Кандидатот на ВМРО-ДПМНЕ за градоначалник на Град Скопје, Орце Ѓорѓиевски, ја прифати поканата за телевизиска дебата со својот противкандидат Амар Мециновиќ од Левица, која до него ја доставила Канал 5 телевизија.

„Граѓаните заслужуваат отворена и аргументирана дебата, во која секој кандидат ќе ги претстави своите визии, програми и решенија за иднината на Скопје“, изјави Ѓорѓиевски, нагласувајќи дека транспарентноста и почитта кон граѓаните се темели на вистинска демократија.

Тој додаде дека ова е прва телевизија со национална концесија што упатила официјална покана за дебата.

Партијата Левица по влезот во вториот  круг на локалните избори го повика Ѓоргиевски да се соочи со Мециновиќ на телевизиска дебата.

Вториот круг од локалните избори за градоначалник на Скопје ќе се одржи на 2 ноември.

На 16 октомври во Македонскиот народен театар се одржа првото издание на Game Dev Rev, првата интернационална конференција целосно посветена на индустријата за развивање видео игри во Македонија.

Настанот го организираше Асоцијацијата на македонската индустрија за видео игри – МГИ, со поддршка од Министерството за култура и туризам на Република Македонија, Western Balkans Fund, како и со учество и поддршка на бројни домашни и регионални партнери.

Конференција која ги поврза регионалните креативни сили

Настанот го отвори Министерот за култура и туризам на Македонија, господинот Зоран Љутков, кој ја нагласи поврзаноста меѓу креативноста и културната политика, истакнувајќи дека: „И двете започнуваат со идеја што може да прерасне во нешто големо.“ Тој ја пофали иницијативата на МГИ за организирањето на оваа конференција и се заложи дека Министерството ќе продолжи да ја поддржува и понатаму, и ја охрабри младата генерација да сонува, создава и соработува. На ова се надоврза Директорот на Европската федерација на гејм девелопери, господинот Јари-Пекка Калева и изјави: „Македонската гејм дев заедница можеби е мала, но е полна со талент и страст – две работи што можат да те одведат далеку во оваа индустрија. Чест ми е да објавам дека МГИ стана дел од Европската федерација на развивачи на видеоигри (EGDF). Верувам дека со меѓусебна поддршка и отворени можности, Македонија може да стане центар што не губи, туку привлекува таленти.“

На Game Dev Rev 2025 присуствува претставници од повеќе државни институции, амбасади и невладини организации, а привлече повеќе од 350 посетители – студенти, млади (и возрасни) професионалци, независни студија и компании од регионот, кои имаа можност да следат предавања, панел дискусии, Fireside chat и Indie Expo зона. На сцената говореа врвни експерти од Америка, Јапонија, Турција, Европа, Македонија и регионот.

Еден од централните моменти беа говорите на Илари Куитинен (Финска), Кејт Едвардс (Америка), Кеи Хироки (Јапонија) на кои, како ветерани со повеќе од 30 години искуство и работа во гејм девелопментот, им беше доделено и признанието „Eternal Legacy Award“ за исклучителен придонес во глобалната гејм дев индустрија. Исто така особена заинтересираност и

посетеност привлече и панелот “Game Divas: Empowering Women in the Gaming Industry”, посветен на жените во гејминг индустријата, а финансиран од Western Balkans Fund.

Прв чекор кон иднината на македонскиот game dev

Game Dev Rev 2025 го означи почетокот на ново поглавје – создавање на национална платформа за контакти, соработка и образование во гејминг секторот. Покрај конференцијата, програмата вклучи и VIP networking активности, културна тура низ Скопје, и пост-конференциска прошетка по Кањон Матка и пештерата Врелo.

Организаторите најавија дека Game Dev Rev 2026 ќе се одржи повторно, на 15 октоври 2026, со амбиција настанот да прерасне во традиционален регионален форум за развој на видеоигри и креативни технологии.

Владина делегација во која се заменик-претседателот на Владата Александар Николоски, министерката за финансии Гордана Кочоска Димитриеска и министерот за надворешни работи и трговија Тимчо Муцунски, денеска во рамки на Самитот за Западен Балкан – Берлински процес кој се одржува во Лондон, оствари средба со министерот за бизнис и трговија на Обединетото Кралство, Сер Крис Брајан.

По средбата, вицепремиерот Николоски изјави дека Обединетото Кралство е сериозно посветено на реализација на Договорот Влада со Влада и најави повеќе средби со високи владини претставници.

Тој информира дека делегацијата започнува дводневна работна посета во рамки на Берлинскиот процес, организиран од британскиот премиер Кир Стармер, и дека премиерот Христијан Мицкоски повторно ќе има средба со Стармер.

Николоски најави и прием кај кралот Чарлс, како и повеќе билатерални средби со британски министри и финансиски институции. Според него, првата средба со министерот за трговија и економија покажала дека Обединетото Кралство е силно посветено на реализацијата на меѓудржавниот договор, кој предвидува 6 милијарди евра за инфраструктурни проекти, вклучувајќи ја брзата пруга на Коридор 10 и изградбата на болници во Штип, Тетово и Кичево.

Во текот на утрешниот ден ќе се потпише и меѓудржавен договор за соработка во воздушниот сообраќај, со цел зголемување на бројот на директни летови меѓу Англија и Македонија.