Македонија
Османи: По успехот на Преспа, сите очекуваме напредок и во дијалогот Приштина – Белград

Заменик-претседателот на Владата задолжен за европски прашања, Бујар Османи, денеска престојува во работна посета на Република Косово во рамките на која се сретна со косовскиот премиер, Енвер Хоџај.
Двајцата ја потенцираа заложбата на двете земји за европската перспектива на регионот, за што од интерес на двете земји е меѓусебно да се поддржат во процесот на интеграција во ЕУ.
„Денешнава посета на Приштина доаѓа во многу значаен момент, откако го имплементиравме преспанскиот договор во Македонија, а деновиве, можеби уште денеска, очекуваме процедурата да заврши и во Парламентот на Република Грција“ – истакна Османи, посочувајќи дека овој договор, покрај фактот што претставува главна пресвртница за евро-атланските интеграции на Македонија, преставува и промотор на европските вредности во целиот регион, пример за тоа како преку дијалогот, компромисот и позитивниот пристап можат да се затвораат отворените прашања меѓу соседите на Балканот. „Конечната имплементација на договорот од Преспа очекувам да има позитивно влијание и врз дијалогот меѓу Приштина и Белград, како веројатно најважно и во моментов најголемо отворено политичко прашање во регионот, од чија разрешница интерес ќе има целиот регион” – истакна Османи
За време на средбата беа отворени и прашањата за билатералната соработка меѓу Македонија и Косово, особено за најавуваната заедничка владина седница, за која соговорниците заеднички изразија надеж дека ќе се одржи наскоро, односно веднаш по завршувањето на претседателските избори во Македонија, а вицепремиерот Османи накусо го информираше својот соговорник и за стартот на проектот за изградба на автопатот Скопје – Блаце, со што, заедно со автопатот на косовска страна, патот меѓу Скопје и Приштина од сегашните безмалку два часа ќе се скрати на 45 минути.
Во рамки на еднодневната работна посета на Косово вицепремиерот Османи оствари средби и со министерката за европски интеграции, Дурата Хоџа, како и со шефицата на канцеларијата на Европската Унија на Косово и специјална претставничка на ЕУ на Косово, Наталија Апостолова, во рамките на кои беа отворени темите за текот на имплементацијата на проектите за прекугранична соработка, како и за европските перспективи на двете земји, но и на целиот Западен Балкан.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Петровска во посета на најстариот приватен воен колеџ во САД, Универзитетот „Норвич“

Министерката за одбрана Славјанка Петровска и делегацијата при престојот во сојузната држава Вермонт, го посетија и Универзитетот „Норвич“, кој е и најстариот приватен воен колеџ во Соединетите Американски Држави.
При посетата на „Норвич“, министерката Петровска се сретна со претседателот на Универзитетот, генерал мајор Марк Анарумо, со кого разговараше за можностите за продолжување на успешната соработка помеѓу Воената академија „Генерал Михаило Апостолски“ и овој Универзитет.
Петровска и Анарумо изразија интерес за продолжување на воспоставената пракса на размена на питомци, за што во иднина треба да се потпише и нов Технички договор помеѓу двете високообразовни институции.
Во периодот од 2015 до 2020 година, 10 питомци од академијата минаа по еден семестар во рамките на Универзитетот Норвич, додека питомци од овој Универзитет беа дел од Летниот кампус организиран од Воената академија на „Криволак“.
Македонија
Прашањата од матурата по англиски јазик се појавија на група на „Вибер“, од ДИЦ велат дека тестот не е пробиен, туку споделен

Матуранти, во група на апликацијата „Вибер“ си ги разменувале одговорите на матурскиот тест по англиски јазик.
По информациите во јавноста, со коментар се огласи Државниот испитен центар.
Од тука велат дека тестовите не биле пробиени, туку прашањата биле споделени откога испитот започнал.
„Тестот не е пробиен, туку споделен“, велат од испитниот центар образложувајќи дека тестирањето почнало во 10 часот, а потоа во рамките на Вибер групите од страна на членовите биле објавувани прашањата кога почнала реализацијата на испитот.
Најавуваат дека ќе постапат согласно законските надлежности со сите матуранти што ги нарушиле правилата.
Денеска се полага вториот екстерен испит, а според податоците на Државниот испитен центар, како и во минатите години најмногу пријавени (13 922) има за испитот по Англиски јазик.
Македонија
Каевски: Што поскоро уставните измени влезат во Собранието тоа подобро

Воспоставениот дијалог со опозицијата е во исклучително важен момент за европската иднина на земјата, истакна на прес-конференција, пратеник и портпарол на СДСМ, Дарко Каевски.
Тој рече дека чекорот што го направил Христијан Мицкоски со прифаќањето на уставите измени е за поздравување.
Сето ова, вели Каевски, создаде добра основа за продолжување на дијалогот со ДПМНЕ но и со сите релевантни политички партии застапени во македонското Собрание.
„Сега може да разговараме како заеднички да ги изведеме уставните измени, неопходни за продолжување на европскиот пат. СДСМ ќе биде проактивна во овој процес. Токму затоа на синоќешната седница на Централниот одбор донесевме одлука за формирање на работна група. Овој тим ќе го продолжи дијалогот со ДПМНЕ и останатите политички партии за носење на уставните измени и продолжување на евроинтегративниот процес. Што поскоро уставните измени влезат во Собранието тоа подобро“, рече Каевски.
Портпаролот на СДСМ додаде дека сега е моментот сите заедно да дадеме придонес, да ја донесеме важната одлука, и да ја обезбедиме на европската иднина на државата.