Вицепремиерката и министерка за одбрана, Радмила Шекеринска, и министерот за здравство, Венко Филипче, денеска ја посетија Општата болница во Кичево, како и болницата која е во изградба на 100 метри од Општата болница.

„Во овој момент сме пред оваа зграда, која 30 години стои како карабина, две години интензивно работевме на расчистување на проектната документација и други проблеми што ги затекнавме и конечно со одлука на Владата се официјализираше решението да продолжи со градба втората фаза, со што Кичево ќе добие модерна болница, каква што граѓаните и пациентите од овој цел регион навистина заслужуваат. Градбата на втората фаза би требало да трае  околу две години, што значи дека за две години сè ќе биде завршено и соодветно опремено за   Кичево навистина да добие здравствена услуга, здравствена заштита каква што треба“, посочи министерот.

Филипче истакна дека во старата болница, која сè уште функционира, е донесена медицинска опрема којашто значајно го зголемила квалитетот на здравствената услуга за граѓаните.

Тој потенцираше дека огромен број луѓе се примени во болницата во Кичево во изминатите две и пол години, преку 40, од кои шест се доктори и над 20 медицински сестри.

„Во овој момент во Кичево нема невработен доктор на медицина, што мислам дека е одличен резултат на оваа политика на инвестиција во млади лекари и медицински сестри, со цел да не заминуваат од земјава, туку иднината да ја бараат тука. Имајќи ги  предвид и другите мерки кои како министерство ги имплементиравме во изминатите повеќе од две години, тоа е платениот стаж во период од шест месеци за младите лекари, во рамки на здравствените домови. Сметам дека тоа е политика што дава резултат. Нема јавна здравствена установа што не го зголеми капацитетот за најмалку 15 проценти, што значи дека се вработени огромен број лекари и медицински сестри“, истакна министерот.

Исто така, во однос на справувањето со вирусот Ковид-19, министерот Филипче информираше дека во болницата во Кичево има одлична организација, има посебен дел за тријажа и мини амбуланта, а дел од кадарот сè уште е во системот за ротација, за помош на колегите во Инфективната клиника во Скопје и во ГОБ „8 Септември“.

Владо Мисајловски, потпретседател на ВМРО-ДПМНЕ и носител на изборната единица 2, денеска го посети Бутел и манастирот Св. Никола од каде што ги повика граѓаните да ги посетуваат убавините на Македонија, а исто така ги повика граѓаните на 15 јули да излезат и гласаат за број 14 и обновата на Македонија со што и се обврза на повеќе средства од буџетот за културата и културните наследства на Македонија.

„Имам можност повторно да бидам тука, во Бутел, да разговарам со многу пријатели, со познаници, да го прошириме гласот за обнова на Македонија. Денеска сум исто така на убаво место, позади мене можете да го видите манастирот Св. Никола, место  што  секој  треба да го посети, место за кое  Министерството за култура, се разбира и државата треба да одвојат повеќе средства. Вакви убавини има не само во Бутел туку и насекаде во Македонија. Затоа е потребно да стигне обновата во Македонија, за да има обнова во културата, да има обнова во уметноста, а јас честопати велам да има и обнова на семејните вредности, на традицијата, на она исконското.  Да не заборавиме од каде сме и каде припаѓаме и да не ги заборавиме овие прекрасни убавини што се не само позади мене туку и насекаде во Македонија“, нагласи Мисајловски.

Тој додаде дека во ек на пандемија, кога граѓаните не можат да излезат надвор од границите на Македонија, добро е да ги посетат убавите места низ Македонија и да ги зачуваат традицијата и културата.

„Во ова време на пандемија, кога народот, за жал, е оставен во границите на Македонија добро е да си ги посетиме овие убави места  во Македонија, а во изборна единица два има многу такви прекрасни места. Затоа ги повикувам граѓаните да ја сакаат Македонија, да ги сакаат овие прекрасни места бидејќи набрзо ќе има многу проекти не само за Бутел, за Ѓорче Петров, не само за Куманово, не само за Чаир туку насекаде низ изборната единица 2 и низ Македонија“, истакна Мисајловски.

Носителот на листа за пратеници од Македонски концепт за ИЕ1 заедно со кандидатите за пратеници за ИЕ2, како дел од теренските активности – средби со граѓани денеска ги посетија пазарот во Бутел, Бит-пазар и Старата скопска чаршија.

„Не е проблемот само во Владата, туку во целиот политички систем кој си игра со животот на граѓаните веќе 30 години. Луѓето веруваа дека со заминувањето на ВМРО-ДПМНЕ од власт, СДСМ ќе донесе промени. Напротив, ништо не се промени. Но овој пат Македонски концепт нуди избор. Јас сум уверен дека на 15 јули граѓаните ќе го направат вистинскиот избор и наместо да останат дома или да поништуваат гласачки ливчиња, одлучно ќе заокружат 10-ка. Затоа што глас за 10-ка значи глас за промена, глас за гаранција дека оваа власт ќе ја казниме, а нема да дозволиме ниту обнова на бандитизмот од минатото”, изјави Петар Богојески, лидер на Македонски концепт и носител на листа за пратеници за ИЕ1.

Граѓаните на Македонија, додаде тој, заслужуваат држава во која може да живеат достоинствено.

„Ова е последна шанса да ја вратиме државата во рацете на граѓаните. 10-ка за победа на граѓаните врз политичарите“, рече Богојески.