Македонија
Мицкоски до Заев: Избeри време, место и медиум, ќе дојдам таму каде што ти сакаш

Пред повеќе од 6 месеци, точно овде на платото пред Владата на Република Македонија, на 2 јуни, ВМРО-ДПМНЕ и коалицијата „За подобра Македонија“, излегоа масовно да му каже на Зоран Заев „не“, немој да го правиш, Зоране, тоа што си го наумил, со овие зборови вечерва го почна својот говор лидерот на ВМРО-ДПМНЕ на протестот на опозицијата, кој е трет по ред во серијата протести.
„Покажавме дека сме живи, покажавме дека нè има и покажавме дека повторно ВМРО-ДПМНЕ и коалицијата ‘За подобра Македонија’ ќе бидат победничката политичка сила во Република Македонија.
Пред повеќе од 6 месеци, да бидам попрецизен, стоев и велев, не верувајте ми мене ако се двоумите, ако имате каква било резерва во тоа што ви го говорам, можам да ве разберам и можам да ве оправдам, поминале и продефилирале многу лажговци овде пред вас. Многу лажговци кажувале како Зоран Заев и ветувале брда и долини, но верувајте си на самите себе и верувајте му на она што го гледате. А тоа што го гледавте тогаш, беше црнило во почеток, а денеска е црнило во кулминација.
Саде е црнила низ Република Македонија. И ќе ми речат и ќе ме прашаат – зошто токму избравте црнила, па зарем, освен овие црнила што ни се случуваат и темнина, има нешто со што можеме да се пофалиме и да речеме дека оваа ненародна влада на СДСМ со криминални гени, предводена од аболиран политичар, може нешто да направи за нашата татковина.
Дозволете ми на самиот почеток уште еднаш да ги поздравам сите оние што од разноразни причини, од притисоци на своите работни места, од закани и уцени на претпоставените номинирани од овие горе што нè снимаат шпионски од оној прозорец онаму – снимајте, снимајте, ама еден ден ќе платите за тоа што снимате.
Да ги поздравам затоа што знам дека и нивните срца се овде долу со нас, дека и тие се со нас и нè следат и нè поддржуваат. Стотици илјади граѓани во Македонија во овие декемвриски денови, без разлика дали се овде пред платото на Владата на Република Македонија или на другите плоштади, улици и булевари, во куќите, во домовите, во сокаците и маалата, знам дека ни ја даваат поддршката и дека нè има многу и ќе нè има уште повеќе сè додека не им го видиме тилот како заминуваат од таму оние шпиони што снимаат сега одозгора. Ја посипаа земјата со црнила, а народот го оковаа со омраза, со љубомора, со завист. Тоа е она на што тие се подготвени.
Наместо да владеат со проекти, со реформи, владеат со страв и притисоци. Не смееме тоа да им го дозволиме. Овој народ тоа не го дозволува и овој народ и овде и насекаде во Македонија ќе им каже едно големо НЕ на Зоран Заев и СДСМ.
Ветуваа живот, драги сопатници, браќа и сестри, ветуваа живот дека ќе донесат во Република Македонија, а донесоа црнила, донесоа чемер и јад во домовите на нашите сограѓани.
Ништо не се мрда, камен на камен не оставија, национално нè омаловажија, ни го уништија достоинството. Го убија Македонецот во Македонецот. Но, нема да се предадеме затоа што Македонецот на Македонецот е Македонец, бил со векови и ќе остане колку и да пишете колку и да бришете. Колку и да снимате од таа вистина, нема бегање и нема да ви дозволиме да избегате.
Зошто црнила? Ќе почнам од оние што овие денови се најактуелни, а тоа се докторите. Зошто токму докторите? Им ветуваа, сетете се – 100.000 денари просечна плата. Од 100.000 денари нема ништо. Уште една голема лага на овие нечесни политичари.
Потоа, им ветуваа линеарно покачување на платите и добија симболични 5 проценти. Но, веднаш овој човек што себе си треба да се нарече градски татко, потрча и тие 5 проценти да им ги скрати, па им го зголеми паркингот за нивните работни места во Клиничкиот центар за да си ги вратат парите што им ги дадоа. Па вакво лажење нема никаде. Ваков ни Минхаузен не бил.
