Македонија
Мицкоски: По подолго време, да слушнам нешто разумно од Пендаровски, граѓаните да одлучат на референдум за иднината на Македонија

Морам да признам дека по подолго време, првпат можеби сме на иста бранова должина со Пендаровски, во таа насока и јас размислувам да излезам со формулација на прашањето пред Извршниот комитет, но и пред граѓаните. Но, и очекувам Пендаровски потоа да ги повика и другите политички партии во Македонија доколку таа биде суштината на прашањето и да излезат на референдум, рече претседателот на ВМРО-ДПМНЕ, Христијан Мицкоски, од Кавадарци одговарајќи на прашање за изјавата на Пендаровски во врска со формулирањето на прашањето за референдум.
Мицкоски додаде дека тој е пријатно изненаден од ставот на Пендаровски бидејќи е позитивен за референдумското изјаснување. А референдумот претставува највисок чин на демократијата во една држава.
„Граѓаните да одлучат дали сакаат вака асимилирани, бугаризирани, под диктат, да имаат европска иднина или, пак, горди, достоинствени, кога за тоа ќе се создадат услови во блиска иднина, да имаме европска иднина. Европската иднина и желбата на граѓаните, но и на политичките субјекти, никогаш не биле во прашање и немало дилема, туку само патот. Е, сега, за жал, оваа криминална Влада, за практично да добие условно амнестија од меѓународната заедница за криминалот што го прави, нема проблем да распродава и да задоволува определени бирократи во нивните барања. Но, мислам дека се движиме во правилна насока и еве ова што го кажа и Пендаровски, во таа насока да им дадеме на граѓаните можност да одлучат каква да биде нивната европска иднина, дали ваква каква што ја нуди власта на СДСМ и ДУИ или горда и достоинствена“, порача Мицкоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Пожар меѓу селата Долно Соње и Добри Дол

Од Центарот за управување со кризи информираат дека преку Е-112 била добиена пријава за пожар помеѓу с.Долно Соње и с.Добри Дол во Општина Сопиште.
Од ЦУК појаснуваат дека гори смрека.
Веднаш била известена Бригадата за противпожарназаштита БППЗ на Скопје.
„Воздухопловна поддршка на пп силите на земја се трите пп авиони на ДЗС“, велат од ЦУК.
Македонија
Кај „Треска“, место 12.500, ќе има над 33.000 жители, Уставен одби да го преиспита планот

Згасна и последната надеж на жителите на Центар за спречување на бетонизацијата на местото на поранешната фабрика „Треска“ оти Уставниот суд ја отфрли иницијативата за оценување на уставноста на важечкиот урбанистички план, кој предвидува изградба на згради – наполитанки и има низа неусогласености со Генералниот урбанистички план за Скопје. Граѓаните и експертите имаа низа забелешки за планот, но без оглед на тоа, неговата реализација почна и веќе се изведуваат првите згради.
Од граѓанската иницијатива „Шанса за Центар“, кои заедно со адвокатката Сузана Јошевска ја поведоа иницијативата пред Уставен суд, сега велат дека случајот на „Треска“ покажа оти Устав се менува, но ДУП никако.
„’Треска’ тресна на Уставен! Уставниот суд, без расправа и повикување експерти, ја отфрли иницијативата за оценување на уставноста на планот за Буњаковец, во кој спаѓа и просторот на ‘Треска’. За жал, се потврди правилото ‘Устав може да се смени, ама ДУП никако’. На здравје нека се во Буњаковец:
⚫ над 1 милион квадратни метри изградена бруто-површина за домување наместо 400.000, што ги дозволува ГУП;
⚫️ над 60 % изграденост за домување наместо 22 % колку што дозволува ГУП;
⚫️ над 33.000 жители наместо 12.500 колку што дозволува ГУП;
⚫️ над 9.300 просечен број на семејства наместо 3.400 колку што дозволува ГУП;
⚫️ 0,36 квадратни метри зеленило на жител или ич;
⚫️ густина на изграденост со планираните висини со кои не се обезбедува минимален стандард за нормално хумано живеење или доволна аерација и минимални 2 часа осончаност;
⚫️ уште подолги листи за чекање за запишување во градинка, училишта…
На здравје нека се ‘наполитанките’“, реагираат од граѓанската иницијатива „Шанса за Центар“.
Иницијативата за преиспитување на планот беше поднесена во јули годинава кога веќе беше извесно дека некои од зградите ќе се изградат, а целта беше да се запрат оние објекти што сè уште немаат одобренија за градење, а се предвидени во планот.
Македонија
Фирма во Македонија рекламирала чаеви користејќи лажно имиња на тројца лекари

Скопското Обвинителство до надлежниот суд поднесе предлог за издавање казнен налог против едно физичко лице и фирма, кои се обвинети за злоупотреба на лични податоци, односно рекламирале чаеви притоа лажно користејќи имиња на лекари.
Обвинетиот 34-годишник, како одговорно лице во фирмата, во периодот од ноември 2022 до април 2023 година, спротивно на условите утврдени во член 10 и член 96 од Законот за заштита на личните податоци, без согласност на тројцата оштетени лекари, ги користел нивните лични податоци – фотографија, име и презиме за онлајн-продажба на два производа, објави Обвинителството.
Личните податоци на секој од оштетените лекари биле злоупотребени како тие со својот професионален авторитет да ги рекламираат и препорачуваат чаевите „паразол“ (Parazol) и „хипертеа“ (Hypertea), кои на територијата на државава ги увезувало и дистрибуирало обвинетото правно лице.
„Лажните интервјуа и објавите преземани и споделувани на повеќе веб-страници и социјални мрежи, со здравствени тврдења и лажни медицински препораки за овие производи што оштетените никогаш не ги дале, обвинетиот ги искористил за незаконита обработка на личните податоци и директен маркетинг“, наведоа од Обвинителството.
Надлежниот јавен обвинител му предложи на судот да ги огласи за виновни и одговорното лице да го казни со единствена парична казна од 70 дневни глоби со висина на дневната глоба од 30 евра во денарска противвредност, а правното лице да го казни со единствена казна од 300.000 денари. Во согласност со предлогот на Обвинителството, обвинетите по пресудата ќе треба да ги надоместат трошоците на постапката, а секој од оштетените лекари ќе има можност во граѓанска постапка да си го оствари своето имотно-правно побарување за нанесената штета со злоупотребата на личните податоци.