Министерството за образование и наука информира дека се објавени конкурсите за доделување ученички и студентски стипендии за учебната, односно студиската 2021 – 2022 година. Во секој од конкурсите се наведени условите, критериумите, потребните документи и роковите за аплицирање, со цел остварување на правото на користење на соодветната стипендија.

МОН и Владата оваа година одлучија значително да ја променат политиката на стипендирање ученици и студенти, со цел да им се излезе во пресрет на што повеќе млади, но и да добијат зголемени месечни износи, со кои навистина ќе ја почувствуваат поддршката што државата им ја обезбедува во текот на образовниот процес.

Па, така, за повеќето од категориите ученички стипендии што се доделуваа и досега, месечните износи се зголемени за 60-ина проценти, а воедно воведени се и нови категории, од кои позначајни се оние за ученици што ќе се запишат во дуални паралелки, во дефицитарни струки или, пак, во тригодишно средно стручно образование. Исто така, зголемени се и месечните износи на поголем дел од студентските стипендии, некои од нив и за повеќе од 80 %.

Од оваа година постапката за аплицирање за стипендија е дигитализирана преку порталот http://e-uslugi.mon.gov.mk, со што значително се поедноставува начинот на остварување на правото. Учениците и студентите што немаат можност да аплицираат електронски пополнуваат хартиена пријава (евидентен лист) и ја доставуваат потребната документација според соодветниот конкурс во Министерството за образование и наука.

МОН обезбедува поддршка при аплицирањето за секој заинтересиран кандидат, кој ги исполнува условите за одредена категорија стипендии преку Секторот за ученички и студентски стандард, потенцираат од Министерството.