Премиерот и лидерот на СДСМ, Зоран Заев денеска се очекува да ги достави до Собранието предлозите за испразнетите министерски места во Владата.

Тој синоќа по завршувањето на Централниот одбор на СДСМ најави дека денеска до Собранието ќе достави предлог за избор на нови функционери. Нина Ангеловска, сопствениката на „Групер“ ќе биде предложена за министер за финансии, а Кире Колемишевски за заменик министер за економија.

Заменик министер за образование и наука ќе биде Елизабета Наумовска, а досегашниот заменик министерот за економија Кире Наумов, ќе биде директор на Македонската Банка за поддршка и развој. Заменик министер на новото министерство за политички систем и односи со заедниците ќе биде Неџат Мехмедовиќ.

По завршувањето на седницата на Централниот одбор на СДСМ, партискиот претседател и премиер, Зоран Заев, одговараше на новинарски прашања од кои повеќето се однесуваа на случајот „Рекет“ и притворот за специјалната јавна обвинителка, Катица Јанева.

Едно од прашањата се однесуваше на најавените нови бомби од страна на италијанскиот новинар, во кои наводно Заев бил директно инволвиран, заедно со министерот за здравство Филипче и директорот на Фондот за здравство.

Премиерот на ова одговори дека апелира секој што има некакви докази веднаш да ги објави.

„Ако има докази нека се објават, за било кој, прво за мене, па после и за сите. Нека се објават секаде. Тоа го заслужуваат граѓаните за било кој, еве и мене ме спомнувате, ако е за Зоран Заев, веднаш да ги објават. Дали е италијанскиот новинар, дали е господинот Мицкоски, апелирам да објават“, порача Заев.

Тој истакна дека тоа е начинот на кој се постапува во земја што е слободна и дека објавувањето на незаконски дејствија помага во јакнењето на сите општествени процеси и на државата.

На седницата на Централниот одбор СДСМ вечерва одлучуваше за неколкумина кандидати за нови министри и заменик-министри.

По завршувањето на седницата, премиерот и претседател на партијата, Зоран Заев, најави дека утре ќе достави предлог до Собранието за нов министер за финансии да биде назначена Нина Ангеловска, која во јавноста е позната како еден од основачите и директорка на компанијата „Групер“ и е добитник на наградата „Форбс 30“.

Заев најави дека ќе достави и предлог за нов заменик-министер за образование и наука – Елизабета Наумовска.

Заменик-министерот за економија, Кире Наумов, ќе биде разрешен бидејќи ќе добие нова позиција како директор на Македонската банка за поддршка на развојот, а на негово место Заев ќе го предложи Кирил Колемишевски.

За заменик-министер во новото Министерство за политички систем и односи со заедниците ќе биде предложен Неџат Мехмедовиќ.

Како што кажа Заев, со овие решенија се испраќа порака дека младите со својата енергија и инвентивност може да бидат корисни дома, а не само надвор од Република Северна Македонија.

„Општеството знае да препознае и да даде шанса секој да се вгради низ институциите на системот и да даде придонес во севкупниот раст и развој, соовременување и модернизирање на општеството и нашата земја“, порача тој.

На Централниот одбор на СДСМ беше донесена и одлука да се изберат и пет потпретседатели на партијата.

Така, на овие позиции во иднина ќе бидат актуелната министерка за труд и социјала, Мила Царовска, Коста Петров, министерот за внатрешни работи, Оливер Спасовски, пратеникот Мухамед Зекири и министерот за информатичко општество, Дамјан Манчевски.