Петте хеликоптери, два македонски и три српски, кои беа пратени да го гаснат пожарот во Пехчево, се враќаат назад.

Ова на социјалните мрежи го објави директорот на ЦУК, Стојанче Ангелов, кој образложи дека ваквата одлука била донесена поради високите температури, поради кои, како што нагласи, се загрозува животот на екипажот.

Безбедноста на посадата на воздухопловите како и безбедноста на луѓето на земја на прво место!

— Stojanche Angelov (@StojanceAngelov) August 4, 2021

„Поради исклучително високите температури на воздухот, веднаш по пристигнувањето на 5-те хеликоптери на местото на големиот шумски пожар, командантот на ескадрилата донел одлука за нивно повлекување поради ризично зголемување на работната температура“, објави Ангелов.

Тој додаде дека хеликоптерите повторно ќе се упатат кон Пехчево по намалување на температурата на воздухот за неколку степени.

„Безбедноста на посадата на воздухопловите како и безбедноста на луѓето на земја на прво место!“, напиша директорот на ЦУК.

Владата на седница одлучи да ги награди сите пожарникари вклучени во гаснењето на пожарот кој го зафати Кочани и околината.

„Наградата од 10.000 денари е во знак на благодарност за демонстрираната храброст, професионалност и пожртвуваност во мисијата да се спасат животи и да се зачуваат природните ресурси на татковината. Нивната пожртвуваност и mпрофесионалност нема да останат заборавени“, порача на социјалните мрежи вицепремиерот, Љупчо Николовски.

Попладнево од страна на полициски службеници од полициското одделение Галате уапсен е 32-годишен албански државјанин со иницијали Л.А, кој илегално престојувал во државата, поради сомнение дека подметнал пожар над гостиварско Пожаране.

Како што информираат од МВР, тој ќе биде задржан за понатамошна постапка.

Едно лице е осомничено и за пожарот во Старо Нагоричане и полициските службеници веќе постапуваат во координација со јавен обвинител.

МВР работи и на расчистување на случај во кој се осомничени две лица, за предизвикување пожар од поголеми размери пред село Блаце кон Катланово. Од полицијата велат дека благодарение на брзата интервенција, обидот бил осуетен, а со тоа е спречено распламтување на пожарот.

МВР апелира строго да се почитува забраната за движење во шумските предели, граѓаните максимално да се воздржат од палење огнови, отпадоци, меѓи и стрништа на нивите, да не фрлаат неизгаснати догорчиња и да не оставаат стаклени шишиња или други предмети, кои подолго време изложени на сонце, можат да предизвикаат пожар.

Предизвикувањето на пожар намерно или од невнимание претставува кривично дело за кое е предвидена и затворска казна до 8 години, зависно од видот на пожарот и другите околности и последици, потсетуваат од ресорното министерство.