Во изминатите 24 часа во ковид-центрите во Скопје хоспитализрани се 48 нови пациент поради компликации од корона вирусот. Вкупно 476 лица сомнителни и потврдени за КОВИД -19 се лекуваат на инфективните оддели во главниот град.

Во последното деноноќие, на интерните клиники имало вкупно 25 приеми и тоа петмина пациенти биле хоспитализрани на Институтот за белодробни заболувања и ТБЦ, девет во ковид центарот на Клниката за Неврологија, тројца нови болни се хоспитализрани на Клиниката за дерматовенерологија, исто толку и на Клиниката за нефрологија и петмина болни на Клиниката за очни болести.

Во ковид центарот во ГОБ 8 Септември имало 12 нови приеми на пациенти, а на Инфективната клиника 11 приеми во текот на вчерашниот ден.

Во изминатите 24 часа дома се пуштени 19 оздравени пациенти.

Во моментов на Кожната клиника во ковид центарот се лекуваат 24 пациенти, на Клиниката за неврологија 33 болни, а на Институтот за ТБЦ се примени вкупно 54 пациенти со симтоми на корона вирусот, на Клиниката за Гастроентерохепатологија се лекуваат вкупно 26 лица, во ковид центарот на Клиниката за нефрологија во моментов се сместени 26 пациенти, а на Клиниката за очни болести 15 пациенти.

Во ГОБ 8 Септември има вкупно 108 болни, на Клиниката за инфективни болести лежат 159 пациенти, додека во Иститутот за белодробни заболувања кај деца Козле има 31 пациенти, од кои 10 деца и 21 возрасен.

Вкупно 476 пациенти потврдени и сомнителни за КОВИД- 19 се лекуваат на инфективните оддели во болниците во главниот град. Голем дел од нив се на кислородна поддршка.

„И покрај големиот број на приеми во текот на вчерашниот ден, утрово до 8 часот имало 20 тина слободни места, а се очекува во тек на денот по направените исписи на оздравените пациенти да се ослободат и дополнителни места и на Клиниката за инфективни болести и во ГОБ 8 Септември“, велат од Министерството за здравство.

Се очекува во текот на наредните два дена да почне со работа и ковид центарот на Клиниката за уво, нос и грло.

Сите инфективни одделенија имаат довод на кислород и можат да згрижат пациенти кои имат потреба од кислородна подршка.

„Бројот на лажни веб-страници за онлајн шопинг и на измамнички трговци преку Интернет се зголеми за време на пандемијата со Ковид-19. Од копии на веб-страници на популарни брендови до лажни продавници кои никогаш не ја испорачуваат стоката, коронавирусот откри слабости во моделот на доверба што се користи при купување преку Интернет. Пандемијата поттикна насочени напади врз домови, бизниси, влади и критична инфраструктура, што главно се должи на слабеењето на постојните мерки за сајбер безбедност поради промени во работните и инфраструктурните обрасци предизвикани од пандемијат“. Ова е наведено во извештајот „Пејзаж на закани 2020“ кој неодамна го објави Агенција за сајбербезбедност на ЕУ (ENISA).

Агенцијата наведува дека за време на пандемијата сајбер криминалците ги унапредиле своите можности, брзо се адаптирале и поефикасно се насочиле кон релевантни групи на жртви. Овој глобален феномен доведе до наплив на персонализирани сајбер напади на сајбер криминалци кои користат понапредни методи и техники, а употребата на мобилната технологија и претплатата на дигитални платформи ги прави помладите генерации поранливи на овие видови закани. Остварување финансиска корист и натаму е најголем мотив на компјутерските криминалци.

„Бројот на жртви на малвер и на фишинг во ЕУ продолжува да расте со користење на темата Ковид-19 како мамка. Овие напади вклучуваат пораки што носат додатоци на малициозни датотеки и пораки што содржат малициозни врски што ги пренасочуваат корисниците кон страници за фишинг или за преземање на малициозен софтвер. Ваквите компјутерски измами резултираа со загуба на милиони евра за граѓаните и компаниите во ЕУ“, се вели во извештајот.

Агенцијата за сајбербезбедност на ЕУ објави и листа на 15 најголеми сајбер закани. Малвер односно малициозен софтвер стои цврсто како број 1 сајбер закана, а веднаш по него се фишинг и кражба на идентитет. На списокот се и Веб-базирани напади, Напади на веб апликации, СПАМ, DdoS, Прекршување на податоци, Инсајдерска закана, Ботнети, Физичка манипулација, штета, кражба и загуба, Истекување на информации, Ransomware, Сајбер шпионажа и Cryptojacking.

Граѓаните во земјава имаат можност сомнителните пораки испратени по е-пошта да ги пријават онлајн во Националниот центар за одговор на компјутерски инциденти (MKD-CIRT) кој е дел од Агенцијата за електронски комуникации (АЕК) на [email protected]

„Секоја порака добиена по е-пошта за која постои сомнение за веродостојност може да се препрати MKD-CIRT. Сомнителната порака може да е од компанија или адреса од која вообичаено не се добиваат пораки, или од непознато лице. Ако пораката изгледа сомнително, најдобро е да се пријави. Тоа ќе помогне да реагираме побрзо, и на тој начин да се заштитат повеќе корисници од штетното влијание на пораката“, вели Александар Ацев, раководител во MKD-CIRT.

Националниот центар ќе ја анализира сомнителната порака, нејзината содржина, адресата на испраќачот, додатоците и веб-страниците кон кои водат линковите од содржината на пораката. Доколку се открие активност за која се верува дека е штетна, ќе се побара блокирање на адресата од која е испратена пораката со цел да не може повеќе да се праќаат фишинг-пораки преку неа, како и бришење на линковите кои водат до малициозните веб-сајтови.

Оваа услуга инаку не се користи за пријава на сајбер-криминал. Секој кој смета дека е жртва на онлајн измама или сајбер-криминал, истото треба да го пријавите во Министерството за внатрешни работи.

Скопското обвинителство поднесе предлози за издавање казнени налози против три лица и еден угостителски објект, поради организирање на масовни собири за време на епидемија.

Првите двајца обвинети, татко и син од Скопје, на 13 септември во дворот на семејната куќа организирале веридба, на која присуствувале 30 гости.

„Со ова тие постапиле спротивно на прописите и наредбите со кои се определни мерки за спречување на ширењето на коронавирусот Ковид-19, согласно кои се забранува одржување на масовни собири и настани на отворен и затворен простор“, велат од Обвинителството.

Третиот обвинет, како основач и управител на угостителски објект, на 3 октомври, постапил спротивно на забраната, дозволувајќи да се организира свадба на која биле присутни околу 90 лица. Од Обвинителството велат дека со тоа, обвинетиот го довел во опасност животот и здравјето на луѓето. Настанот бил утврден при контрола и надзор од страна на овластени лица од Државниот пазарен инспекторат.

Надлежните јавни обвинители за обвинетите физички лица предложија парични казни од 100 дневни глоби со поединечна вредност на дневната глоба од 20 евра во денарска противвредност. За обвинетото правно лице, пак, на Основниот кривичен суд му е предложено да изрече парична казна од 300.000 денари.​​