Им ветуваа на матичните лекари, им ветуваа на стоматолозите зголемена капитација, зголемена од таа што ја имаа. Нити зголемена капитација ниту нешто што претходно го ветуваа. Напротив, и тоа што го имаа на времето, и тоа им го зедоа.
Затоа, едно големо „уааа“ за таа лага.
Младите секој ден ја напуштаат Македонија затоа што се чувствуваат излажани, манипулирани, затоа што им ветуваа т.н. младинска гаранција, им ветуваа студентски град, им ветуваа перспектива и фер шанса за сите. Не само што не добија туку нема ни надеж за да се добие бидејќи тие се зафатени со промена на името и промена на идентитетот, немаат време за младите.
Денеска го слушам, само да се завршело ова и веќе во јули ќе ни тргнело, не сега од јануари, од јули ќе ни тргнело. Па ги искара бизнисмените, им рече – вие треба да одите напред, Европа била таа што ќе нè научела. Не, бре, ние треба да се европеизираме за Европа нам да ни подаде рака. Со криминалци во Владата, со криминалци во јавните претпријатија и министерствата што вие ги именувавте нема Европа. Европа бара честити луѓе и искрени луѓе, вредни луѓе и луѓе што работат, а не луѓе што на својата нација ѝ велат дека е комплексирана нација, дека е нација без свое јас. Нема така во Европа. Во Европа мора да сме честити, вредни и чесни, што е најважно – сè она што не сте вие СДСМ и Зоран Заев.
Изминатиот период остварив многу средби со бизнисмени. Посетивме неколку стопански комори, разговаравме за реалните проблеми на бизнисмените, на економските оператори, на реалниот сектор. Единствен и заеднички именител е дека никогаш не било потешко и едвај мака мачат од први до први да скрпат. Црнила донесоа и во економијата. Им ги зголемија даноците, па сега лажат преку оној малечок министер за финансии дека ова било робинхудски пристап, ќе земле од богатите, од тие што имаат, па ќе дале на сиромашните, а притоа не кажуваат дека ќе ги даночат земјоделците. Дека не само што ќе ги даночат туку и сето она што го имаат дома досега, и тоа ќе им го земат. Зарем такви луѓе ја заслужуваат довербата на граѓаните?
Освен црнила, порази и уништување, ништо друго не ни донесоа во Република Македонија по една и пол година Влада, а претходно учествуваа повеќе од една година во техничката влада. Зарем на овие луѓе треба да им се верува? Јас повеќе не можам да им верувам ниту една секунда од мојот живот.
Ве повикувам масовно сите граѓани во Република Македонија, без разлика на етничката, без разлика на верската припадност, да ни се придружите и да застанете рамо до рамо со нас. Што побргу заминат, толку побргу ќе ѝ се раздени на Македонија и ќе изгрее зората.
Ќе речат правеле реформи во судството,на ранг листата сме 112-та земја според „Транспарентност интернационал“, Танзанија и Етиопија се пред нас. Ќе речат нè носеле во Европа. Не Европа, Африка ја донесоа во Македонија. Ете тоа направија од европска Македонија, афричка Македонија според степенот на корупција што владее во моментот во Република Македонија.
За пензионерите ветуваа зголемени пензии, ветуваа дека 5 отсто секоја година ќе ги зголемуваат и тие што ги даваат, не ги исплаќаат онолку колку што треба. Црнила и за пензионерите. Сега им сметале луѓето, сакале и работниот век да го продолжат, што помалку време да имаат во своите најубави години од животот. И тоа нема да го дозволиме. Првата седница на новата влада кога ќе ја формираат ВМРО-ДПМНЕ и коалицијата „За подобра Македонија“, ВМРО-ДПМНЕ и таа влада ќе ги укинат даноците и ќе ги зголеми пензиите.
Што прават? Прават фингирана дебата за уставните измени. Не ја почитуваа волјата на граѓаните јасно изразена на референдумот. Не ја почитуваа таа волја и одлучија по насилен пат да фингираат дебата во градовите низ Република Македонија, па да поканат граѓани во Република Македонија со привремен престој со поинаква боја на кожата. Да им аплаудираат дека она што го прават е добро за Македонија и Македонците. Нема кој да им каже „не“ затоа што канат експерти што му аплаудираат и што го тапкаат по рамото. Од тоа, Зоране Заев, немаш фајде нити ти нити граѓаните на Република Македонија. Тоа е лажно тапкање, ја губиме државата. Македонија ни оди во неповрат, народот си оди, бизнисот е разочаран, црнила и темнина на улиците и во сокаците. Не може вака, доста ги слушаш тие што те тапкаат. Те лажат, ќе ја изгубиме државата и после нема кој да нè оправи, затоа престани, доста е, овој народ тоа ти го кажува. Доста е.
