Македонија
Мицкоски: За да останат на власт, отстапија и прифатија сè, невозможно ќе биде да се исправат нивните грешки

Претседателот на ВМРО-ДПМНЕ, Христијан Мицкоски, изјави дека тоа што се случува со Бугарија е нешто за што како партија предупредувале дека ќе се случува.
Тоа што вознемирува, рече Мицкоски, е фактот дека оваа Влада и покрај сите отстапки и покрај сето она што беше побарано од неа, практично сè отстапи и сè потпиша во интерес на зачувување на своите лични фотелји. Мицкоски рече дека новата Влада на ВМРО-ДПМНЕ нема да може да ги исправи грешките што ги направила оваа Влада.
„Гледаме дека другата страна и покрај сето тоа, влегува во еден таканаречен конфликт, кој би го ставил на ниво на една студена војна помеѓу двете држави бидејќи, колку што разбрав, амбасадорот на нашиот источен сосед не е во државава, односно го задржале таму, не го вратиле назад, односно не е дојден тука, каде што треба да ја извршува својата амбасадорска позиција. И тоа го правдаат властите во Софија како револт поради оној настан што се случил во Охрид. Тоа е така затоа што кога едната страна попушта сè, коленичи, витка ‘рбет, а другата страна практично добива сè, таа страна, во случајов Бугарија, мисли дека природно нејзино право е да добие сè што ќе побара и на тоа предупредувавме изминатиот период дека тоа не треба да се случува, но, за жал, имаме политички аналфабети криминалци и корумпирани политичари, кои буквално, за да ги задржат своите позиции и да може уште некој тендер во четири очи да добијат, подготвени се сè да проголтаат. Но, се разбира, на товар на македонскиот народ, македонскиот идентитет и македонските граѓани“, вели Мицкоски.
Тој ги обвини властите дека функционираат како аналитичари.
„И Владата и Стево Пендаровски седат и прават анализа, па ќе го слушнете Стево Пендаровски како ќе ви каже дека ова било некаков си заговор, дека овие се некои тајни служби, надворешни влијанија и фактори за дестабилизација на Македонија, а притоа ниту едните ниту другите, по состанокот што го имаа, Советот за безбедност кај Пендаровски, не излегоа кои се тие странски служби, кои се тие странски фактори за влијание, кои се практично луѓето што сакааат да ја дестабилизираат Македонија? Знаете, тие добиваат плати, ги уживаат привилегиите затоа што народот ги плаќа да даваат решенија, да даваат одговори на прашањата, а не како аналитичари да коментираат“, истакна тој.
Мицкоски додаде дека властите првин почнале со тезата прогласување персона нон грата, па потоа се повлекле.
„Чекаат да дојде 4 февруари, па да се случат инциденти и тие луѓе да предизвикаат и провоцираат и од маргинални политичари, буквално естрадни политичари, да претворат политички тешкаши, сега со овие пинг-понг изјави во јавноста, овој Џамбаски, како се викаше овој европскиот политичар, како му беше презимето, од што не знае што да направи, повеќе буквално како циркузант во естрада се однесува за да добие некој политички поен повеќе на темата ‘мрази ги Македонците’, ‘навредувај ги Македонците’, ‘мрази ја Македонија’ итн. И што направија тие со тоа, буквално ништо. Ете тоа се тој театар и естрада, во која ја претвораат политиката во Македонија.
Ова нивно килаво однесување, кое претпоставувам е резултат на нивната огромна корумпираност и заштита на криминалот за да останат уште некој ден, некоја недела, некој месец на тие позиции за да може на грбот на овој народ да се богатат и се подготвени сè да проголтаат. Па дури и народот да го жртвуваат, па дури и иднината на народот да ја жртвуваат, само за да може тие уште некој ден да останат таму каде што се.
Јас сум навистина згрозен и очекувам што побргу да излеземе на предвремени парламентарни избори и да може народот гласно да зборува, а јас сум убеден во тој резултат и во огромната победа на ВМРО-ДПМНЕ и коалицијата што ќе ја предводи ВМРО-ДПМНЕ. Следната влада на ВМРО-ДПМНЕ ќе има тешка задача, но и невозможна, да ги исправи сите грешки што оваа криминална и корумпирана Влада на ДУИ, поддржана од СДСМ, ги направи“, порача Мицкоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Пензионерката која го искара премиерот во маркет е активистка на ВМРО-ДПМНЕ

Пензионерката која го искара премиерот Димитар Ковачевски за високите замрзнати цени е Ацка Станишева, активистка на ВМРО-ДПМНЕ. Таа денес го застана премиерот додека пред камери пазаруваше и ги проверуваше цените и го праша кој може да преживее со 12.000 денари со цени како денешните.
Дека станува збор за активистика на ВМРО-ДПМНЕ укажуваат низата фотографии објавени на профилите на опозициската партија, а кои се однесуваат на Општина Карпош. Учествувала на партиски состаноци, како и на протести. Пензионерката, фотографија има и со претседателот на ВМРО-ДПМНЕ Христијан Мицкоски. Таа доби јавна поддршка. „Макфакс“ се обиде да исконтактира со неа, но таа не одговори на нашите пораки.
Од јавно објавените фотографии, може да се види дека Станишева била вклучена во кампањата на ВМРО-ДПМНЕ за локалните избори во 2021 година. На тоа укажуваат објавите на Оливер Зафировски, кој се тркаше да стане градоначалник на Карпош како кандидат на ВМРО-ДПМНЕ. Таа одела од врата на врата и делела промотивен материјал со слоганот „Создади нова иднина“ и „За модерно Скопје“.

