Миле Јанакиески ќе достави барање до Кривичен суд за да биде додаден во листата на оштетени во предметот „Таргет-Тврдина“ за нелегалното прислушкување во периодот меѓу 2008 и 2015 година, каде обвинети се поранешниот директор на УБК, Сашо Мијалков, поранешната министерка за внатрешни работи, Гордана Јанкулоска како и лица вработени во УБК. На овој начин, Јанакиески се приклучува кон прогонот на обвинетите во случајот. За него, во СЈО има над 80.000 снимки во кои се слуша како разговара со различни луѓе, а дел се и јавно објавени на прес-конференциите кои ги одржуваше СДСМ.

„ Многу логично е тој да биде еден од првите кој е во тој предмет оштетен, бидејќи Миле Јанакиески е во 90 отсто од материјалите кои се предадени во СЈО“, вели кратко адвокатот Еленко Миланов за „Макфакс“.

Освен Јанакиески, барање до судот за да биде оштетена во процесот поднела и Гордана Јанкулоска преку нејзините бранители.

„ Се додека е доказна постапка, може да се поднесе барање за оштетени во постапката. Обвинета сум во предметот „Тврдина“, а барањето е за предметот „Таргет“, вели кусо Јанкулоска за „Макфакс“.

Судскиот процес го води судијата Џенета Бегтовиќ, додека обвинението е застапено од обвинителската тројка Трајче Пеливанов, Ленче Ристовска и Артан Ајро.
Судењето по предметот „Таргет-Тврдина“ е започнато на 22 декември 2017 година и се наоѓа во фаза на доказна постапка.

Според обвинителниот акт, преку три системи за следење на комуникациите во УБК, во периодот од 2008 до 2015 година незаконски биле следени 4.286 телефонски броеви за кои воопшто не биле издадени судски наредби.

Водата од градскиот водовод во скопски Бутел нема бактерии и исправна е за пиење, а веста што се прошири на социјалните мрежи дека во примерок од водоводот се најдени три вида бактерии е лажна, велат од ЈП „Водовод и канализација“. Лабораторијата на „Водовод“ на своја иницијатива направила анализа по објавата на социјалните мрежи од минатата недела во која стои анализата од лабораторијата „Авицена“ со откриените бактерии.

Екипа од „Водовод“ пред три дена му се јавила на човекот што ја нарачал анализата во „Авицена“, која се споделуваше на социјалните мрежи. Во негово присуство екипата зела примерок од чешмата од која наводно и тој однел примерок на анализа.

„Примерокот беше земен од наш техничар во присуство на сопственикот, а во согласност со стандардите за земање примероци. Направена е бактериолошка анализа на примерокот, при што е користена Quanty tray sealer plus за брза идентификација и користена е стандардна мембранска техника со засејување селективни подлоги. Притоа, по поминатото време во контролирани услови, на подлогите не е развиена ниедна колонија, што укажува дека водата е бактериолошки исправна. Во лабораториите на Секторот за санитарна контрола направена е и основна физичко-хемиска анализа, при што е констатирана нормална состојба на параметрите, како и во претходните мерења во таа област. Врз основа на добиените резултати може да се констатира дека испитуваниот примерок е хемиски и бактериолошки исправен во согласност со критериумите дадени во Правилникот за безбедност на водата“, велат од Секторот за односи со јавност во ЈП „Водовод и канализација“.

Во исто време, од „Водовод“ велат дека направиле и теренски мерења, при што констатирано е присуство на резидуум хлор во концентрација од 0,3 мг/л, што укажувало на нормална состојба во системот. Оттаму апелираат до граѓаните да не шират лажни вести, кои предизвикуваат немир и паника, и посочуваат дека е невозможно градскиот водовод да има три вида бактерии кај само еден корисник.

Одговори за случајот со откриените бактерии во водата во наредните денови најавија и од лабораторијата „Авицена“, во која, според објавите, е направена анализата.

Објавениот резултат со откриените бактерии ги испаничи скопјани, кои пијат вода од изворот Рашче и од бунарите Нерези – Лепенец за кои од „Водовод“ велат дека се под строга контрола. Проверките и безбедносните мерки се зголемени, особено од почетокот на пандемијата од кога, како што велат од „Водовод“, се постапува како во кризна состојба.

Од претпријатието велат дека се неосновани и тврдењата дека се подготвува приватизација на „Водовод“.

Заменик-претседателот на Владата задолжен за европски прашања, Никола Димитров, попладнево во „Берлејмон“ во Брисел имаше средба и со потпретседателот на Европската комисија задолжен за промоција на европскиот начин на живот, Маргаритис Схинас.

На средбата стана збор за важноста на мисијата Фронтекс во овие моменти кога се реактуелизира прашањето на миграција. Потпретседателот Схинас изрази силна поддршка за евроинтегративниот процес на Северна Македонија, како и подготвеност за поддршка од неговиот тим во областите од неговата надлежност.

Во рамките на посетата на Брисел вицепремиерот Димитров денес оствари средби и со еврокомесарот за соседство и проширување, како и со други претставници на Генералниот директорат за соседство и преговори за проширување со Европската комисија.

На маргините на Советот за општи работи на ЕУ, кој по неколкумесечна пауза поради пандемијата, денес ги реактивира состаноците во Брисел, Димитров имаше средби и со претседавачот на Советот, германскиот министер за Европа, Михаил Рот, и со министерот за надворешни работи на Луксембург, Жан Аселборн.

Главниот акцент во разговорите беа следните чекори на европскиот пат на нашата земја вклучувајќи го усвојувањето на преговарачката рамка и одржувањето на првата меѓувладина конференција со ЕУ за време на германското претседателство.

Првата посета во седиштето на ЕУ на претставник на Владата на Северна Македонија по нејзиното формирање се случува во исклучително важен момент за Северна Македонија, во пресрет на дефинирање на преговарачката рамка и одржувањето на првата меѓувладина конференција со ЕУ, што ќе означува и официјален почеток на пристапните преговори со Унијата.

На средбите Димитров ги отвори прашањата поврзани со ИПА 3-програмата имајќи го предвид утврдувањето на повеќегодишната финансиска рамка на ЕУ 2021-2027, што е актуелно периодов. Во тој контекст се зборуваше и за подготовките за димензионирање и објавување на најавената економска програма за развој и инвестиции за Западен Балкан.