Македонија
Затворениците спијат по ходници, полицајците без униформи, „Идризово“ пред колапс – интервју со директорот Јовановски

Само човек од челик може да го издржи затворот „Идризово“ со претрупани ходници од затвореници, вработени без униформи, установа без кадар поради боледувања, одмори и оставки. Новиот директор Зоран Јовановски чиј прекар е толку Челик, а има титула генерал-мајор, во интервју за „Макфакс“ сведочи за состојбата која ја затекнал и треба да ја промени.
Јовановски посочува дека дошол во „Идризово“ за од криминогена, установата да ја направи продуктивна. Во исто време затвореници спијат по ходници издржувајќи затворска казна. Прашан што видел кога првпат влегол во затворот, одговара: „Прво не знаеш дали во кругот се вработени во установата или се осудени лица“.
Јовановски одговара што претходело на заканите за палење на автомобилите на затворските полицајци и како може заканите да се испраќаат од затворениците. Затворот кубури со кадар – отворени боледувања, земени одмори, откази.
Зборува за третманот на Катица Јанева и Гордана Јанкулоска, но и други високопрофилни личности. Ексобвинителката излага на викенди, ексминистерката е затворена во четири ѕидови поради Правилникот. Прашан дали е ова фер, одговара: „Не“.
Директорот признава дека е скандалозен затворскиот систем па вели: „Наидов на многу проблеми, може да се решат доколку има слух и разбирање од институциите“.
Дали „Идризово“ расчисти со корумпираните командири, одговара директорот Јовановски во интервјуто на „Макфакс“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Власта им го продолжи мандатот на нивните судии од „тефтерчето“ за уште 3 години, велат од партијата Левица

„На вчерашната собраниска седница, владејачкото мнозинство во скратена постапка усвои скандалозни измени на Законот за работни односи, кои ќе ја продлабочат очајната состојба во правосудството. Односно, со донесените измени се поместува старосната граница за пензија од 64 на 67 години за избраните и именуваните функционери, по нивно барање“, велат од партијата Левица.
„Под изговор дека оваа потреба произлегува поради дефицитот на кадри во правосудството, ДПМНЕ дефакто ќе им го продолжи мандатот на нивните судии од “тефтерчето” за уште 3 години, а довербата во правната држава ќе продолжи да тоне. Лицемерието на власта е евидентно, која секојдневно обвинува дека судиите и обвинителите не си ја вршат својата работа. Наместо суштински реформи кои ќе ја зајакнат одговорноста на судиите и обвинителите (кои и сега уживаат силна правна заштита) – сведочиме зголемување на нивните привилегии.
При јасна недоверба во судството, власта на Мицкоски со ова докажува дека им го продолжува периодот за уживање на привилегиите од корумпираниот систем на избраните и именувани лица до навршени 67 години.
Потсетуваме дека пратеничката група на Левица поднесе предлог-закон за кривична одговорност на судиите, бидејќи цениме дека огромната заштита која ја уживаат судиите е една од главните причини за силната корупција во правосудството. Апелираме до партиите од власта наместо да го продолжуваат мандатот на корумпираните судии, истите да го поддржат законот на Левица и конечно судиите кривично да одговараат, наместо да бидат заштитени од системот при нивното катастрофално работење“, соопшти партијата Левица.
Македонија
Коцевски не постапува и не го санкционира криминалот со што предизвикува ерозија на судскиот систем, велат од ВМРО-ДПМНЕ

Според ВМРО-ДПМНЕ, Коцевски наместо да работи на владеење на првото и да го санкционира криминалот тој ја продлабочува недовербата на граѓаните во правосудството.
Коцевски, според нив е платен од граѓаните и треба да ја гарантира правдата и владеењето на правото, а не да е во спрега со политичките криминалци на СДС и ДУИ.
„Надежта за правда на која се фокусираше СДС заврши неславно со инсталирање на обвинители и судии избрани во Струмица и Зајас кои не постапуваат по наводите за криминал.
Наместо правда, од владеењето на СДС и ДУИ остана само клиентелизмот на судиите избрани во Струмица и Зајас кои ги опструираат предметите и не постапуваат.
Коцевски не постапува по наводите за криминал во Онкологија, ЈПДП, Државна Лотарија, ТЕЦ Неготино, РЕК Битола, ЕСМ, МЕПСО, Министерството за здравство, нивите купувани долж трасата за автопатот Скопје – Блаце и мноштво предмети за кои известуваа медиумите.
Републичкиот јавен обвинител Љупчо Коцевски, не презема мерки за значајни предмети и покрај јавните докази за криминални активности и корупција“, истакнуваат во соопштението.
Според партијата на власт, неактивноста на Јавниот обвинител доведува до незадоволство кај граѓаните од правосудниот систем, наместо да обезбедат правда тие комплетно го блокираат правосудството, а поради таквите постапки довербата на граѓаните во судскиот систем е 2 проценти.
Оценуваат дека ЈО на чело со Љупчо Коцевски наместо да го санкционира криминалот ги штити политичките елити блиски до СДС и ДУИ, со што предизвикува ерозија на судскиот систем и недоверба во јавните институции. Во Македонија неопходно е правдата да завладее, неопходни се коренити реформи и трансформација на судскиот систем.
Македонија
Мицкоски во дводневна посета во Сојузна Република Германија

Претседателот на Владата на Република Северна Македонија Христијан Мицкоски заедно со министерот за надворешни работи и трговија, Тимчо Муцунски, министерот за одбрана Владо Мисајловски, министерот за внатрешни работи, Панче Тошковски и министерот за европски прашања, Орхан Муртезани од денес и во наредните неколку дена ќе присуствува во Сојузна Република Германија на Минхенската безбедносна конференција.
61 Минхенска конференција се одржува од 14 до 16 февруари каде ќе овозможи висок дијалог за клучните надворешни и безбедносни предизвици кои се актуелни прашања на политичките лидери.
На конференцијата ќе присуствуваат украинскиот претседател Володимир Зеленски, американскиот потпретседател Џеј Ди Ванс и државниот секретар Марко Рубио.
За време на Конференцијата премиерот Мицкоски се очекува да има средба со претседателот на Европскиот совет, Антонио Кошта, со претседавачот на Минхенската конференција амбасадорот Кристоф Хојгенс, со хрватскиот премиер Андреј Пленковиќ, како и други политички лидери.
Претседателот на македонската Влада, Мицкоски ќе биде говорник и ќе земе учество на финалниот настан од затворањето на конференцијата посветен на ЕУ пристапните преговори на Западниот Балкан, како и панел дискусијата на Форин Полиси каде ќе говори за геополитиката, енергетската сигурност и улогата во промените на глобално ниво.
Мицкоски ќе ја искористи приликата за лобирање и прикажување на реалната слика од пристапните преговори на државата во поглед на европските перспективи, како и план за развој и економски достигнувања како дел од напорите за економски прогрес и сигурност на граѓаните.