Македонија
Претставници на Јавното обвинителство и на ДКСК на работна средба за следењето на изборниот процес

Со цел ефикасна координација меѓу двете институции при следење на претстојниот изборен процес, претседателот на Комисијата за следење евентуални нерегуларности и кривични дела поврзани со изборите, јавниот обвинител Џељаљ Бајрами и претставници на Јавното обвинителство на Република Северна Македонија вчера одржаа прв работен состанок со претставниците на Државната комисија за спречување на корупцијата (ДКСК) предводени од претседателката на Комисијата, Татјана Димитровска.
Како што соопшти Обвинителството, на средбата се дискутирало за подготовките на Јавното обвинителство и на ДКСК, во согласност со надлежностите на секоја од двете институции, за ефикасно постапување со цел гаранција на мирен и фер изборен процес, како и санкционирање на сите оние што евентуално би се обиделе да го нарушат.
Јавниот обвинител Бајрами ги појасни составот и начинот на функционирање на Комисијата формирана во Јавното обвинителство, динамиката на постапување по предметите поврзани со изборни нерегуларности и начинот на следење на предметите оформени по пристигнати известувања на посебната електронска адреса за пријавување: [email protected]
Претседателката на ДКСК, Димитровска, ги презентира почнатите активности на антикорупциската комисија во предизборниот период и воспоставената база на податоци за службени возила што ги користат институциите како прва активност за следење на нивното користење во предизборието.
Јавното обвинителство и Државната комисија за спречување на корупцијата ќе одржуваат директна комуникација и непосредно ќе се координираат при постапувањето по сите пријави и претставки што се однесуваат на евентуални изборни нерегулaрности, се додава во соопштението на Обвинителството.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мисајловски на состанокот на контакт групата за Украина, за првпат реализирана под водство на Обединетото Кралство

Министерот за одбрана Владо Мисајловски денеска во Брисел во рамки на предвидените состаноци на министри за одбрана на Северноатлантскиот совет на НАТО, учествуваше на состанокот на Контакт групата за Украина, кој за првпат се реализира под водство на Обединетото Кралство.
На состанокот предводен од секретарот за одбрана на Обединетото Кралство, Џон Хили, на кој учествуваа министри и високи претставници на 50-тина земји, генералниот секретар на НАТО Марк Руте како и високиот претставник за надворешна и безбедносна политика на ЕУ, Каја Калас, фокус беше поддршката на Украина.
Од започнувањето на агресијата врз Украина, македонската Влада досега има донесено 15 (петнаесет) одлуки за хуманитарна и воено-техничка помош и поддршка на Украина и украинскиот народ како земја која ја брани својата независност и територијален суверенитет и во континуитет се залага за почитување на меѓународното право и правен поредок.
Престојот во Брисел продолжува и утре со состанокот на Северноатлантскиот совет на НАТО на ниво министри за одбрана и состанокот на Советот НАТО- Украина.
Македонија
Врнежи од снег кај Маврово, Плетвар, Попова Шапка и Крушево, засега не преставуваат пречка за одвивање на сообраќајот

Врнежи од снег со слаб интензитет се бележат во Маврово и на планинските превои Буково, Ѓавато и Плетвар, додека врнежи со среден интензитет се бележат на Попова Шапка и во Крушево, но во моментов не преставуваат пречка за одвивање на сообраќајот.
Интензитетот на сообраќај на патните правци надвор од градските средини е умерен. На граничните премини од македонска страна нема подолги задржувања за влез и излез од државата.
Сообраќајот на државните патишта се одвива во зимски услови, по наместа влажни коловози, соопштија од АМСМ.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Инцидент во Шутка: Градоначалникот Курто Дудуш навредувал скопски инспектор

Вчера околу 10.30 часот З.Г., инспектор во град Скопје, пријавил во СВР Скопје дека на ул.2бб во близина на дива депонија, при вршење на службени дејствија за вршење на надзор и подигање на мостри, дошле две лица и еден од нив (К.Д. -градоначалник на Шуто Оризари) почнал да ги навредува него и неговите колеги и да им се заканува и го попречувал земањето на мостри.
Се работи на расчистување на случајот.