Или ќе го вратиме кредибилитетот на ЕУ на Балканот, или ќе го изгубиме. И мислам дека ние навистина се потпираме на занаетот и мудроста на нашите словенечки пријатели да успеат да го постигнат тоа, а не да го изгубиме, изјави вицепремиерот, Никола Димитров, пред неформалниот состанок на министрите за европски прашања (ГАК) што се одржува во Брдо, Словенија.

„Имајќи ја предвид нашата географија, ние сме опкружени со земји членки, треба да го направиме ова заедно со ЕУ, затоа многу се радувам на дискусијата. Секако, веројатно ќе го покренеме прашањето на пристапување и проширување. Го споменав зборот криза, тоа потекнува од етимологијата на одлучувачка точка. Мислам дека под словенечкото претседателство во следните недели и месеци ја достигнуваме оваа одлучувачка точка. Или ќе го вратиме кредибилитетот на ЕУ на Балканот, или ќе го изгубиме. И мислам дека ние навистина се потпираме на занаетот и мудроста на нашите словенечки пријатели да успеат да го постигнат тоа, а не да го изгубиме“, рече Димитров.

Кривичниот суд ги ослободи од обвинение поранешниот директор на УБК, Сашо Мијалков, и шестемина припадници на поранешната полициска единица „Алфа“ поради немање јасни докази дека го сториле кривичното дело за кое беа обвинети во случајот „Тортура“, односно за апсењето на Љубе Бошкоски.

Случајот во врска со приведувањето на лидерот на Обединети за Македонија беше отворен од поранешното СЈО.

Обвинетите се гонеа за делото мачење и друго сурово, нечовечко или понижувачко постапување и казнување за време на апсењето на Бошкоски на 6 јуни 2011 година.

Судењето беше за апсењето за случајот „Кампања“, во кое Бошкоски беше осуден на пет години затвор за незаконско финансирање на изборната кампања.

Со проекцијата на филмот „Пинокио“ во Градскиот парк на „Школка“ ќе почнат низата настани со кои роденденски ќе се одбележат 95 години од основањето на Зоолошката градина Скопје.

Во текот на наредните месеци планирани се едукативни и забавни настани во Градината, а киното на отворено ќе се одржи в недела со почеток во 20.30 ч.

„Проекцијата на филмот е замислена како пикник, па секој треба да си понесе ќебенце. Ние ќе обезбедиме вода, сокови и кроасани за посетителите. Филмот ‘Пинокио’, кој беше номиниран во две категории за ‘Оскар’, е од жанрот фамилијарен/фантазија, а влезот за сите посетители ќе биде бесплатен. Се гледаме на ‘Школка’“, порачуваат од скопската Зоолошка градина.