Македонија
Невозможна мисија: никој не крева за закажувања термини за лични документи; МВР: Нема застој

Низа критики на адреса на Министерството за внатрешни работи се упатени изминативе денови. Граѓаните се жалат дека системот преку кој се закажува термини за издавање лични документи не работи. Тие посочуваат дека линиите фунцкионираат, но од другата страна оператор не одговара на повиците. Некои од нив ѕвонеле и цел ден, но залудно. За системот е задолжена фирма, која ги закажува термините, а потоа ги предава на МВР. Проблем досега не е пријавен.
Писателката Ксенија Николова преку социјалните мрежи упати и критика. Таа го сподели своето искуство.
„Системот не само што не функционира туку е неверојатно погрешно направен, небаре сами побарале да им направат систем кој намерно е создаден за да не им заврши работа на граѓаните. Прво, не можеш да избереш пакет на документи одеднаш, на пример, не можам да изберам дека сакам промена на сите три документи, што е секако моментната потреба на секој од нас. Мораш за секој документ посебно да закажуваш. Второ, треба да погодуваш кој термин е слободен зашто системот не ти покажува слободни термини во наредниот период, туку, едноставно, како игра на среќа избираш датуми за после да ти излезе едно прозорче дека нема слободни термини во тој ден, во тој час. Па пак одново и така во круг. Трето, кога, конечно, ќе помислиш дека решението е да избереш термин во ноември, тогаш ти излегува прозорец дека можеш да закажеш термин само во наредните 60 работни дена“, реагира таа.
Николова апелира до службите на МВР да се јавуваат на повиците на граѓаните.
Редакцијата на „Макфакс“ исто така безуспешно се обиде да закаже термин. Со часови ниту еден оператор на телефонскиот број за закажување не се јави.
Министерството за внатрешни работи извести дека не постои застој во нормалното функционирање – ниту на економскиот оператор, кој за сметка на МВР го сервисира повикувачкиот центар, односно неговите 12 повикувачки линии, а ниту во организациските единици при Одделот за граѓански работи, кои на дневна основа примаат повеќе стотици апликации од граѓани за разните видови лични документи.
„Факт е дека во овој летен период се зголемува обемот на барања за вадење лични документи. На состојбата дополнително влијае и назначениот рок за замена на старите лични документи, кои го содржат името Република Македонија, со нови со името на државата Република Северна Македонија, рок што истекува во февруари (12.2.2024) до кога во согласност со законските прописи мора да се променат личните документи (пасоши, лични карти, возачки дозволи), без оглед на роковите на нивната важност“, велат од МВР за „Макфакс“.
„Секој граѓанин може да закаже термин телефонски или електронски, а МВР максимално искористувајќи ги сите капацитети, работејќи и за викенди и за празници, ги презема сите мерки за граѓаните навремено да ги добијат своите документи“, додаваат од Министерството за внатрешни работи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Апасиев го откажа учеството на лидерската средба: Треба да биде ден на жалост, а не лидерска за датум за избори

Утре треба да биде ден на жалост заради двојното убиство, а не на лидерска за датум за избори, вели претседателот на Левица, Димитар Апасиев.
Тој го откажа своето учество на планираната средба.
„Апелирам до премиерот истата (средбата) да се помести за посоодветен тајминг, после расчистувањето – преку парламентарна надзорна расправа – на сите неразјаснети прашања поврзани со пропустите на МВР и ОЈО изминативе денови (за време на самитот на ОБСЕ)“, напиша Апасиев на социјалните мрежи.
Македонија
Taткото на Вања во полициска станица, досега не е побаран притвор

Таткото на 14-годишната, Вања Ѓорчевска, по која се трагаше цела недела, а чиешто тело беше најдено денеска, се’ уште е во полициска станица во рамки на истрагата, информираат од Обвинителството.
Од ОЈО велат дека досега не е побаран притвор за него.
Претходно Обвинителството и МВР објавија дека девојчето било убиено неполни три часа по исчезнувањето во понеделникот, а осомничени се пет лица, од кои за три се бара притвор, едно е во странство и уште едно во станица. Тие се осомничени и за убиство на 74-годишен велешанец, Панче Жежовски, по кој се трагаше од 24 ноември, а чиешто тело било пронајдено во Велес, додека неговиот опожарен автомобил беше најден пред неколку дена во Скопско.
Мотив за убиствата, според Обвинителството е користољубие, а неофицијалните информации сугерираат дека тоа подразбира изнуда на пари, и во двата случаи. Деталите ќе бидат образложени утре, на прес конференција.
Македонија
Во „Песталоци“ ќе биде отворена книга на жалост, психолози ќе комуницираат со соучениците на Вања

Утре од 9 часот, на службениот влез на училиштето Јохан Хајнрих – Песталоци ќе биде отворена книга на жалост.
Општина Центар ги повика блиските и сите граѓани кои сакаат да оддадат почит да дојдат да се потпишат.
Во моментот, менаџментот на училиштето во соработка со повеќе психолози се подготвува за утрешниот ден со цел обезбедување поддршка за учениците и комуникација со нив на начин со кој сите полесно ќе го пребродат овој трагичен настан.
Градоначалникот Герасимовски и сите вработени во Општина Центар изразуваат најдлабоко сочувство до семејството и блиските на Вања.
„Извршителите на овој грозоморен чин мора да одговараат во најкус рок, ги повикуваме институциите да го расветлат целосно случајот. Апелираме и до граѓаните да останат обединетив во овие тешки моменти и да не подгреваат шпекулации. Нека и е светол патот на Вања, ваква трагедија никогаш повеќе да не се повтори“, објави општина Центар.