Во текот на изминатото деноноќие за 392 лица биле издадени решенија за изолација, а 150 лица потпишале изјави за самоизолација, информираат од МВР.

Од страна на полициски службеници извршени се контроли кај лица во изолација и самоизолација и не се евидентирани прекршувања на мерките.

Во однос на мерката за носење заштитна маска, регистрирани се 475 прекршоци.

Јавното претпријатие „Паркинзи на општина Центар“ (ПОЦ) ја пушта во употреба новата верзија на мобилната апликација со која сите услуги на претпријатието стануваат достапни и на мобилните телефони.

Од денес, со првото преземање на апликацијата сите корисници ќе добијат два часа бесплатен паркинг, додека жителите на општина Центар ќе добијат 30 часа бесплатен паркинг во гостинскиот пакет на М-картата.

Од ПОЦ објаснуваат дека новата верзија на апликацијата нуди безбедна активна геолокација за прецизна одредба на паркинг-зоната, електронско плаќање паркинг, склучување и продолжување договор за резиденти и нерезиденти и електронско плаќање за истите, најавување на гостински регистрации преку М-картата, пријавување на оштетена урбана опрема на територија на општина Центар со прикачување  фотографија, електронско плаќање на дневна паркинг-карта (ДПК), месечен билет и други типови на билет и други поволности.

Веќе од денес, преку апликацијата, жителите на општина Центар ќе можат да ги пријавуваат комуналните проблеми на територија на општината.

„Секој жител кој ќе забележи оштетена урбана опрема, како прегорена светилка, оштетена клупа, дупка на некоја од сервисните улици или некој сличен комунален проблем, ќе може да ни испрати фотографија која претходно ќе биде геолоцирана и на тој начин ќе добиеме информација за точната локација на проблемот. Фотографијата веднаш ќе биде препратена до вработените на Општина Центар кои ќе алармираат за побрзо решавање на комуналниот проблем“, објасни градоначалникот Саша Богдановиќ.

Основниот кривичен суд Скопје информира дека вработен во судската писарница, а за кого биле објавени информации дека е позитивен на Ковид-19, веднаш бил тестиран за коронавирус и дека резултатот е негативен.

„Посочениот колега веднаш беше упатен на тестирање и по добиените резултати истиот е НЕГАТИВЕН НА ВИРУСОТ, за што до управата на судот е доставен и резултатот од тестирањето.

Како суд апелираме до медиумите и сите останати субјекти кои лиферуваат информации на порталите и социјалните мрежи за судот, да ги проверуваат информациите пред нивно објавување. Судот се залага за транспарентно и отчетно работење и има одлична соработка со поголем дел од медиумите. Но, потребно е да се напомене дека секоја непроверена и неточна информација освен што наштетува на угледот на институцијата може негативно да се одрази и на некои недолжни колеги или граѓани, како во овој случај.

Досега неколку пати ја информиравме јавноста дека како суд строго се придржуваме до препораките за заштита од вирусот. Судниците и судските простории редовно се дезинфицираат, на вработените и странките кои влегуваат во судот им се мери температурата со бесконтактни уреди, секој е должен да носи заштитна маска и ракавици, се одржува растојание на присутните во судниците, канцелариите и писарниците, а сите вработени кои се хронично болни, самохрани родители или чуваат дете помало од 10 години се ослободени од работа.

До овој момент ниту еден вработен не пријавил дека имал контакт со заболен и дека му е дадена препорака за самоизолација, а доколку некој пријави дека е позитивен на вирусот, судот ќе ги преземе сите мерки согласно напатствијата на здравствените власти“, се наведува во соопштението од судот.