Мерните станици се во функција, но дел од инструментите кои ги мерат ПМ10 честичките не работат, велат од Министрството за здрава и животна средина.

Проблем има со инструментите за мерење на PM10 во Гази Баба, Миладиновци, Битола 1, Струмица, Карпош, Ректорат, Центар, како и мобилната станица која моментално е лоцирана во Ѓорче Петров.

Министерството тврди дека мерниот инструмент за мерење на РМ10/PM2.5 од мобилната мерна станица во Ѓорче Петров и мерните инструменти за РМ10 од мерните станици во Карпош и Струмица биле исклучени поради технички проблем.

Мерните инструменти, пак, за мерење на PM10 во Битола 1 и Миладиновци се исклучени поради осцилации во мерењата кои се последица на дотраеноста на самите инструменти и на нивниот извор за радијација, бидејќи оптимална оперативна работа на еден инструмент е 10 години, велат од Министерството.

Додаваат дека мерниот инструмент за мерење на СО од мерната станица Ректорат е исклучен поради технички проблем, додека инструментите за мерење на O3, CO, SO2 и NO-NO2-NOx од мерните станици Карпош и Центар не се во функција поради престанок на работата на фабриката на производителот Orion, и за нив немало резервни делови. Истите треба да се заменат со нови мерни инструменти од други производители.

Од Министерството посочуваат дека годинава во тек се повеќе активности за набавка на нови мерни инструменти. Реализацијата на дел од набавката е со донаторски средства, а дел со буџетски средства на МЖСПП.

Министерот за правда, Бојан Маричиќ, имаше средба со генералната секретарка на Советот за регионална соработка (RCC), Мајлинда Брегу, која во моментот е во работна посета на земјава.

На средбата Маричиќ истакна дека добрата регионална соработка е суштинска за ширење на духот на европските вредности и практики, за динамична европеизација на регионот, а дека во тој поглед, Советот за регионална соработка е значаен за воспоставување и негување на добрата соработка во регионот.

Министерот Маричиќ потенцираше дека Република Северна Македонија е на историски пат, бидејќи наскоро се очекува официјално започнување на преговорите со ЕУ и да го отвориме Поглавјето 23: Правосудство и фундаментални права.

Поддршката што Шведска ѝ ја дава на земјава во процесите на интеграција кон ЕУ, како и можностите за идна соработка во областа на безбедноста, биле во фокусот на средбата помеѓу министерот за внатрешни работи Оливер Спасовски и шведската мабасадорка Кристин Форсгрин Бенгтсон, информираат од МВР.

Соговорниците ги потврдиле заедничките приоритети како што се борбата против организираниот криминал, владеењето на правото и борбата против корупцијата, со подготвеност за заедничка соработка на овие полиња во иднина.