Состојбата во град Скопје е алармантна. Градските улици се гушат во смет, градскиот превоз не функционира, а градот е оставен без основните услуги што ги заслужуваат граѓаните. Градот реално се наоѓа во криза и побарав од советничката група на СДСМ да иницира итна седница на Советот на Град Скопје, најави претседателот на СДСМ, д-р Венко Филипче.

-Ги повикувам сите советници, без разлика на партиската припадност, да застанат зад ова барање и да се одржи оваа седница во најкус рок. На седницата ќе предложиме конкретни мерки кои верувам дека заеднички ќе ги поддржат сите советници и конечно да им се излезе во пресрет на граѓаните. Потребно е обединување заради интересите на скопјани, вели Филипче.

Доколку и овој обид за заедничка акција биде опструиран, ќе го преиспитаме нашето учество во Советот, бидејќи нема да бидеме параван за лошите политики што го уништуваат нашиот град, предупредува Филипче.

-Искрено се надевам дека ќе наидеме на разбирање кај останатите партии и советници. Скопје не заслужува ваква негрижа и хаос. Со оваа иницијатива, СДСМ јасно покажува дека стои на страната на граѓаните, кои секојдневно се соочуваат со последиците од неработењето на градската администрација, наведува претседателот на СДСМ, Венко Филипче.

Првиот потпретседател на Владата и министер за животна средина и просторно планирање г. Изет Меџити денеска потпиша договор за грант од 3 милиони евра со директорот на Канцеларијата на ЕБОР во Скопје, Матео Коланџели,наменети за процесот на собирање отпад во земјата.

Меџити рече дека со овој грант се очекува да се олесни процесот на собирање отпад и да придонесе за развој кон следната фаза, односно рециклирање на отпадот.

„Потпишувањето на Договорот значи помош за институционална поддршка и корпоративно управување, за забрзување и олеснување на процесот на собирање отпад во државата и преминување во следната фаза на рециклирање и решавање на овој долгогодишен проблем на нашите граѓани во државата“, рече Меџити.

Директорот на ЕБОР, Матео Коланџели, истакна дека животната средина во Западен Балкан е главниот фокус на Европската банка за обнова и развој, нагласувајќи дека ова е прва инвестиција од ваков вид.

”Ова е прва инвестиција од ваков вид, каде 45 општини од различни региони во државата се опфатени со поддршка во управувањето со цврстиот отпад, а директно ќе имаат бенефит повеќе од еден милион луѓе. Навистина сме горди на она што го правиме заедно со нашите партнери и фокусирани сме на ефикасна и брза реализација на оваа инвестиција“, рече Коланџели. Тој додаде дека фокусот на ЕБОР е животната средина во Западен Балкан, вклучително и во нашата земја, така што во иднина ќе се работи многу со оваа тема, за зајакнување на капацитетите на Северна Македонија во рамките на стратегијата што се подготвува за следните 5 години.

Амбасадорката на Швајцарија во земјава, Вероник Улман, истакна дека со овој грант граѓаните директно ќе можат да ги видат придобивките, нагласувајќи дека чекорите што ќе бидат преземени ќе бидат целосно безбедни и во согласност со прописите и законодавството на Европската Унијата.

„Швајцарија навистина придонесува за развојот на животната средина, ќе бидат опфатени региони, каде граѓаните ќе можат да ги видат придобивките и дека навистина правиме нешто за тоа. Кога патувам низ вашата прекрасна земја, луѓето многу често велат дека треба да направиме нешто за ова, и сега е време. Затоа Швајцарија одлучи да помогне и да придонесе за развојот на животната средина во овие региони, рече Улман.

Делегација од Алијансата за Албанците, предводена од претседателот Арбен Таравари, кој истовремено ја извршува функцијата министер за здравство, и заменик-премиерот Арбен Фетаи, кој е и секретар за меѓународни односи во АА, оствари посета на Албанија.

За време на посетата, делегацијата имаше средба со претседателот на Република Албанија, Бајрам Бегај.

„Денес, заедно со заменик-премиерот Арбен Фетаи и делегација од АА, имав задоволство да се сретнам со претседателот на Република Албанија, Н.Е. Бајрам Бегај, во братска и соработлива атмосфера.

Му честитавме на претседателот за отворањето на преговорите на Албанија за членство во ЕУ и ја изразивме нашата желба нашите патишта што побрзо да се обединат во овој витален процес за нашите земји и народи.“

Исто така, беше соопштено дека за време на средбата се дискутирало за важноста на зајакнувањето на билатералната и регионалната соработка, особено во областите од заеднички интерес.

„Во фокусот беше инфраструктурата и што поскорешното завршување на Коридорот VIII, како значаен чекор кон заедничката безбедност, одржливиот развој и европската интеграција.“