Македонија
Почнува со реализација комплексот „Гранд“ во Скопје

МГ ФЕШН ДОО Скопје ја известува јавноста дека денес, понеделник, 22.11.2021 година, почнува со изградба на првата фаза на комплексот „Гранд“ во Скопје, предвиден за изградба на градежната парцела 1.1 во рамките на ДУП Ц08 за Ново Маало на територијата на општина Центар, а во согласност со претходно добиеното одобрение за градење УП 1 Бр. 27-92 од 13.04.2021 година.
Во оваа прва фаза започнува изградбата на станбено-деловниот објект кој содржи: три нивоа под земја, приземје плус дваесет ката и поткровје. Објектот ќе биде изграден согласно највисоките архитектонски стандарди и нормативи за градење на енергетски ефикасни објекти кои имаат минимално влијание врз животната средина. Подземните нивоа се наменети за паркирање на возила, приземјето и првиот кат се со деловна намена, додека останатите катови се станбени единици со различна големина. Објектот е дизајниран да овозможи максимален комфор на идните корисници на станбените единици како и целосно искористување на природната светлина и визури, како кон реката Вардар, така и кон планината Водно.
Сакаме да нагласиме дека во рамките на ДУП Ц08 предвидена е и јавна површина од вкупно 7.500 м2 или приближно површина колку Плоштад Македонија во центарот на Скопје. Нашата визија за овој јавен простор е да се уреди на современ начин, налик на урбаните паркови во светските метрополи, како на пример оној на „Porta Nuova“ во Милано, а за кое идејно решение ќе предложиме да биде распишан јавен конкурс во соработка со Општина Центар. МГ ФЕШН ДОО Скопје како општествено одговорна компанија, на свој трошок, ќе ги обесштети сите жители на Ново Маало кои имаат имот на овој простор, без разлика што на истиот не е предвидена никаква изградба на градежен објект, и тоа на ист начин и во ист сооднос како и на жителите на Ново Маало на чии имот е предвидена изградба на објекти.
Во однос на обесштетувањето, МГ ФЕШН ДОО Скопје потсетува дека со целосната реализација на овој проект, жителите на Ново Маало конечно ќе ги почувствуваат бенефитите на современото урбано живеење во главниот град преку урбано регенерирање на овој значаен простор во срцето на Скопје. Станува збор за обесштетување на повеќе од 300 жители кои сè уште опстојуваат таму како староседелци во центарот на Скопје и кои повеќе од седум децении живеат во супстандардни услови, без фекална и атмосферска канализација, во објекти изградени кон крајот на 19-ти или почетокот на 20-ти век, а притоа со децении имале забрана за каква било реконструкција, доградба или изградба на нивните домови.
Воедно, МГ ФЕШН ДОО Скопје ги повикува сите жители на Ново Маало кои имаат имот на територијата на ДУП Ц08, а со кои досега не се склучени договори за обесштетување, без разлика дали на нивниот имот е предвидена изградба на објекти или јавен простор, да нè контактираат или да дојдат во нашите деловни простории како би биле во можност да склучиме соодветни договори за обесштетување со цел изградба на целиот станбено-деловен комплекс предвиден со ДУП Ц08.
Искрено се надеваме дека граѓаните на Град Скопје, а особено жителите на Општина Центар, ќе ја препознаат и поддржат нашата визија за нов, современ урбан простор кој со гордост ќе го претставува нашето Скопје во 21-виот век.
(ПР-текст)
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Судски совет му врати на Пендаровски по критиките: Тоа се нивни видувања