И во пауза при распродавање на нашиот идентитет, нашето национално достоинство и гордост, ќе тргнат малку против ВМРО-ДПМНЕ. Зошто им пречи ВМРО-ДПМНЕ, затоа што знаат дека доаѓа денот кога народот заедно со ВМРО-ДПМНЕ ќе им пресудат за сето ова што ѝ го прават на својата татковина, за целокупната пљачка, криминал, национално достоинство, кое се губи, и ја парчосуваат парче по парче Република Македонија. Тоа нема да ви го простат граѓаните на Република Македонија, треба да сте свесни за тоа.
Ќе речат, ајде да го реформираме судството. Еве каква реформа направија. Два примера ќе ви кажам, доволно се, не треба повеќе. Бараме владеење на право, бараме криминалот да биде казнет. И ние го бараме тоа. Секој што згрешил пред законот треба да одговара. Но, што направија. Именуваа директор на Академијата за судии и јавни обвинители, онаа Академија од каде што треба да произлезат идните кадри, јавни обвинители и судии, Наташа Габер-Дамјановска, сестрата на Виктор Габер, долгогодишен дипломат од редовите на СДСМ, советник на Зоран Заев и човекот што го води телото кое преговара со Грција за нашата историја, нашата археологија и нашето образование. Ќерката, пак, е државен секретар во Секретаријатот за европски прашања, номинирана од СДСМ, мајката во Советот на Град Скопје како кадар на СДСМ. Партија, дипломатија, судство, така ли ќе го реформирате судството, тоа ли е начинот?
Минатата недела цела македонска јавност знаеше дека Лорета Георгиева ќе биде избрана за нов член на Судскиот совет. А зошто? Затоа што таа е сопруга на човекот што е приватно близок со Зоран Заев. Сите тоа го знаеја. Оној Судски совет што треба да ја оценува работата на судиите во Република Македонија, токму тој Судски совет, таму членува Лорета Георгиева. Затоа им е битно, затоа што нема кој после да им го отвори „евро за евро“ и случајот „Поткуп“, нема кој да го отвори „Глобал“. Сите ќе мора да молчат и да му се подведуваат на монархот. А кој е монархот? Монархот е оној што нив ги именува таму, Зоран Заев. Ние тоа нема да го дозволиме. Такво судство не ни треба.
Па, ќе воскреснат закон за специјалното јавно обвинителство, закон што никој не го видел во државата, никој не го видел како изгледа. Министерството за правда, каде што имаат монопол, ќе го закачи и ќе бара јавна дебата. Ќе приготват монархистички закон за да може секој оној неистомисленик да го казнат, да го осудат и ако малку ги критикува и ако зборува против нив и нивните политики, да го пратат во притвор, во затвор, затоа што само така тие се научени да владеат. Со страв и притисоци, а не со проекти и работа.
Не сме против правдата, ние сме против злоупотреба на институциите, против трговија со правото и правдината. Ние сме за нова независна обвинителска институција, која ќе биде уставна, а не како оваа неуставна, која ќе го истражи целокупниот криминал од минатите влади, но и од оваа Влада и овој скандал со прислушување на обвинителите и судиите, кој ни се случи, црниот „Вотергејт“ на Заев и на Спасовски. За таква институција сме ние, институција што ќе ги отвори сите тие случаи и ќе ги казни затоа што тие мора да ја добијат заслужената правдина.
Ќе продолжиме, почитувани сопатници, браќа и сестри, да протестираме овде пред платото на Владата. Но, знам дека и голем дел од вас е дома, нè поддржува. Јас ве повикувам сите, младо, старо, машко и женско, да ни се придружите. Македонци, Албанци, Турци, Срби, Бошњаци, Роми, Власи и простете оние што не ги споменав. Придружете ни се со нас и марширајте рамо до рамо. Сочувствувајте со нашата болка, да се обидеме, да го спасиме она што остана од Македонија, да остане за да не отиде во неповрат. Да го спасиме македонското во Македонија. Да го спасиме она на што сите најмногу се гордееме, а тоа е македонското име и македонскиот идентитет. Застанете рамо до рамо со нас.
