Македонија
Меџити: ДУИ забега, формално лидер е Ахмети, но песните ги пушта Артан

Свесен дека ќе ја плати цената за излегувањето од ДУИ и формирањето на новото политичко движење во албанскиот политички кампус, предводникот на „огнените“, Изет Меџити, во интервју за „Макфакс“ вели дека не можел да предвиди дека ДУИ може толку да забега.
„Другите се плашат и затоа посегнуваат по вакви мерки“, вели Меџити алудирајќи на ДУИ и на апсењата на Исмет Гури, како и на разрешувањето на сите оние што се одлучиле да ја напуштат партијата од позициите.
Свесен или не, како што вели, Ахмети ја плаќа цената од Груби и, според Меџити, неочекувано и разочарувачки е човек со долгогодишно искуство како Ахмети да заврши по паметот на Груби.
„Ахмети повеќе не е оној стариот. Не ја менаџира ситуацијата. Ниту по изразот ниту по вокабуларот не е ист. Тоа покажува нервоза, дека е исплашен и дека веќе не е комотен“, оценува Меџити.
На прашањето дали има шанса Артан Груби да седне на лидерската позиција наместо Ахмети во ДУИ, Меџити вели дека „и досега Груби де факто е лидер во ДУИ“.
„Ахмети му има препуштено сѐ. И власт и кадровска политика, само формално лидер е Ахмети. Песните ги пушта Артан наместо Ахмети.
Жално е тоа што го прави, за мене – не е чудно оти класен другар ми е, го познавам добро. Наместо да се занимава со тоа што му е задача, се занимава со други работи. Во сите овие 3-4 години не видовме ништо, освен овие концертите што ги организира како да води уметничко естрадно друштво. Тој и добро кога прави, лошо звучи и лошо изгледа“, вели Меџити.
Коруптивните скандали во ДУИ, според Меџити, покажуваат која е цврстата врска меѓу Ахмети и Груби и зошто Ахмети, како што вели, „по секоја цена, дури и по цена да се растури ДУИ, го држи Груби“.
Меџити појаснува дека е избран чуден тајминг во однос на апсењето на Исмет Гури и овој чин го смета како обид за пристисок и заплашување на луѓето што сакаат да заминат од ДУИ, а додава дека такви има многу и сите тие сакаат да му се приклучат на новото движење на Меџити.
„Некои за атер кон Али, други се плашат, трети тактизираат уште некое време. Но, со големо убедување кажувам дека над 90 % од тие што го носат товарот на ДУИ, размислуваат како нас“.
Потенцира дека целта со новото политичко движење, кое, според плановите, треба да го одржи својот прв конгрес во септемрви, е зајакнување на опозицискиот фронт и созадавање конкуренција.
„Тоа ќе донесе конкуренција, а не како досега кога позицијата без опозиција оди на спиење и забегува на други работи“, вели Меџити.
За уставните измени, парламентарното мнозинство, можноста од идни посилни притисоци, создавање идни коалиции и слично во интервју за „Макфакс“ со Изет Меџити, иницијаторот на новото албанско политичко движење и предводникот на „огнените“.
.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Скопје
Утре дел од Скопје без вода

Поради дефект на цевка со пречник од 100 милиметри на улицата „1 Долно Лисиче“ бб. утре од 10:00 часот прекинато водоснабдување ќе имаат корисниците од населено место Долно Лисиче.
Како што информираат од ЈП „Водовод и канализација“ – Скопје, корисниците ќе бидат без водоснабдување се до завршување на интервенцијата.
Поради изведување, пак, на водоводен приклучок од 80 милиметри на улицата „Владимир Назор“ бр.8 во населбата Водно утре од 11:00 часот прекинато водоснабдување ќе имаат корисниците од таа улица и од дел од улицата „Кумровец“. Корисниците ќе бидат без вода се до завршување на интервенцијата.
Македонија
Спасовски: Со партнерството со Словенија успеавме да бидеме пример како може соработката да се одржува, негува и продлабочува

