Државната изборна комисија вечерва излезе со оценка дека денешното гласањето поминало тековно и без проблеми. Ден пред претседателските избори во земјава, своето гласачко право го остварија затворениците, изнемоштените и дијаспората.

,,До 18.30 часот, според информациите кои ги добиваме од избирачките одбори, вкупната излезност од гласањето во странство изнесува 686 гласачи односно 38,51 процент. Напоменуваме дека во оваа излезност поради временската зона не се вклучени шесте избирачки места во САД и Канада. 13 гласачки места во казнено-поправните установи каде своето гласачко право денеска можеа да го остварат 1 640 гласачи се затворени. Гласањето таму течеше без проблеми, а до 18.30 часот според информациите од избирачките одбори гласаа околу 55 проценти од запишаните избирачи”, информираат од ДИК.

,,Ми претставува особена чест и задоволство да од мое лично име и од име на пратениците во Собранието на Република Северна Македонија, на сите верници од католичка вероисповед кои живеат во и надвор од границите на Република Северна Македонија да Ви го честитам големиот христијански празник, Воскресение Христово – Велигден”, се вели во четитката на претседателот на Собранието, Талат Џафери за католичкиот Велигден.
           
,,Во оваа прилика, би сакал да Ви упатам искрени желби за добро здравје, радост и спокој во кругот на вашите најблиски. На овој голем празник, Ви посакувам да го славите животот со сета своја вистинска убавина и исполнети со најголемиот дар на овој ден Велигден, а тоа е надежта. Затоа, во духот на празникот, Ви пожелувам надежта и љубовта да царуваат во вашите срца, вашите домови и секаде околу вас.

Оваа празнична прилика ќе ја искористам и за да се заблагодарам на католичката заедница во Република Северна Македонија за големиот придонес кој секојдневно го дава на сите полиња на општественото живеење. Дозволете ми уште еднаш да Ви посакам убави и весели празнични денови поминати во мир и благосостојба”, се додава во честитката.
 
            

Полицијата информира за неколку случаи на прекршување на изборниот молк, каде се испишувале графити и се лепеле слики на кандидатите за претседател. Вчера во 21 часот во СВР Скопје било пријавено дека на објектот на месната зедница „11-ти Октомври“ на ул.„Андреја Димишков“ бил испишан графит во врска со претстојните избори. Се преземаат мерки за расчистување на случајот.

Изутринава околу 8.10 часот во Полициската станица Ресен било пријавено дека на ѕидот од основното училиште „Гоце Делчев“ во село Избиште бил испишан графит во врска со претстојните избори. Околу 9 часот во Полициската станица Струга било пријавено дека на бандера во близина на основното училиште „Јонче Крежоски“ во село Мислешево бил испишан графит во врска со претстојните избори.

Во истиот период во Полициската станица Струга било пријавено дека на оградата од основното училиште „Дедо Лазар Циркоски“ во село Враниште била закачена слика на еден од кандидатите на претстојните избори. Се преземаат мерки за расчистување на случаите.