Во текот на денешната работна посета на општина Кавадарци, премиерот Христијан Мицкоски одговарајќи на новинарските прашања се осврна на зголемувањето на пензиите во наредниот период.

„Ќе има повторно линеарно зголемување на пензиите за пензионерите во април, за мартовската пензија. Продолжуваме со таа политика. Последните статистички параметри кои што ги издаде Државниот завод за статистика за нивото на сиромаштија и „џини-коефициентот“, само дополнително ја оправдуваат политиката на Владата за линеарното зголемување на пензиите, најпрвин за 2.500 денари кои се случија во ноември за октомвриската пензија во 2024 година, па дополнителните 2.500 денари во април за мартовската пензија, оние 1.000 денари дополнително линеарно зголемување во ноември за октомвриската пензија 2025. Така ќе биде и сега во април за мартовската пензија во 2026“, кажа Мицкоски.

Тој посочи дека со ова се сака да се намали стапката на сиромаштија кај оваа група граѓани, а со тоа да се намали и „џини-коефициентот“ кој подразбира нееднаквост во распределбата на доходите кај различни групи на граѓани.

„Во таа насока добро се движиме, што се однесува до „џини-коефициентот“ сме најдобри во регионот и сме над европскиот просек, а борбата против сиромаштијата е една од главните цели на оваа Влада и ќе се движиме и понатака во таа насока“, додаде Мицкоски.

На Клиниката за гинекологија и акушерство првото новороденче во 2026 година е девојче, а во Специјалната болница за гинекологија и акушерство „Мајка Тереза“ – Чаир, првите новороденчиња во 2026 година се близначиња – девојчиња.

По тој повод, министерот за здравство Азир Алиу денес ја реализираше традиционалната новогодишна посета во двете установи, придружуван од Фатмир Лимани – министер за социјална политика, демографија и млади, Орце Ѓорѓиевски – градоначалник на Град Скопје, Јовица Андоновски – заменик министер за здравство и Рози Мицкоска – сопруга на претседателот на Владата. Во посетата на Специјалната болница „Мајка Тереза“ – Чаир, присуствуваше и градоначалникот на општина Чаир, Изет Меџити.

Министерот упати честитки до семејствата, посакувајќи им добро здравје, среќа и безгрижно детство на новороденчињата, а воедно им изрази благодарност и признание на здравствените работници за нивната посветеност, професионалност и грижа што ја пружаат секојдневно.

„Раѓањето на првото бебе во новата година е симбол на нов почеток, надеж и живот. Нашата обврска е да обезбедиме здравствен систем во кој секоја мајка и секое дете ќе добијат сигурна, квалитетна и достоинствена здравствена грижа“, истакна министерот Алиу.

Посетите се реализираа во духот на празнична атмосфера, со порака за континуирана грижа за мајките и новороденчињата и понатамошно унапредување на условите во јавното здравство.

Новогодишната ноќ низ целата држава поминала мирно, а за стабилна безбедносна состојба на терен имало засилено полициско присуство, информираше денеска министерот за внатрешни работи Панче Тошковски.

„На подрачјето на СВР Скопје за жал регистриран е еден посериозен настан, убиство во кој животот го загуби турски државјанин. Седум лица се повредени од употреба на пиротехнички средства а едно лице се самоповредило со ловна пушка во Битола“.

Тошковски информираше и за повредено двегодишно дете кое според последните информации во јавноста, се здобило со повреди од огнено оружје во главата.

Еден од оние посериозни настани кои и мене лично ме вознемирија, рече Тошковски, е настанот кој се случил во вечерните часови, при што тешко телесно било повредено дете од две години.

„Согласно информациите кои ги имам детето е во животна загрижувачка состојба. Станува збор за метален фрагмент кој со сигурност во овој момент не можеме детално да го специфицираме. Има повеќе теориии за тоа како е повредено детето. Штом точно ги утврдивме причините за настанување на оваа тешка телесна повреда, јавноста ќе биде информирана“, кажа Тошковски.

Инаку лекарите како тежок случај го посочија случајот со двегодишното дете.

Како што беше објавено во јавноста детето без познати лични податоци било примено на интензивна нега со прострелна повреда на главата од огнено оружје. Детето, според надлежните, е во животна опасност и нема официјални информации за околностите под кои се случил инцидентот, како што кажа и Тошковски.

Тој потврди дека случајот е под истрага.

Според Тошковски, вчера биле регистрирани и 23 сообраќајни незгоди од кои две биле со тешки телесни повреди а приведени биле 49 лица по разни основи.