Премиерот Зоран Заев вели дека 5.850 вакцини од „Фајзер“, за кои министерот за здравство, Венко Филипче, рече дека се одлична вест што ќе стигнат во февруари, нема да бидат доволни ниту за вакцинација на здравствените работници што работат директно со ковид-пациенти.

Тој се надева дека Македонија преку членките на Европската Унија ќе добие вакцини уште во јануари за вакцинацијата да почне што побргу.

Заев објасни дека приоритетна вакцина чекаат 25.000 здравствени работници, како и хронично болни и пензионери.

„Секако, некаде 5.000 или нешто под 6.000 вакцини се тие што сега се најсигурни од ‘Фајзер’. Додека тие се имплементираат и се користат, ќе стигаат вторите, третите пакети. Она на што сега реагираме е што првите испораки на вакцини во земјите членки на Европската Унија стигнаа. И некаде се 10.000, некаде 15.000, некаде 7.000, зависи колку се големи земјите. И тие почнуваат со вакцинацијата. И додека трае процесот, ќе стигнат вторите испораки. Затоа, баравме барем пет проценти од целото тоа што го имаат земјите членки да го споделат со Западен Балкан и да може непречено да продолжи вакцинацијата. Јас очекувам солидарноста на ЕУ да ја видиме овие денови затоа што тоа е еден од најизвесните начини вакцината да ја добиеме уште во јануари, а секој ден порано е добредојден. Нормално, очекуваме регулирана испорака по пратки затоа што ако стигнат 5.800, на пример, тоа не стигнува само за здравствените работници што работат на ковид-одделите. 7.700 се само здравствените работници што работат директно на ковид-случаи. На ниво на државата имаме над 24-25.000 здравствени работници. Каде се пензионерите, хронично болните, имаме отврено дебата граѓаните што изгубиле член на семејството од Ковид-19 да бидат во приоритетните групи за вакцинација“, рече Заев.

Сите средства за вакцините ќе се плаќаат од буџетот, но и преку донации и грантови.

„Јас очекувам првите вакцини кога ќе стигнат, додека трае вакцинацијата, да стигне и вториот пакет вакцини. Плаќањето ќе биде од буџетот. Дел е грантови и донации, како фрижидерите што ги очекуваме. Ќе водиме и јавна кампања за да ја подигнеме свесноста за вакцинацијата за на тој начин да ја истераме пандемијата од нашата земја“, рече Заев.

Министерот за здравство, Венко Филипче, рече дека првата доза од 5.850 вакцини против Ковид-19 ќе стигне во февруари. Според него, 800.000 дози ќе бидат испорачани во текот на 2021 година.