Македонија
На 12 и на 14 август ќе биде полагањето на двата екстерни испита од државната матура

Двата екстерни испита во августовската испитна сесија од државната матура, за матурантите кои во јуни не ги положиле или не во целост, ќе се полагаат на 12 и на 14 август.
Во вторник (12 август) ќе биде тестирањето по мајчин јазик (македонски, албански, турски, српски) и литература, а два дена подоцна (14 август) е полагањето на изборниот екстерен испит (математика, англиски јазик, француски јазик, германски јазик, руски јазик, италијански јазик, филозофија, естетика).
Според податоците на Државниот испитен центар (ДИЦ), за двата испитни дена вкупно се пријавени 1118 ученици. Од нив, 352 ќе полагаат македонски јазик, 225 – албански јазик, девет – турски јазик. Англиски ќе полагаат 779, еден ученик ќе полага француски јазик, двајца – германски јазик, 27 – математика и еден матурант е пријавен да го полага испитот по естетика.
Според видот на образование, од гиманзиско ќе полагаат 265 ученици, средно стручно – 835 и 18 од средно уметничко образование. Испитите во августовскиот рок кандидатите ќе ги полагаат во простории на факултетите.
МОН и ДИЦ пред пет дена ги соопштија резултатите од спроведената државна матура во јуни кои се подобри од минатата учебна година. Посечната оценка на успехот од полагањето на двата екстерни испита во јунската сесија е 3.69 и е повисок од минатата година кога средната оценка беше 3.26. Поголем успех е забележан кај мајчините јазици и кај други предмети, а особено по математика за кој средната оценка е 4.14.
Пријавени за полагање во јунскиот рок беа 15.004 ученици. Поради обиди за препишување, употреба на електронски уреди и други неправилности, поништени биле тестовите на 172 ученици.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски: Завршува времето кога источниот сосед и неговиот премиер финансираше македонски политичари, за да овие му даваат подароци во форма на национални отстапки врз грбот на македонскиот народ

Христијан Мицкоски, претседателот на ВМРО-ДПМНЕ, се обрати на денешниот народен митинг во Радовиш, во рамки на изборната кампања за локалните избори 2025 година, со слоган ,,Вистинскиот избор! Твојот човек! Твоето место! За твојата иднина! Мицкоски зборуваше на темата за состојбата со правосудниот систем во земјата. Според него, правосудството е слуга на политичките елити од минатата власт и истите остануваат неказнети, затоа што нивната заштита не е правдата, туку, како што вели тој, неправедниот систем, корупцијата, непотизмот, и врските кои тие ги направија во судството и обвинителството. Од друга страна, нервозата на оние кои се нафатиле да бидат слуги, според Мицкоски, не е затоа што јавноста им бара резултати, туку поради тоа што сега ќе мораат да дадат извештај за тоа како работеле и зошто немаат резултати.
„Објаснувањето за 2% доверба ќе го видите токму во потеклото на овие судии кои се или од СДСМ или од ДУИ. Но, иако се нервозни, иако на секое мое кажување на вистината за судството тие реагираат и паничат како да е загрозена нивната независност, треба да знаат и тие и нивните газди политичари дека доаѓа денот кога мора да се понесе одговорност “, рече Мицкоски.
Мицкоски додаде дека нервозата е исто така присутна кај лидерот на опозициската СДСМ, Венко Филипче.
„И затоа е нервозата е сè поприсутна кај претседателот на СДСМ, и затоа се тие негови нервозни реакции пред камерите и на митинзите, затоа што знаат дека ќе се соочат со одговорност и дека тоа нема врска со тоа кој на чија опција припаѓа, туку единствено има врска со криминалот кој што го правеа 7 години додека здружно беа влада со ДУИ “, кажа Мицкоски и додаде:
„И затоа се спремни на трикови, подземни игри и нечесни коалиции. Знаат, подготвени се да се сојузат и со црниот ѓавол само за да си ги спасат кариерите. И донекаде можам да ја сфатам играта на претседателот на СДСМ, која не е негова, туку со сите сили се труди да игра за да го спаси неговиот ментор, неговиот гуру“.
Мицкоски истакна дека истиот тој Филипче, се обидува да го брани неодбранливото.
„И можам да кажам, човекот навистина вложува многу енергија, се труди од петни жили, го брани неодбранливото, но треба да биде свесен дека секоја негова игра е прозирна и се гледа од месечината, каде јасно се гледа дека ова не е трка и борба за победа на СДСМ, туку трка и борба да си ја спасат сопствената кожа. Зошто? Ако беше поинаку, кога ќе ги видевте осојузени на едно место, на купче Венко, Димче, Али и Стевчо. Ете така, овие неславни ликови народот ќе ги порази исто така на купче на 19 октомври“, истакна Мицкоски.
Мицкоски на крај додаде дека времето кога бугарски премиер финансираше македонски политичари, а тие му испорачуваа компромиси на грбот на народот за национални прашања заврши.
„Завршува нивното време. Завршува времето кога источниот наш сосед и неговиот премиер финансираше македонски политичари, за да овие му даваат подароци во форма на национални отстапки врз грбот на македонскиот народ, а завршува времето на предавства, почнува времето на достоинствена политика, на факти, аргументи, исправен ‘рбет и резултати. Само така Македонија и сите заедно ќе победиме “, вели Мицкоски.
Македонија
Почивалец: Нов модерен плоштад и ослободување од надоместок за уредување на градежно земјиште за младите брачни парови до 30 години