Фотографии со ликот на пензионерката објавени на фејсбук страницата на кандидатот Зафировски од ВМРО-ДПМНЕ

Фотографии со ликот на пензионерката објавени на фејсбук страницата на кандидатот Зафировски од ВМРО-ДПМНЕ
На социјалните мрежи, осамна и фотографија од Станишева и лидерот на ВМРО-ДПМНЕ Христијан Мицкоски, а фотографирани пред ЕУ инфо центарот.
Доколку името на пензионерката се впише на „Фејсбук“ и таму излегуваат фотографии со нејзиниот лик, а зад неа, знамиња од ВМРО-ДПМНЕ. На профилот има и споделени фотографии од митинзи на опозициската партија.
„Макфакс“ побара став од Станишева, дали на ист начин и со исти прашања кои ги имаше за Ковачевски, би пристапила ако на негово место беше Христијан Мицкоски или Никола Груевски. Дополнително прашавме, Дали навистина ја мачела проблематиката за која зборуваше или поради политички причини застанала да дебатира со Ковачевски. До моментот на објавување не добивме одговор.
Македонија
Коњановски бара одговорност од директорката на училиштето каде врз ученичка падна дел од таванот

Директорката на средното медицинско училиште „Д-р Јован Калаузи“ од Битола, Наташа Илиева претпладне ја извести општината, дека утрово во 8.00 часот, паднал таванот во училишните тоалети, за подоцна, Илиева, на прашање од градоначалникот да потврди, дека при падот на таванот била незначително повредена ученичка од училиштето.
Градоначалникот Коњановски, веднаш по добивањето на информацијата, формира општинска комисија со која извршија увид во училиштето, со цел констатирање на состојбата.
При извршениот увид, директорката Илиева информираше дека, тоалетите пред неколку години беа реконструирани со донација, а последниве денови биле воочени проблеми на горниот кат, проследени со извесно прокапување.
Комисијата изготви записник во кој ја констатира состојбата, а градоначалникот Коњановски, го контактираше семејството на повредената ученичка, при што беше информиран дека, ученичката е исплашена и со родителите е во Клиничка болница, каде се прават испитувања поради болки во раката. Коњановски, останува во контакт со семејството, а од директорката Наташа Илиева побара одговорност, поради навремено непреземените мерки и непријавениот проблем.
На крајот на минатата година, од страна на градоначалникот на општина Битола, беа повикани, директорите на училиштата, со цел да укажат на потребите за реконструкции и интервенции, кои ги имаат објектите.
Од страна на директорката Илиева, не беше побарана интервенција од општината за објектот на средното медицинско училиште.
Македонија
Пеце Суперхикс ја повлече објавата за тепањето на син му: Алармот е вклучен

Музичарот Петар Младеновски, познат како Пеце Суперхикс, посочува дека алармот на институциите е вклучен, откако објави дека неговиот син бил нападнат во Капиштец. Од МВР за „Макфакс“ потврдија дека добиле пријава пред два дена. Младеновски кажа дека ја тргнал објавата од социјалната мрежа „Фејсбук“, поради негативни коментари, навреди, генерализирање и поистоветување на сите штитеници со криминалци или насилници, повици за напади, и ширење на лаги.
„Надлежните и одговорните се запознаени. Алармот е вклучен! Случајот е пријавен (полиција, инспектори за малолетна деликвенција итн итн) сѐ е документирано и очекуваме како семејство реакција од сите засегнати (Домот, Минис.за труд и социјала, МВР, Општината можеби со некаква иницијатива или слично). Искрено се надевам дека овие (сите) деца ќе бидат на некој начин подобро згрижени. Но, не можеме да дозволиме ова да се премолчи и повторува катадневно! И за Нив и за Нас!“, напиша Младеноски.
Од МВР за „Макфакс“ велат дека случајот е приајвен пред два дена, нешто по 21 часот.
„Ве известуваме дека на телефонскиот број 192 на 26.03 во 21.35 е пријавен напад на малолетник од неколку малолетници, по што од страна на полициски службеници е излезено на лице место, каде е затекнат П.М., татко на нападнатиот малолетник, кој во разговор со полициските службеници појаснил дека малолетниците му го одзеле баскетот на неговиот син и дека се откажува од пријавата во полиција“, велат од МВР.
Малолетно момче било нападнато во паркот „Капиштец“ во неделата додека играло кошарка.