Македонија
ОМО „Илинден“ – ПИРИН: За 10 дена, Бугарија успеа да деградира 4 народи, 3 земји и милиони граѓани од Македонија, Србија и од Грција

ОМО „Илинден“ – Пирин во објава на социјалните мрежи сподели неколку вести за, како што велат, добрососедската земја Бугарија и како таа гради добрососедски односи со Балканските држави.
„Уште нетргнати се заканија дека ќе палат знамиња на Албанија и Македонија. При пристигнувањето беше предизвикан инцидент со локалното албанско население во Скопје, при што беше прободен еден бугарски граѓанин, за потоа инцидентите да ги префрлат на стадион во судир со македонската полиција, која уапси 19 бугарски навивачи. За извиците од трибините како им посакуваат смрт на Албанците, дека Македонија е бугарска земја и слична реторика, да не ни споменуваме“, пишува ОМО „Илинден“ – ПИРИН.
Како шти објавија на социјалните мрежи, на 2 август, „во присуство на највисокото претставништво на државата, јавно на ТВ, повторно и по 150-ина години, со тешка дискриминаторна реторика, јавно искажани територијални претензии и нималку добрососедски став го обележаа Илинден како празник на бугарското востание, па и манипулирајќи го името со нивната измислица за некакво си илинденско-преображенско востание и претставувајќи го како востание на Бугарите“.
„Нивната политика на дискриминација ја свртеа кон Србија, на која исто така ѝ го дискриминираат српското малцинство во Бугарија и го декларираат како непостојно. На тоа веднаш добија одговор од Ивица Дачиќ дека и бугарското малцинство, кое изнесува само 0,29 % во Србија, нема да биде признаено“, се вели во објавата на ОМО „Илинден“ – ПИРИН.
„Генерации растени со лаги и фабрикувана историја многу лесно се манипулираат. Па, така, пред неколку дена во градот Кавала, 35-годишен Бугарин го отстранил грчкото знаме од јарбол и поставил бугарско извикувајќи: ‘Тоа е Бугарија!’ Полицијата соопштила дека сторителот ѝ е познат и од претходни прекршоци и тој бил однесен на распит во Драма“, се додава во објавата.
Од ОМО „Илинден“ – ПИРИН заклучуваат дека за 10 дена Бугарија успеала да деградира и дискриминира 4 народи, 3 земји и милиони граѓани од Македонија, Србија и од Грција.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Општина Центар го објави повикот за субвенции за велосипеди и тротинети

Општина Центар информира дека во тек е јавниот повик за доделување субвенции за велоспеди, е-велосипеди, е-тротинети, како и за дополнителна опрема. На повикот можат да се пријават сите граѓани кои имаат живеалиште во Центар, а проектот се одвива по принципот „прв дојден, прв услужен“.
Градоначалникот Горан Герасимовски ги повикува сите центарци да аплицираат и да поддржат одржлив транспорт.
„Пред две години, нашата општина беше прогласена за највело општина во Скопје која се залага за алтернативен транспорт, намалувајќи го сообраќајниот метеж. Преку овие субвенции ќе ги поттикнеме центарци на здрав начин на живот, на поздрава средина за сите нас. Граѓаните можат да добијат субвенција од 30% од цената на превозното средство, но најмногу до 3.000 денари, како и субвенција за дополнителна опрема (детски седишта и кациги) до 1.000 денари. Повикот ќе се реализира сѐ до исцрпување на финансиските средства, а правото на субвенција е еднократно“, вели Герасимовски.
Жителите на Центар треба да поднесат барање со потребна документација: копија од лична карта, копија од трансакциска сметка и фискална сметка во оригинал и истата да ја достават во архивата на Општина Центар, барака бр.6, од 09.00 до 15.00 часот.
За повеќе информации, граѓаните можат да се обратат на телефонските броеви 02/3203-600 и 02/3203-693 или да ја посетат веб-страницата centar.gov.mk: https://www.centar.gov.mk/?p=24738.
Македонија
Судот го одобри обвинението за возачот што ја прегази Фросина

Судот го одобри обвинението за возачот Васил Јованов, која ја прегази Фросина Кулакова на пешачки премин на булеварот Партизански одреди.
„Ја информираме јавноста дека Советот за оценка на обвинителниот акт го одобри обвинението на Основното јавно обвинителство со КО бр. 271/25 од 27.3.2025 година против осомничениот В. Ј. за кривичното дело тешки дела против безбедноста на луѓето и имотот во сообраќајот од чл. 300 ст. 2 в.в. со чл. 297 ст. 1 од КЗ, поврзан со сообраќајната нестеќа од јануари 2025 година на булеварот Партизански одреди во Скопје, во која животот го загуби 22-годишната Ф. К.“, соопшти Кривичниот суд.
Од таму додаваат дека со одобрениот обвинителен акт формиран е кривичен предмет, кој ќе биде ќе биде распределен на понатамошно судење во согласност со АКМИС-системот, а кога ќе биде насрочен термин за главна расправа, странките и јавноста ќе бидат дополнително известени.
Македонија
(Видео) Јанчев: Кадровата политика на оваа влада го доуништува здравството

Пратеникот од Левица, Сашко Јанчев во Собранието за време на седницата за пратенички прашања, упатувајќи прашања до министерот за здравство, реагираше на кадровските злоупотреби, мобинг и недоследности во здравствените установи.
„Нема подобра политика од кадрова политика. Државните институции не се зградите фасадите и ентериерот, туку луѓето, кадарот кој работи во нив. И ако има добар кадар, ќе има и функционални институции“, рече Јанчев.
Тој алармираше за постапките на Бурим Идризи, раководител на сектор во Институтот за трансфузиона медицина, кој според кажаното, изготвувал фалични анекси на договори за вработување со кои неовластено го менувал датумот на засновање на работниот однос. На вработени со повеќедецениски стаж им вметнувал одредба дека засновале работен однос лани, во 2024 или 2023 година. Раководителот таквите анекси им ги давал на вработените и непотпишувањето на истите го третирал како отказ, односно прекин на работниот однос.
„Овој лош кадар, Бурим Идризи, не само што е награден, туку е пренаграден – тој е одговорен на четири одделенија, правно-административно техничко одделение, општи работи, ИТ системи, е во комисија за „Мој термин“ и други комисии. Значи, тој зема поголема плата од што земаат специјалистите“, истакна Јанчев.
Посочи дека и директорот на Институтот за трансфузиона медицина, Елези, непотпишувањето на наштиманите анекси го третирал како раскинување на договорот за вработување и на огласна табла им се заканувал со такви известувања. Јанчев истакна дека директорот Амир Елези не ги исполнува законските услови да раководи со ваква установа, односно да биде директор. Истото поради фактот што Законот предвидува дека директорот мора да биде специјалист по трансфузиологија и да има работно искуство најмалку две години од областа на трансфузиологијата, додека пак актуелниот директор специјализирал рентген и го нема потребното искуство.
Беше изнесен и случај на искусна медицинска сестра со 38 години стаж во болницата во Неготино, која наместо да се награди за нејзината посветеност, била преместена на работно место со помала плата. На нејзиното место е поставена вработена со само неколкумесечен курс.
„Тоа е таа владина кадрова политика. Кога 38 години стаж и работно искуство е помалку од неколкумесечен курс и неискуство. Таа е таа владина кадрова политика која ја уништува Македонија“, потенцира Јанчев.