Македонија
(Видео) Ќе има жешка есен, со протести на здравството и полицијата, најавија независните синдикати на Здравство и на Геријатрија
На состанокот се реши дека има голем број аномалии во колективниот договор со здравствените работници, со здравствениот административен персонал, со техничкиот персонал. Потребно е тие аномалии да се решат постепено, рече Боби Бојчевски од Независниот синдикат на здравството по средбата со министерот за информатичко општество и администрација.
Ние сме усогласени за понатамошните постапки што ни ги нагласија во МИОА, каде да се движиме и како да го решиме овој проблем, рече тој.
„Здравствените работници се донесени до маргините. Нето-плата на еден вработен возач во Итната медицинска помош е од 22.500 до 23.400 денари. Како може тој вработен да го преживее денот, да го преживее месецот. Ние како независен синдикат ќе се бориме за оваа категорија луѓе. Да се решат аномалиите од првата до четвртата работна група според работните односи. Првата група има поголема плата од четвртата група“, изјави Боби Бојчевски од Независниот синдикат на здравството.
Тој повика сите институции да се позанимаваат со здравството и со здравствените работници.
„Подобро е да го гаснеме оганот додека жари, а не кога ќе се направи пожар. Здравствените работници не може да ги преживеат денот и месецот“, додаде тој.
Бојчевски најави протест во септември ако не се решат проблемите.
„Ако не се решат овие работи, во септември ќе има протест и ќе бараме 30 отсто покачување на платата на овие работници. Во септември ќе има масовни протести поддржани од сите синдикати и од сите здравствени работници, од хигиеничар до доктор“, изјави Бојчевски.
Тој рече дека со зголемување на минималната плата здравствената администрација и техничкиот персонал со ова немаат никакво покачување на платата.
Бојчевски вели дека само на тие што примале под минималната плата им се зголемиле примањата.
„На оваа средба успеавме да разграничиме некои работи. Негувателите и болничарите се водат како помошен технички персонал, а треба да се водат како здравствени работници. Ако се водат како здравствени работници, нема да бидат во категоријата минималец“, изјави Лазо Костовски од Независниот синдикат на Геријатрија.
Негувателите и болничарите досега беа понижени и маргинализирани. Останува на работодавците дали ова од денешната средба ќе го прифатат или да продолжат како досега, да не ги признаваат како здравствени работници, додаде тој.
За септември, Костовски најави жешка есен со масовни протести доколку не се решат проблемите. Тој додаде дека и полицијата не е задоволна со платите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Топло со умерена облачност, температурата до 25 степени
Времето денеска ќе биде сончево и топло со мала до умерена локална облачност. На североистокот ќе има услови за појава на краткотраен дожд.
Ќе дува слаб до умерен, а долж Повардарието краткотрајно засилен ветер од југоисточен правец. Минималната температура ќе биде во интервал од 6 до 12, а максималната ќе достигне од 20 до 25 степен.
Во Скопје сончево и топло со мала до умерена облачност. Ќе дува слаб до умерен ветер од југоисточен правец. Минималната температура ќе се спушти до 11, а максималната ќе достигне до 23 степени.
Ќе настапи преодно стабилизирање на времето со позначителен пораст на дневната температура. Од сабота кон крајот на денот повторно се очекува нестабилно време со локален пороен дожд и грмежи, локално во форма на невреме. Повремена претежно попладневна нестабилност со пороен дожд и грмежи, со променлив интензитет, ќе има се до средината на следната недела.
Скопје
108 санкционирани возачи во Скопје
Секторот за внатрешни работи Скопје во текот на вчерашниот ден продолжи со контролите во областа на сообраќајот.
„На територија на град Скопје изречени се вкупно 108 мерки, меѓу кои девет мерки за возење без возачка дозвола, четири санкции за минување на затворен сигнал – црвено светло, седум мерки за користење на мобилен телефон при возење, осум санкции за некористење на сигурносен појас…“, извести МВР.
Од таму додаваат дека сообраќајните контроли продолжуваат и во наредните денови.
Македонија
Нема подолги задржувања за влез и излез од државата
Сообраќајот на државните патишта се одвива непречено, по наместа влажни коловози, извести АМСМ.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.