Критиките од претседателот Стево Пендаровски, за новоизбраниот претседател на Судски совет, Сашко Георгиев се само негови видувања. Според Георгиев, укажувањата од шефот на државата дека Судски совет се избрука – се само нивна констатација. Тој само се согласува дека има простор и за критики.
„Ќе потенцирам дека во однос на некои изјави на еве релевантни фактори ќе истакнам дека тоа се нивни видувања, односно во делот на политички видувања не навлегуваме, тоа е нивно право со нивна констатација. Ние како Судски совет вчера имавме соопштение, тоа произлезе од колегиум каде дискутиравме по однос на ваквите состојби и го кажавме тоа што го имавме како заклучок на работен колегиум. Морам да потенцирам дека ги слушавме сите овие дискусии, и ќе потенцирам дека ние сме тука да работиме согласно закон“, рече Георгиев.
Според него, како Судски совет, ќе бараат одговорност од судиите.
„Од страна на изнесените критики во делот на состојбите, во добар дел се согласуваме како состојби каде имаме простор за критика, ќе ги спомнам само добар дел од познатите сензитивни предмети од СЈО каде што факт е дека завршница во добар дел се уште нема. И тука сме да работиме на тој дел, тоа е стар проблем кој што веќе неколку време се провлекува каде што општа состојба е перцепцијата дека имаме проблем во тој дел, каде имаме застој, односно немаме конкретна завршница. Тука сме ако Судски совет да дискутираме за тоа, да работиме, да бараме одговорности од судиите од тој дел, согласно законот, а од друга страна критиките изнесени и од амбасадорите со некој дел како нивно видување се согласуваме, дека владеењето на правото пред се мора да функционира, да работи на тој дел советот“, вети Георгиев.
Македонија
Јаневски до Арсовска: Добивте покачување над 70 илјади денари, земате плата над 2.500 евра, не работите ништо и донесовте банкрот

„Дали Вие знаете да одговорите директно на прашање? Некогаш? Кратко и јасно со ‘да’ или ‘не’. Дали Градот е блокиран? Да или не, толку. Дали ќе ни ги дадете картичките, дали ќе ни ја дадете информацијата, да или не? Само што добивте понуда и решение за меморандум за соработка, првиот Ваш одговор е нека ни прати директорот. Значи, тој пак да биде крив. Пак некој друг е одговорен, само не Вие. Пак некој друг да ја заврши Вашата работа, само не Вие“, нагласи Филип Јаневски, советник во Советот на Град Скопје од коалицијата предводена од ВМРО-ДПМНЕ.
Јаневски ѝ порача на градоначалничката на град Скопје да пребара во македонскиот речник што значат зборовите транспарентност и отчетност.
„Вие сте транспарентни? Па понетранспарентен градоначалник јас немам видено откако сум роден. Јас мислев нема полош градоначалник од Вашиот претходник, ама сум се излажал“, рече советникот.
Јаневски укажа дека Арсовска ја избрале речиси 120.000 граѓани за да ги реши проблемите на градот, кои ги создале нејзините претходници, но, за жал, таа само повеќе ја влошила состојбата.
„Вие велевте јас не сум политичар, јас сум менаџер, ова ли е тоа менаџерство? Вака ли Вие менаџирате“, ја запраша тој Арсовска.
„Сметате дека ние 45 советници не заслужуваме не знам колкави паушали? Вие знаете колкава плата земате? Тукушто добивте покачување на платата пред еден месец од 78 %. Сигурно земате над 2.500 евра. А ниту одговарате на прашања ниту ништо. Знаете кој Ве вработува Вас? Граѓаните! Тоа е исто како јас на работа да земам плата од сопственикот на фирмата и кога ќе ми се јават и ме прашаат нешто поврзано со работата, јас да не им одговорам ниту на менаџерот, ниту на директорот, ниту на сопственикот“, нагласи советникот.
„Вас граѓаните Ве прашуваат или лично или преку нас советниците, кои сме нивни легитимни претставници, Вас Ве прашуваат до каде е ова, до каде е она, а Вие молк. Вие напаѓате дека други се криви“, рече Јаневски.
Тој ѝ порача на Арсовска, ако има доблест, нека си поднесе оставка.
Македонија
Намалена затворската казна на Марјан од „Доказ М”, за делот за уцените ќе се постапува одново

Апелациониот суд Скопје во интерес на јавноста и медиумите информира дека донесе пресуда со која жалбата на Основното јавно обвинителство ја одби како неоснована, а жалбите на обвинетиот М. С. делумно ги уважи. Обвинетиот М. С. го осуди на единствена казна затвор во траење од (2) две години и (6) шест месеци и на глоба во износ од 5.000 евра во денарска противвредност – 308.450,00 денари.
На обвинетиот М. С. од С. му се изрекува и забрана за вршење професија, дејност или должност поврзани со кривичните дела, односно забрана да врши регистрација на домени и да се јави како регистратор или сопственик на портал за време од (6) шест години и престанок на регистрацијата на сите регистрирани домени во кои обвинетиот се јавува како сопственик на портал.
Пресудата на Основниот кривичен суд Скопје во делот за кривичното дело уцена е укината и предметот во тој дел е вратен на првостепениот суд на повторно судење од причина што првостепениот суд не ги утврдил со сигурност решителните факти кои се од влијание за правилна примена на материјалното право по однос на елементот од битието на кривичното дело уцена.