Граничниот премин Богородица од вечерва по 20 часот е повторно отворен за сообраќај, откако попладнево на сила беше одлуката за затворање поради тоа што во шумата во негова близина избувна пожар.

Пожарот што избувна во граничниот појас е локализиран и ставен под контрола од пожарникарите од Гевгелија и вработени во ЈП „Комуналец“, кои со помош од воени хеликоптери успеаја да ги скротат пламените јазици и да ги спасат од поголема опасност објектите на потегот кон граничниот премин, меѓу кои и бензински пумпи и казина.

Поради активноста на пожарникарите, беше исклучена електричната енергија во објектот на граничниот премин и тој беше привремено затворен за сообраќај заради безбедност на патниците и за да се овозможи простор за пожарникарите да дејствуваат.

Сеизмолошката опсерваторија при Природно-математичкиот факултет, попладнево, во 17 часот и 10 минути, регистрирала земјотрес со епицентар 120 километри југоисточно од Скопје, во струмичкото епицентралното подрачје.

Земјотресот бил со локална Рихтерова магнитуда 2,6, а бил почувствуван од населението на Струмица, Валандово и околината со интензитет од три степени според Европската макросеизмичка скала, се наведува во соопштението.

Активностите за одбележување на 20-годишнината од Охридскиот  договор продолжија денеска со организирана трибина од страна на Институтот за духовно и културно наследство на Албанците на тема „Скопје и новите албански адреси, рефлекција на Охридскиот договор“.

На трибина на која учествуваше и првиот вицепремиер, Артан Груби, главна тема беше именувањето на скопските улици со имиња на истакнати личности и важни настани од албанската национална историја.

Имено, околу 150 имиња на албански дејци се поставени како имиња на улици, плоштади и булевари во Скопје, а Груби во неговиот говор истакна дека тоа е големо достигнување како резултат на имплементацијата на Охридскиот договор.

„Патот на еднаквоста бара секојдневен третман и ангажман од секој од нас, во секоја институција каде што сме присутни, од претседателот, претседателот на Собранието, претседателот на Владата, Советникот на Град Скопје, директорот во институција, вклучително и административниот службеник ја има најголемата можна човечка одговорност за да ја гарантира еднаквоста и за да ја одржи таа еднаквост до денот на неговото пензионирање“, изјави вицепремиерот.

Груби ги извести присутните и за текот на преземените активности од страна на Владата за одбележувањето на 20-годишнината на Охридскиот договор, а се осврна и на неговото подлабоко значење.

„20 години не се далеку. Застанете само, направете ја разликата како сме биле пред 20 години и како сме денес. Во Влада зборуваме на албански, во Собрание зборуваме албански, влезете на веб-страницата на претседателот, сè е и на албански јазик. Дури и вчера на одбележувањето на Илинден ечеше албанска музика и албанско оро среде Крушево и немаше никакво двоумење од ниеден учесник околу достоинствената презентација и на албанската култура. Нема институција во ова земја која не зборува и албански. Нема ништо невозможно кое ние не можеме да го реализираме и ова е благодарение на сите оние кои ја имаа храброста од логорите до Собранието да ја променат политичката, правната реалност на оваа држава правејќи го Албанецот државнотворец и придонесувач во нашето општество“, кажа првиот вицепремиер и министер за политички систем и односи меѓу заедниците.