Македонија
Марш за женските права: Уште многу работа до родова еднаквост

Неколку стотици граѓанки и граѓани денеска присуствуваа на Маршот за женските права, кој започна од Паркот на жената борец во центарот на градот. Со пораки за проблемите со кои сè уште се соочуваат жените во општеството, дискриминацијата, како и нееднаквите можности, организаторите го започнаа маршот кој преку плоштадот Македонија се упати кон влезот на Старата скопска чаршија и заврши кај плоштадот Филип Втори.
Активистката Калија Димитрова истакна дека фактите и статистиките сами по себе говорат за тоа до каде е Македонија во однос на родовата еднаквост.
„На локалните избори 2017 година: од 208 кандидати за градоначалници, само 12 се жени. Повторувам, само 12 се жени. Тоа се помалку од 6 отсто! За тие во последниот ред што дофрлаат дека тоа не е родова дискриминација, туку немањето квалитетен женски кадар или, пак, ги оправдуваат партиските одлуки со мантрата дека електоратот сè уште не сака да гласа за жени, прочитајте нешто за системска дискриминација. Проверете ја сопствената привилегија, размислете за шансите што ви биле дадени во животот и потоа зборувајте за праведна распределба на јавни позиции!“, рече Димитрова.
Таа додаде дека стапката на малолетнички бракови во земјата е во пораст и во одредени делови на земјата на девојчињата не им се нудат можности да растат и да се развиваат, туку само да бидат машини за репродукција од првиот момент кога нивните тела се способни за тоа.
„Правилото е следно: само 33,8 отсто од работоспособните жени се вработени. Иако се пообразовани, најчесто се на подредени позиции. Мнозинство жени во земјава сè уште работат на најлошо платените места во текстилната, чевларската и во кожарската индустрија, како касиерки во маркети, како чистачки без никакво осигурување, безбедност и заштита на женските работнички права. Маргинализираните жени, како лезбијките, бисексуалките, трансродовите жени, сексуалните работници, Ромките, жените со попреченост, се соочуваат со насилство, социјално исклучување и масовно прекршување на нивните права. Наместо солидарност, емпатија и заштита од насилство, сексуалните работнички и трансродовите жени добиваат морализирање, стигматизирање и насилство, дури и од страна на полицијата.
Во ноември 2017 година три национални радиостаници објавија кампања за преманципираните кучки, наменета за жени што, трчајќи по пикирани кариери, ја загубиле својата женственост. „Еманципирани жени со доминантни фрустрации, освестете се, станавте мажи“, се вели во кампањата! Не постои нешто како прееманципација, исто како што не може да постои премногу слобода или премногу правда!“, додаде Димитрова.
Снешка Илиќ од здружението „Реактор“ рече дека и во 2018 година во земјата имаме највисока доенечка смртност во Европа.
„Причините за тоа не треба да се бараат кај жените, туку во системот за здравствена заштита и здравствените услуги што им следуваат, но секоја година сè повеќе и повеќе се скратуваат“, рече Илиќ и додаде дека на 80 отсто од жените Ромки им се наплаќаат прегледите што треба да бидат бесплатни.
Маршот за женските права доби поддршка и од власта како и од претставници на дипломатскиот кор во земјата и на него присуствуваа премиерот Зоран Заев со сопругата Зорица Заева, министерката за одбрана, Радмила Шекеринска, министерката за труд и социјална политика, Мила Царовска, градоначалникот на Карпош, Стефан Богоев, и други. Премиерот Заев направи и необичен гест кога ѝ го придржа мегафонот на една од учесничките во протестот, која претходно се пошегува дека мегафонот е тежок, додека таа говореше за поразителните статистики за родовата еднаквост во земјата.
К. О.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Има предлог за средба со Бугарија, треба Софија да се изјасни, рече Мицкоски