Но, ќе продолжиме да протестираме и да бараме сè додека не дојде конечниот пораз на оваа Влада и јас овде ќе ги повторам оние 6 наши барања.
Првото барање – веднаш неотповиклива оставка на Оливер Спасовски поради целиот криминал, поради сите оние неразјаснети убиства, поради сите оние мафијашки пресметки, поради сето она што го нарачуваш и оперативно го спроведуваш, поради сите претреси на нашите браќа и сестри во нивните домови рано наутро во 5 часот, поради сите омаловажувања пред нивните деца и трауми што ги доживуваат. Зошто? Затоа што ѝ дале поддршка на ВМРО-ДПМНЕ и затоа што излегле да протестираат против вас, хунто една. Затоа бараме, прво, неотповиклива оставка од Оливер Спасовски.
Второ, веднаш неотповиклива оставка на оној министер за надворешни работи поради сите понижувања и национални омаловажувања што ни ги приреди. Но, најмногу поради тоа што нè нарече комплексирана нација. Нацијата што лебот му го дала. Нацијата што ги школувала и него и неговото семејство – веднаш неотповиклива оставка.
Трето, веднаш повлекување на законот за зголемување на даноците. Не ги опфаќа законот за зголемување на даноците само оние со повисоки примања. Ги опфаќа и земјоделците, и економијата, и бизнисот и професорите и сите оние што се со договор на дело затоа што нема веќе да биде 10 проценти, туку ќе биде многу повеќе. Затоа, доста го лажете својот народот и веднаш повлечете го законот за зголемени даноци. Тоа е нашето трето барање.
Нашето четврто барање – велевте почист воздух. Ајде вистински да донесеме почист воздух на долг рок. Вратете ја назад гасификацијата и откажете се од оние мерки со кои секој ден го лажете народот, од оние мерки што предвидуваат бележење на возилата како во апархејдот. Доста е. Не може повеќе на ваков начин да се однесувате со сопствените граѓани. Тоа е нашето четврто барање.
Петтото барање е веднаш формирање комисија што ќе ги анализира, систематизира и преслуша разговорите што се резултат на црниот „Вотергејт“ на Заев, прислушувањето на јавните обвинители и судиите. Веднаш сторителите и нарачателите да одговараат за ова.
Шесто, да се почитува волјата на народот јасно изразена на референдумот на 30 септември.
И сосема на крај, ова директно и само за Зоран Заев. Минатиот пат те повикав, одби да излезеш на дуел пред референдумот. Ајде сега пред Нова година јас и ти, очи во очи, пред целата македонска јавност.
Ајде јас и ти. Но, викни ги најпрвин на помош оние наши поранешни браќа и сестри што застанаа рамо до рамо со тебе во битката против ВМРО-ДПМНЕ, да те брифираат за вмровските работи. Ќе зборуваме и за тоа, ама ќе зборуваме и за сето она што ѝ го приреди на нацијата, за сите лаги, за сите недостоинствени политики, јас и ти, очи во очи, пред македонските граѓани, па тие нека судат и нека пресудат кој е во право. Немој овој пат да се криеш.
Избeри време, место и медиум, ќе дојдам таму каде што ти сакаш и каде што ти ќе кажеш.
Тие создаваат црнила, ние ќе создадеме зора што ќе ги победи тие црнила. Ќе ми речат оние душегрижници, оние скапо платени со жолтици експерти, таканаречени пера новинарски: само критикуваш, а не нудиш решенија.
Ќе понудиме решенија, и тоа многу бргу. Но, најпрвин мора да ги потсетиме за тоа што го ветија, за тоа што го излажаа, било и да не се повтори.
Ве поканувам, в недела, во Велес, со почеток во 13 часот, да продолжиме за Македонија затоа што Македонија мора да оди напред“, повика Мицкоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
На Светскиот ден на учителите МОН започнува кампања за истакнување на нивната незаменлива улога во општеството и поголема почит од заедницата

Со старт на кампања за подигнување на јавната свест за суштинската важност на знаењето и незаменливата улога на наставниците во општеството, Министерството за образование и наука го одбележува 5 Октомври – Светскиот ден на учителите. Почетокот на кампањата насловена „Магијата е во знаењето“ беше означен со две тематски панел дискусии посветени на институционалниот пристап кон образованието, статусот на наставниците, нивните предизвици и потреби, како и начинот на кој општеството ги вреднува нивната посветеност и влијание.
