Мешовитата македонско-бугарска историска комисија на 11. средба не постигна напредок во преговорите. Историчарите се обиделе да ги надминат разликите за изучувањето на ликот и делото на средновековниот цар Самуил во учебниците по историја во основното образование.

Настанал проблем и во врска со потпишувањето на записниците од претходните две средби затоа што за македонските историчари не било прифатливо што ја нема придавката македонски.

Бугарскиот професор Ангел Димитров оцени дека македонската страна нема желба за конструктивно решение и рече дека ова, за жал, е пропадната средба.

„Констатирам, за жал, дека денеска е направен нула напредок, ниту минијатурен чекор. За некои прашања кои имавме заеднички сигнали, со кои првпат се соочуваме. Се јави технички проблем, при што нашите колеги откажаа да ги потпишат записниците, настојуваа насекаде да стои македонски. Блокирајќи го потпишувањето на записниците за претходните две средби, без документ, кои дискусии се водени, работите изгледаат несигурни, со најава за немање желба да се работи сериозно. Многу, многу сме далеку од завршување на работата за учебниците за седмо одделение, за средниот век. Денес, зборувавме за четвртата забелешка за цар Самуил, која заврши безуспешно, без никакво отстапување за една заедничка историска личност. Зборувате за бугарски цар, непотребно е да напоменувам дека еден од неговите наследници – Иван Владислав – има споменик. Ова е историски факт, но немањето желба да се оди напред е дискутабилно и не оди во прилог. Ова 11. средба покажува дека се движиме како желки, не се покажува желба за договор“, рече Димитров.

Драги Ѓоргиев, шефот на македонската делегација, оцени дека бил постигнат мал напредок и побара повеќе трпение за нивната работа.

„Средбата помина во академска атмосфера со плодна многуслојна дисусија, која ќе кажам дека не донесе никакви резултати. Добар дел беше посветен на записниците. Постојат два записника, кои не се потпишани, главен проблем е употребата на придавката македонски. Постои различно толкување, која, според бугарските колеги, е лимитирана целосно и како се толкува договорот од нивна страна. Бугарските колеги почнаа да го практикуваат тоа, без наша консултација, без да биде известено нашето МНР, кое со консултација ќе придонесеше да се надмине. Останува проблемот со придавката македонски. Се надевам дека ќе се најде решение. Сè почна со учебниците за седмо одделение, претставувањето на Самоиуловата држава во учебниците по историја, не постигнавме согласност. Проблемот е што се избегнува внесување мултиперспективност и желбата да се наметне само едно видување, ова не успеавме да го надминеме со бугарските колеги“, рече Ѓоргиев.

Тој додаде дека биле ставени на маса неколку предлози, но се покажало дека двете страни имаат спротивставени ставови во однос на ова прашање. Вели дека за ликот и делото на Гоце Делчев немало време за дискусија и дека тоа ќе биде предмет на разгледување на следната средба.