ова ми наликува на последниот чин за обидот на уништување на Македонија во режија на СДСМ и Зоран Заев. Ова што се случува е прпелкање на Зоран Заев и обид да го продолжат својот век на траење на неколку недели. Срамно е ова што се случува, а политиката се сведе на трговија како на Зелен пазар, наместо да зборуваме за развој и проекти дебатата се сведува кој колку министерски и директорски добил. На крајот од денот тоа го праќа сиромашниот граѓанин во Македонија. Ова е последен чин за обидот да се уништи Македонија, а тоа да биде во режија на СДСМ и Зоран Заев“, кажа Мицкоски.

Прашан, која е силната страна во оваа коалиција, Мицкоски рече: „Па таму нема силна карика. Таму се сите слаба карика. Таму кога би имало силна карика“.

„Векот на оваа Влада зависи од тоа колку побрзо ќе се вразумат дека тие се нефункционални бидејќи се нефункционални. И фрустрацијата во оваа коалиција е огромна и тоа го гледаме преку позициите кои чинителите на оваа коалиција ги рефлектира во јавноста. Брзи избори, час поскоро, се решение“, додаде Мицкоски.

Основното јавно обвинителство Гостивар донесе наредба за спроведување истражна постапка против едно лице кое лажно се претставувало како оџа и извршило полов напад врз малолетно девојче. Против него, како и против двајца други осомничени соизвршители, поведена е постапка и за измама.

„Првиот осомничен, 37-годишен жител на Кочани, во два наврати на 23 и 24 ноември во стан во Гостивар, извршил полово дејствие врз дете родено 2012 година. Мајката на детето го повикала осомничениот кој се претставил како оџа, да пее и да го „лекува“ детето од црни магии. Осомничениот побарал да остане сам со детето-жртва во собата и притоа ја принудил на други полови дејствија. Оштетената од страв во прв момент не кажала ништо на мајката. Кога на 5 декември мајката сакала по третпат да го повика осомничениот, девојчето вознемирено раскажало што му се случува, по што настанот бил пријавен во полиција“, соопштија од Обвинителството.

Истиот осомничен, заедно со уште двајца соизвршители од Гостивар, измамиле друга оштетена. Првопријавеното лице, во договор со другите двајца, на оштетената исто така и се претставило како оџа кој ќе и помогне да ги тргне магиите од нејзината куќа. Во повеќе наврати тројцата ја убедувале дека за да ги отстранат магиите треба да откопуваат различни предмети од гробишта и со тоа ги влечат магиите од неа и од нејзиниот дом. За услугата и наплатиле вкупно 98.000 денари. Кога почнале да се договараат за нова средба, оштетената се посомневала дека е измамена и ги пријавила.

За првопријавениот Основното јавно обвинителство Гостивар до судијата на претходна постапка достави предлог за определување мерка притвор, додека за останатите двајца осомничени се предложени мерки на претпазливост.​​

Молкот во изминативе неколку дена на СДСМ поврзан со криминалните иновации во власта е потврда дека СДСМ како и по обичај испумпува пари преку државните институции, пари кои се на граѓаните, изјави на прес-конференција, портпаролот на ВМРО-ДПМНЕ, Димче Арсовски.

Тој вели дека молкот и не негирањето дека се дадени 40.000 евра за рецепта за пица, укажува оти парите на граѓаните завршиле залудно, или во нечиј џеб.

„Замислете, втор проект, цела тиквешија прави домашни слатки со маџун, познат како гроздов мед инаку во јавноста, додека пак Фондот за иновации за рецепта и производство на слатки со гроздов сируп дава 2.5 милиони денари на одредена фирма која аплицирала исто со рецепта за храна. Иновативно нема што. 40.000 евра за рецепта за пица, уште 40.000 евра за рецепта за слатки со гроздов мед. Партиските другари на Заев и понатака земаат проекти во милионски суми во денари од државата за веќе измислени иновации кои што постојат, исто како што дадовме пример за неговиот партиски другар на Зоран Заев, одреден Миле Милановиќ од Струмица. Поранешниот директор на ФЗО и Телеком од СДСМ Заревски, за софтвер земал над 40.000 евра“, рече Арсовски.

Тој додаде дека наместо 40.000 евра за рецепти, можело со истите тие пари да се набават амбулантни или противпожарни возила.