Љупчо Почивалец кандидат за градоначалник за општина Радовиш од редовите на ВМРО- ДПМНЕ, на денешниот митинг одржан во рамките на изборната кампања за локалните избори 2025 година, под слоганот „Вистинскиот избор! Твојот човек! Твоето место! За твојата иднина!“, се обрати кон присутните и истакна дека во програмата има реални и изводливи проекти кои ќе го подобрат животот на граѓаните во Радовиш.
Почивалец претстави дел од проектите во програмата за овие избори.
„Уредување на речното корито и изградба на улици со целосна комунална инфраструктура од последниот мост до новиот парк „Воденица“. Нов модерен плоштад како централно место за културни и социјални активности – со поставување на урбана опрема, осветлување и простор за настани. Парк за рекреација и одмор на жителите, со пешачки патеки, детски игралишта и спортски реквизити кој ќе биде зелена оаза за здрав и активен живот. Уредување на Урбан блок 15 со нова улична мрежа, канализација и водовод. Булеварско уредување на улица „Македонија“, влезот на градот, со кружен тек за поголема безбедност и уреден изглед достоен за Радовиш. Уредување на јавните површини во сите населени места, за достоинствен изглед и функционални простори за граѓаните“ реч Почивалец.
Понатаму, Почивалец посочи и проекти кои се насочени кон младите во општина Радовиш.
„Драги мои, денес со особена гордост сакам да ви најавам и еден проект насочен кон младите, со кој ќе овозможиме намалување, а во одредени случаи и целосно ослободување од надоместокот за уредување на градежно земјиште за младите брачни парови до 30 години. Со оваа мерка ќе им ја олесниме патеката до сопствен дом и ќе им обезбедиме сигурна иднина – токму тука, во нашиот Радовиш.“ кажа Почивалец.
Почивалец на крај од своето обраќање ги повика граѓаните на општина Радовиш на 19 октомври да го заокружат број 9 за подобра иднина.
„Јас верувам во заедништво и сплотеност. Верувам дека кога работиме заедно, можеме да постигнеме големи работи. Мојот тим од советници е составен од професионалци од различни области, луѓе кои се докажале во своите професии и кои и порано и сега го вложуваат своето знаење и енергија за доброто на сите нас. И затоа на 19-ти октомври, сите заедно да излеземе и да гласаме за иднината! Заокружете го бројот 9! Гласајте за тимот кој работи и обезбедува реални решенија. Број 9! За професионална, одговорна и транспарентна локална власт. За континуитет и квалитет, за сплотеност и заедништво! За развој, на сите нивоа! Гласајте за чесност, за одговорност, за работни места и за просперитет“ заклучи Почивалец.
Македонија
Филипче: Се бориме за 500 евра минимална плата и достоинство за секој работник

Претседателот на СДСМ, Венко Филипче, денеска беше во посета на Пехчево од каде порача дека борбата на овие избори не е само локална, ниту само политичка, туку е економска и борба за достоинство.
„Се бориме за 500 евра минимална плата на работниците. За правото на човекот да живее чесно од сопствената плата да може да оди во маркет, да ги обезбеди децата, да го обезбеди семејството. Се бориме за правда, за достоинство и за надеж“, рече Филипче.
Тој, исто така, оттаму испрати порака дека „Пехчево е уште еден град од многуте каде нема инвестиции, нема горди граѓани“. Пред граѓаните на Пехчево, Филипче зборуваше за „лажното лице на власта и нивната двојна страна како власт и опозиција“.
„Го слушам премиерот Мицкоски оди по митинзи и зборува како да сме лани, како да е се уште во опозиција. Не обвинуваа лани за криминални тендери за перење пари, за несоодветни теми кога пред неколку недели неговата влада, неговите луѓе потпишуваат договори со истите тие фирми за коишто не обвинуваа. Се што сега очекував е пратеникот Бране Петрушевски од ВМРО-ДПМНЕ да излезе на прес-конференција во Белата палата и да го нарече неговиот премиер криминалец. Ете тоа е нивното лицемерие“, рече Филипче и додаде дека „ароганцијата на ВМРО-ДПМНЕ мора да запре, затоа што нема светла иднина со лаги“.