Во рамките на дводневната посета на Париз вицепремиерот Никола Димитров оствари средба и со Каролин Вино, заменик на генералниот секетар за европски прашања при Владата на Франција, на којашто се разговараше за добрите француски практики и нивната примена при зајакнувањето на административните капацитети на Секретаријатот за европски прашања, како главен двигател на интеграциите во Северна Македонија.

„Француското искуство во координацијата на европските прашања може да помогне за зајакнување на нашите капацитети. Со помош на француските пријатели и со силна посветеност на процесот, СЕП треба да стане ефикасна и почитувана администрација во полза на македонските граѓани“, рече Димитров.

Ова е прва посета на Париз по формирањето на новата Влада и се реализираше во исклучително важен момент за Северна Македонија, во пресрет на дефинирањето на Преговарачката рамка којашто треба да ги инкорпорира елементите што произлегуваат од новата Методологија за пристапни преговори, иницирана токму од Франција.

За време на работната посета на Француската Република, Димитров имаше средби со државниот секретар за европски прашања во Министерството за Европа и надворешни работи, Клеман Бон; претседателот на Комисијата за европски прашања во Сенатот на Франција, Жан-Франсуа Рапен; Изабел Думон, дипломатски советник за Континентална Европа и Турција во кабинетот на претседателот Макрон, Каролин Вино, заменик на генералниот секетар за европски прашања при Владата на Франција и со Лилиана Танги, пратеничка во Националното собрание.

Во фокусот на разговорите беше француската поддршка во оваа клучна фаза од нашите евроинтеграции – одржувањето на првата Меѓувладина конференција со ЕУ до крајот на годинава; динамиката на усвојувањето на Преговарачката рамка, а се разговараше и за напредокот на Северна Македонија нотиран во Извештајот на Европската комисија, како и за клучните приоритети од ЕУ агендата на коишто Владата ќе биде фокусирана во следниот период.

ВМРО-ДПМНЕ повика утре на протести поради загадениот воздух. Протестите ќе се одржат во Скопје, Битола, Струмица, Тетово и Куманово.

Протестот во Скопје ќе почне во 19 часот пред Владата.

„Владата на СДСМ продолжува со својата неодговорна политика во однос со најгорливото прашање – загадениот воздух. Загадениот воздух и во ек на пандемија убива, а власта вели дека тоа е само магла. Поради неспособноста на владата предводена од Заев животот на граѓаните е изложени на опасност“, порача опозицијата.

ВМРО-ДПМНЕ апелира поради високата загаденост на воздухот, паралелно со пандемијата на Ковид-19, бремените жени и хронично болните да се ослободат од работа, и во приватен и во државен сектор.

„Наместо политиканство од страна на оваа неспособна Влада, потребни се одлуки“, велат од ВМРО-ДПМНЕ.

Полицијата информира дека се поднесени кривични пријави против две лица од Охрид и Тетово кои не биле затекнати дома, иако имале решенија за задолжителна самоизолација.

Станува збор за С.А.(57) од Охрид и А.Б.(34) од Тетово.

При контрола од полициски службеници тие не биле затекнати во домот, со што постапиле спротивно на решението за задолжителна самоизолација.

Тетовецот не го подигнал своето решение и одбил да соработува со Центарот за јавно здравје, велат од полицијата.