Министерот за внатрешни работи Оливер Спасовски за време на работниот престој во Љубљана, Република Словенија, се обрати на настан под покровителство на амбасадата на Република Северна Македонија, по повод одбележување 30. години од отворањето на првата амбасада во светот по независноста и осамостојувањето на државата, а на покана од домаќинот на настанот, амбасадорот Горан Милевски, во присуство на заменик Претседателката на Владата на Република Северна Македонија, Славица Грковска, министерот за внатрешни работи на Република Словенија, Боштјан Поклукар, претставници на Дипломатскиот кор, стопанственици и претставници на верските заедници, како и сонародници-иселеници од нашата држава.
„Можам да потврдам дека изминативе години со нашето партнерство и соработка со Република Словенија ние успеавме да бидеме пример и да покажеме, не само на просторот на поранешната држава туку и пошироко – како може, кога постои добра волја и низа заеднички интереси, соработката меѓу две земји да се интензивира, одржува, негува и продлабочува примарно имајќи ги во предвид потребите на нашите граѓани, одржувајќи ги на високо ниво претходно воспоставените одлични релации. Дотолку повеќе што во сиве овие години наназад како држави и како институции споделувавме заеднички вредности”, истакна министерот Спасовски, изразувајќи посебна благодарност до Владата на Република Словенија и до словенечкиот народ бидејќи токму Република Словенија беше и остана доследен и лојален партнер на евроатлантски пат на Република Северна Македонија.
„Од аспект на работењето на министерствата за внатрешни работи на Република Северна Македонија и на Република Словенија, изминативе три децении се период на динамична и плодотворна тесна соработка крунисана со мноштво значајни билатерални договори и конкретни активности во кои што словенечката полиција е тесно инкорпорирана во речиси сите суштински реформски исчекори на македонското МВР во насока на имплементирање на сите важни европски полициски стандарди и критериуми”, рече министерот Спасовски, со уверување дека и во годините пред нас може веќе воспоставената билатерална и мултилатерална соработка преку разните иницијативи, форуми, меѓународни асоцијации, уште повеќе да се продлабочи, да се динамизира во интерес на националната, но и регионална безбедност.
Македонија
Грковска по повод 30 годишнината од дипломатските односи меѓу Македонија и Словенија: Солидарноста секогаш била и ќе остане белег на нашето цврсто пријателство

Заменичката на претседателот на Владата задолжена за политики за добро владеење, Славица Грковска, имаше обраќање на вечерашниот прием, организиран од амбасадата на Република Северна Македонија во Словенија, по повод 30 годишнината од воспоставувањето дипломатски односи меѓу двете земји и отворањето на првото дипломатско претставништво по прогласувањето на независноста на нашата држава.
„Велат пријатели требаат и во добро и во лошо. Овие три децении го потврдија нашето пријателство и покажаа дека навистина и во добро и во лошо бевме заедно и си пруживме поддршка во сите моменти кога тоа беше неопходно. Солидарноста секогаш била и секогаш ќе остане белег на нашите односи, на нашето цврсто пријателство“, истакна вицепремиерката Грковска и додаде дека токму амбасадата во Љубљана е симбол на независноста и симбол на тешкиот дипломатски пат кој го изоде нашата држава за денеска да биде полноправна членка на НАТО и да чекори по евроинтеграцискиот пат за да се придружи на големото европско семејство.
Таа се заблагодари за отвореноста на Словенија да им овозможи студирање на словенечките универзитети на голем број македонски студенти и изрази надеж дека младите кои се стекнуваат со искуство во европските земји, потоа ќе одлучат својата иднина да ја градат дома, во својата татковина, со своите семејства.
„Словенија беше и верувам секогаш ќе остане наш поддржувач и во рамките на евроинтеграцискиот процес на Северна Македонија, поддршка којашто е исклучително важна, особено во делот на спроведување на реформските процеси, со цел да ги достигнеме европските стандардни вредности. Вашето искуство за нас е непроценливо имајќи предвид дека делиме заедничко минато, а целиме и кон заедничка иднина во европското семејство“, заклучи вицепремиерката Грковска на приемот во амбасадата во Љубљана, на кој присуствуваше и министерот за внатрешни работи, Оливер Спасовски.