Мицкоски се плаши и избега од брзи предвремени избори во декември, граѓаните ќе го казнат со нов изборен пораз, смета СДСМ.

Од владејачката партија преку соопштение велат дека ВМРО-ДПМНЕ се единствените кои посветено работеле против интеграција во НАТО и ЕУ, против реформите и напредокот на државата.

„Христијан Мицкоски и ВМРО-ДПМНЕ се единствените што се радува и аплаудираа на историската грешка на ЕУ, затоа што сакаат државата да ја вратат назад во изолација и неизвесност. Без визија, без конкретна програма и цел, ВМРО-ДПМНЕ го очекува вистински дебакл на предвремените парламентарни избори. Затоа ВМРО-ДПМНЕ и Мицкоски се исплашија и побегнаа од брзи предвремени избори во декември. Коалицијата на Христијан Мицкоски го менува само името, а во суштина ништо не се менува. Тоа е Коалиција за обнова на режимот, на криминалот и изолацијата“, додава СДСМ.

Членството во најмоќниот воено-политички сојуз на денешницата значи дека влегуваме во еден систем на колективна безбедност, дека каков било напад на државата, значи напад на сите останати 29 земји-членки, рече министерката за одбрана, Радмила Шекеринска на синоќешната панел дискусија во Куманово посветена на придобивките од членството во НАТО.

„Освен политички знак, членството во Алијансата е и знак за позитивните економски трендови – во годината во која што ја добивме НАТО поканата, ние имавме четири пати повеќе странски инвестиции од претходната година, односно повеќе од вкупните инвестиции во 2012, 2013 и 2014 година“, рече Шекеринска.

Министерката додаде дека на земјава наскоро и претстојат одлуки кои ќе покажат дека граѓаните немаат дилема околу нашата евроатлантска ориентација.

Посочи дека реформите во одбранбениот сектор се реализираат и за членството во НАТО, но и за нашата држава, нашата Армија, нашите војници и дека наскоро ќе бидат објавени серија мерки кои значително ќе го подобрат стандардот на припадниците на Армијата и статусот на професионалните војници со навршени 45 години возраст.

Во однос на ратификацијата на пристапниот протокол, министерката рече дека во случајот со нашата држава, тој се движи исклучително брзо – досега парламентите на 25 земји-членки го завршиле процесот, додека пак фактот што ратификациите од нашите соседи биле особено брзи, како што рече таа, покажува дека Балканот се менува и дека земјите научиле од своето лошо искуство низ историјата.

Зоран Заев ќе ги изгуби претстојните предвремени парламентарни избори, велат од ВМРО-ДПМНЕ преку соопштение.

„Тој тоа го знае и затоа излегува со панични интервјуа во кои сите му се виновни. Премиерот во заминување се удави во криминал, ги продаде националните интереси и не доби датум за почеток на преговори со ЕУ, а сега се обидува да се амнестира. Ниту Макрон, ниту било кој друг политичар од Европа го лажел Заев дека ќе влезе во ЕУ ако го смени името на државата. За влез во ЕУ се потребни реформи и многу работа. Заев не го испорача ниту едното, ниту другото“, велат од ВМРО-ДПМНЕ.

Опозицијата додава дека граѓаните бараат обнова и сакаат државата да тргне напред и затоа во огромно мнозинство го поддржуваат ВМРО-ДПМНЕ.