Во присуство на 100тина претставници на академската и наставничката заедница, министерката за образование и наука проф. д-р Весна Јаневска, претставничката на УНИЦЕФ во Македонија, Лесли Милер, деканката на Педагошкиот факултет „Св. Климент Охридски“ во Скопје и претседателката на Сојузот на просветни работници на Македонија, Лидија Николовска-Георгиевска испратија порака дека токму наставниците се херои на нашето време. Тие не носат наметки, но секојдневно, со љубов, трпение и посветеност, ја создаваат вистинската магија – ја пренесуваат светлината на знаењето кон младите.
Честитајќи им го празникот празник на сите просветни работници, министерката Јаневска им порача дека се исклучително важни во обликувањето на иднината на нашите деца и на државата и токму затоа институциите заедно со партнерските организации се трудат да го подобрат нивниот општествен и економски статус и да го вратат дигнитетот на наставничката професија.
„Да бидеш наставник не е само обична професија. Наставникот е човекот кому родителите му го доверуваат највредното што го имаат, за да му ја обликува иднината, односно да му пренесе знаења и вештини кои се применливи, во чекор со времето, со науката, технологијата и потребите на пазарот на труд. И токму тука почнува улогата на образовните политики кои треба да обезбедат подготвен, мотивиран наставник, со морален и интелектуален авторитет, кој ќе успее да ја стекне довербата на учениците, да ги интригира и да им овозможи да го реализираат полниот потенцијал“, рече Јаневска.
Посочи дека Владата ќе продолжи посветено да ја поддржува наставничката заедница и да отвора нови можности за нивен, но и за развој и напредок на македонскиот образовен систем.
„Ќе потсетам дека во изминатите 15 месеци, платите на наставниците во училиштата пораснаа за 12%, на универзитетските професори за 14%, овозможивме кариерен напредок во звања советник и ментор и на наставниците и на стручните соработници. Спроведовме бројни обуки за професионална надградба и значително ги подобривме условите за работа со вложени над 67 милиони евра во унапредување на образовната инфраструктура“, потенцираше министерката, додавајќи дека ова се политики кои носат просперитет и подобри времиња за наставниците во Македонија и ќе продолжат да се имплементираат и надградуваат.
Во рамки на првиот настан од кампањата „Магијата е во знаењето“, Министерството за образование и наука и Сојузот на просветните работници на Македонија ги доделија и признанијата „Просветен работник на годината“ за учебната 2024/2025 година, кои, како што беше истакнато, претставуваат чин на јавно признание, но и симбол на поширока заложба за градење општество кое активно ја поддржува и вреднува улогата на воспитувачите, наставниците и стручните соработници.
Признанијата ги добија Елеонора Костоска Јованоска – воспитувач во ЈОУДГ „Наша Иднина“ во Прилеп, Фросина Ангелова – педагог во ЈОУДГ „Мајски цвет“ во Скопје, Сузана Ќелешоска – наставник по одделенска настава во ОУ „Мурат Лабуништи“ с. Лабуништа во Струга; Наташа Тодоровска – наставник по одделенска настава во ОУ „Ѓорѓи Сугарев“ во Битола, Маја Митевска Поцева – наставник по одделенска настава во ОУ „Браќа Миладиновци“ во Пробиштип, Павлинка Вељаноска – наставник по музичко образование во ОУ „Гоце Делчев“ во Неготино, Милица Патраклиева – наставник по географија во ОУ„Лазо Трповски“ во Скопје. Аница Б. Златевска – психолог во ОУ „Коле Канински“ во Битола и Јасмина Денковска – наставник по информатика во СОУ Гимназија „Гоце Делчев“ во Куманово.
Освен пораките што преку медиумите и социјалните мрежи ќе се споделуваат за важноста на наставниците и на знаењето кое го пренесуваат, во рамки на кампањата ќе се реализираат и повеќе стручни собири, панел дискусии и работилници низ кои МОН ќе допре до секој ученик, родител и наставник, а сите заедно ќе го вратиме сјајот и достоинството на најважната професија.
