Наместо морална одговорност и оставки, а потоа и непристрасна истрага, партнерите во власта СДСМ и ДУИ ги гледаме како се обвинуваат помеѓу себе кој да ја преземе вината за несреќата во Тетово, во која живи изгореа 14 луѓе, истакна денеска во Собранието, пратеникот на пратеничката група на ВМРО-ДПМНЕ, Александар Велјановски.

„Зоран Заев јавно призна дека модуларната болница во Тетово е градена без одобрение за градба и без потребните статики, што се потребни за сите нормални објекти. За срамот и апсурдот да биде уште поголем, Зоран Заев ја спореди монтажната болница во Тетово, со изградба на летни тераси и кафеани. Ваквата скандалозна изјава на Заев е јасно признание со кое тој веќе досега требаше да биде повикан во Јавното обвинителство, бидејќи според тоа што го кажа, само прашање на време било кога ќе се случи некоја несреќа со болницата во Тетово“, рече Велјановски.

Тој додава дека во моментот има уште 18 модуларни болници градени на ист принцип со исти материјали кои очигледно, како што вели, се темпирана бомба и потенцијална опасност за пациентите.

Велјановски критикува дека СДСМ и ДУИ обвинувајќи се меѓу себе откриваат оти немало соодветен надзор на модуларните објекти, немало противпожарен систем за заштита, немало технички прием, немало атестирани материјали, немало ништо што би гарантирало безбедност на пациентите.

Според него, ова е надвор од сите норми и правила, и е нестручно и недоговорно работење од страна на надлежните органи.

Велјановски порача дека од сето она што досега е изнесено во јавноста, јасно е дека виновни за пропустите се токму СДСМ и ДУИ. Тој побара од Јавното обвинителство да не чека и веднаш да покрене обвиненија.

ЈП „Лајка“ вдоми кучиња од Германија, Белгија и Шведска.

Од Јавното претпријатие велат дека по успешната кампања за вдомување бездомни кучиња во нашата земја, мисијата продолжи во САД, а сега веќе и низ Европа.

„Миленикот треба да биде член од семејството и чувањето куче е сериозна одговорност. Затоа само оние кои се навистина подготвени да се посветат на истиот можат да се најдат на нашата листа на вдомувачи. Да вдомите куче од ‘Лајка’ е највисок акт на хуманост, соработка и доверба во нашата институција. Награда за нашиот труд, пожртвуваност и посветеност. Од прв ден срцето на ‘Лајка’ чука како едно на сите нас членови од тимот и секое едно куче кое го поминало прагот на прифатилиштето. Нашата работа менува судбини, спасува животи и допира до сечија душа. Нашите приказни се вистински, од скопските улици, тажни, но со среќен крај. Нашето работно време нема време за чекање, празник, нема ноќ и викенд. Кај нас секое куче станува член на нашето семејство, кое од ден на ден расте и се зголемува“, велат од „Лајка“.

Досега „Лајка“ има вдомено над 150 кучиња во земјава и во странство.

Основниот кривичен суд Скопје соопшти дека во изминатите 10 дена изработил 3.500 уверенија и потврди од Кривична и Казнена евиденција, а по барање на сите кандидати за членови на совети и кандидати за градоначалници од политичките партии, коалициите и групи избирачи, родени на територија на Град Скопје, а неопходни за учество на претстојните локални избори.

„Согласно чл. 67 ст.3 во врска со чл.7 ст.3 од Изборниот законик сите Oпштински комисии, електронски ги доставија личните податоци на кандидатите, а во рок од 24 часа судот ги изврши соодветните проверки, ги изработи уверенијата и потврдите и електронски ги достави решенијата до комисиите.

Во однос на критиките на одредени политички субјекти објавени на социјалните мрежи, ја информираме јавноста дека одделот за Казнена евиднеција во судот постапуваше по сите барања по завршување на работното време, како и во текот на викендите, пред сè затоа што голем
дел од кандидатите и општинските изборни единици ги доставуваа барањата по истек на рокот од 11.9.2021 година за пријавување на кандидати“,  наведуваат од судот.

Исто така додаваат дека судот, за овој период, доследно ги почитувал и роковите за прием, проверка и изработка на уверенија и потврди на сите граѓани чии барања не беа поврзани со изборите, па во тој правец. Од судот апелираат, согласно протоколите за заштита од Ковид-19, за потребата од воведување на електронско аплицирање и издавање на уверенијата и потврдите.