Премиерот Христијан Мицкоски денеска информираше дека е во тек комуникација со Канцеларијата на Европската комисија во земјава околу иницијативата за средба со бугарската страна, и дека веќе постои предлог-термин, за кој сè уште се чека потврда од официјална Софија.
„Имаме комуникација со канцеларијата на Европската комисија и вчера и денес, се уште немам повратен одговор. Има предлог термин, да почекаме да се изјаснат од бугарската страна“, рече Мицкоски на новинарско прашање дали стапил во контакт со претседателот на Советот на ЕУ Антонио Кошта и дали Бугарија ќе прифати ваква средба.
Паралелно со ова, претседателката Гордана Сиљановска Давкова вчера изјави дека иако вообичаено се одржуваат средби со хомолозите, таа нема проблем да разговара и со бугарскиот премиер Росен Жељазков на претстојниот Самит на НАТО во Хаг. Таа појасни дека нејзиниот бугарски колега, претседателот Румен Радев, нема да присуствува на Самитот, што отвора можност за разговор со Жељазков во насока на деблокирање на евроинтеграциите на Македонија.
„Јас за евентуална средба разговарав со господинот Антонио Кошта, негов беше предлогот. Во меѓувреме, јас не знам, ќе бидам таму ако ми е мене редот. Инаку, се знае, ред е да се разговара со хомологот, но еве нема проблем, меѓутоа не зависи од мене туку зависи од нашите соседи“, рече Сиљановска Давкова.
Македонија
ВМРО-ДПМНЕ: СДСМ грубо ја злоупотребува трагедијата во Кочани за политички поени

ВМРО-ДПМНЕ денеска реагираше на обвинувањата од страна на СДСМ во врска со истрагата за трагичниот пожар во Кочани, при што загинаа деца, обвинувајќи ја партијата дека прави „груба злоупотреба“ на трагедијата со цел собирање политички поени.
„СДС прави груба злоупотреба на трагедијата во Кочани со цел да добие политички поен плус. Обвинувањата на СДС дека институциите постапуваат под притисок на опозицијата се безочна лага,“ велат од ВМРО-ДПМНЕ во писмената реакција.
Од партијата нагласуваат дека институциите сега постапуваат професионално и неселективно, и дека во истрагата се опфатени над 60 лица, меѓу кои актуелни и поранешни функционери, градоначалници, бизнисмени, вработени во институции и членови на Министерството за внатрешни работи, а дел од нив се веќе во притвор.
„МВР и институциите на системот ги доставија сите потребни докази и информации до Јавното обвинителство уште пред еден месец. Обемната документација, со над 60 опфатени лица, е доказ за темелна и сеопфатна постапка“, стои во соопштението.
Од ВМРО-ДПМНЕ посочуваат дека постапувањето на институциите денес е спротивно на тоа што, според нив, се случувало во минатото за време на владеењето на СДСМ и Оливер Спасовски.
„Сега има одговорност за секој, без разлика кој е и од каде е. За разлика од МВР под Спасовски, каде што никој не одговараше за модуларната болница, Беса Транс или Ласкарци – случаи каде што имаше голем број жртви“, додаваат од ВМРО-ДПМНЕ.
Скопје
Арсовска: Претседателката на „Комунална“ е осудена за убиство и 3 години саботира нова опрема

Градоначалничката на Скопје, Данела Арсовска, денеска остро ја обвини Јулијана Спировска, претседателка на Управниот одбор на ЈП „Комунална хигиена“, дека ја саботира работата на претпријатието и со години опструира одлуки од витално значење за функционирањето на службите за одржување на јавната чистота.
Во своја објава на Фејсбук, Арсовска посочи дека Спировска е осудено лице за кривично дело убиство и дека, како што тврди, три години не поддржала ниту една инвестиција за нова механизација, ниту решенија за вработување на работниците кои со години работат на терен.
„Јулијана е осуден криминалец со казна затвор за убиство. Таа три години не гласа за нови камиони, за инвестициска програма, за вработените кои пет години ги чистат улиците да можат да земат решение“, напиша Арсовска.
Според неа, Спировска делува под директива на политичките партии ВМРО-ДПМНЕ и Вреди, чиј што кадар е поставен во Управниот одбор преку Советот на Градот. Арсовска директно ги обвинува овие партии дека преку Спировска ја саботираат работата на претпријатието и придонесуваат за влошување на состојбата со отпадот во Скопје.
„Јулијана по наредба на ВМРО континуирано прави опструкции додека градот не се удави во смет. Не биди ѓубре, не биди криминалец, не биди Јулијана“, додаде Арсовска.
Таа истакна дека вработените во „Комунална хигиена“ се едни од највредните работници во градот и дека заслужуваат институционална поддршка, а не, како што вели, саботажа од партиски кадри.