Македонија
(Видео) Цаневска: Кога вложуваме во училиштата, вложуваме во иднината на Скопје

На Денот на просветните работници, носителката на советничката листа за Град Скопје, Катерина Цаневска, порача дека образованието е темелот врз кој се гради напреден град и дека иднината на Скопје се создава преку училиштата, наставниците и младите луѓе.
„Денес не сме тука само да им честитаме на наставниците, туку и да зборуваме за она што е суштината на секое напредно општество – образованието. Скопје ја гради својата иднина преку училиштата, преку наставниците и преку младите кои секојдневно учат и создаваат“, изјави Цаневска.
Во рамки на програмата „Образование и можности“, Цаневска најави повеќе проекти кои го ставаат образованието во центарот на развојот на градот. Еден од клучните приоритети е изградбата на нова гимназија во Општина Аеродром, општина со над 80.000 жители, која засега нема ниту едно средно училиште од тој тип.
„Новата гимназија ќе биде современо, енергетски ефикасно и пристапно училиште, со спортска сала, социјални простори и услови за вистинско образование од 21. век“, рече Цаневска, додавајќи дека тоа ќе биде инвестиција која ќе го поддржи растот на младата популација во овој дел од градот.
Во првата фаза од програмата „Образование и можности“, фокусот ќе биде ставен на:
• реновирање и опремување на постојната училишна инфраструктура,
• модернизација на наставните методи,
• воведување нови наставни содржини,
• поддршка на неформалното образование преку ревитализација на Планетариумот во Младинскиот културен центар.
Цаневска најави и зголемување на поддршката за младинските иницијативи за 300%, потенцирајќи дека младите не се само иднината, туку и сегашноста на градот.
„Во следната етапа ќе воспоставиме мрежа на младински центри во сите општини на Скопје, каде што младите ќе можат да се развиваат, поврзуваат и креираат заеднички проекти. Ќе развиваме партнерства меѓу училиштата и локалниот бизнис сектор, за наставата да се поврзе со реалниот живот преку менторски програми, практична обука и кариерно насочување“, објасни таа.
Во долгорочната рамка на програмата, визијата предвидува дигитална трансформација на наставата, изградба на нови училишта во брзорастечки населби и создавање на програмата „Млад граѓанин“, преку која младите ќе имаат активно учество во процесите на одлучување и креирање на градските политики.
„Кога вложуваме во училиштата, вложуваме во поконкурентна економија, во повисок квалитет на живот, во култура и во заедница што дише подобро и живее подобро“, истакна Цаневска.
Таа додаде дека 5 октомври е ден кога треба да им се оддаде признание на наставниците – „срцето на градот“ – но и ден кога сите треба да се обврзат дека ќе продолжат да создаваат град кој го вреднува нивниот труд и обезбедува еднакви можности за секое дете, без разлика каде живее.
„Скопје што вложува во своите училишта и ученици – вложува во сопствената иднина“, заврши Цаневска.
Македонија
Герасимовски: Поставуваме пристапни рампи во секој новоизграден објект, се грижиме за сите граѓани

Кандидатот за градоначалник на Општина Центар од редовите на СДСМ Горан Герасимовски, синоќа беше со жителите на Кале кадешто дискустираа за проектите што треба да се реализираат во новиот мандат. Граѓаните кои живеат на Кале му се заблагодарија на Герасимовски за поставувањето на ново игралиште кадешто децата и младите од оваа населба рекреираат и спортуваат.
Герасимовски, информираше дека за четири години инвестирани се над 13 милиони евра во Центар за подобрување на условите во градинките, во училиштата, за реконструкција на улици, за вложување во младите, за реконструкција на повеќе од 24 улици.
Тој, најави нови мерки со кои продолжува прогресот на општината.
„Еден од главните приоритети во новата програмата е изградба на нова градинка во близина на Клиничкиот центар, кадешто обезбедуваме простор за вработување на околу 25 воспитувачи. Планираме и набавка на две цистерни и пет метларки за да го подигнеме капацитетот на хигиена во сите општини. Во план е поставување на пристапна рампа за лицата со попречености во секој новоизграден објект, со ова покажуваме грижа кон сите граѓани. Како една од новините, исто така е и обезбедувањето на бесплатен училишен оброк за учениците во целодневна настава“, рече Герасимовски.