Македонија
Со Маричиќ од бифтеците до 80 пратеници: амбасадори го честат – тој штеди, селективна е правдата, има два начини за уставни промени

Вицепремиерот Бојан Маричиќ во интервју за „Макфакс“ првпат во детали елаборира за фамозните бифтеци, кој ги јадел, но и за трошењата на државната каса во ресторани. Открива дека, наместо да чести од државна сметка, по објавите од „А1он“, сега евроамбасадори го честат.
Зборуваше и за уставните измени. Тој откри два начина преку кои ќе се стигне до мнозинство од 80 пратеници за уставните промени, но и кои пратеници, од кои политички партии, се сигурни дека ќе дадат глас за Бугарите да бидат во Уставот. Одговараше дали ќе има купување пратеници или уценување со судски случаи.
Маричиќ коментира и за судството. Призна дека има селективна правда. Покажа со прст кон Обвинителството кога во прашање е случајот на Сашо Мијалков, чиј имот обвинителката Лиле Стефанова тврдеше дека вреди 30 милиони евра за сега податоците да покажат дека вредноста му е 15 милиони евра. Ја коментира и судијката што постапуваше по предметот за 27 април, Добрила Кацарска, и посочи: „Треба да се учи од неа“.
Маричиќ одговори и дали би сакал да му судат или обвинат снаи, синови и ќерки на обвинители и политичари, кои сега влегуваат во правосудниот систем со положен завршен испит во Академијата за судии и јавни обвинители. Признава дека не се гордее со правосудниот систем.
Во интервјуто за „Макфакс“, Маричиќ кажа и што му се допаѓа кај Никола Груевски, но и што не му се допаѓа кај Зоран Заев и Димитар Ковачевски. Посочи политичари од ВМРО-ДПМНЕ, кои јавно ги пофали. Во интервјуто Маричиќ го нападна бугарскиот европратеник Џамбаски кого го спореди со Апасиев. Кажа и дека Пендиков треба да сноси одговорност за искажаните навреди и лаги кон Македонија и Македонците.
Гледајте го целото интервју на Маричиќ за „Макфакс“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Родителите на децата загинати во пожарот во Кочани: Живееме за да одиме на гробишта, да си помуабетиме со нашите деца

Обвинители, дали нашиот молк, тишината и тагата по нашите деца, кои се убиени, ви даде право да ослободите лица кои беа во притвор, а се соучесници во убиството на нашите деца, прашаа родителите на настраданите во пожарот во дискотеката „Пулс“ пред почетокот на денешниот трет протестен марш „Задоцнета реакција“ што се одржа во Кочани.
Точно во 12 часот и 5 минути учесниците на маршот тргнаа од Паркот на Револуцијата кон Трговскиот центар и кон општинската зграда, а оттаму кон полициската станица, Судот и Обвинителството во Кочани.
Нѐ прашува ли некој нас како ги минуваме деновите, какво е чувството да знаеш дека детето никогаш повеќе нема да се врати дома, да ги видиш неговите убави очи, неговата убава насмевка, да го слушнеш како се смее, да дочекаш уште еден Велигден со него. Живееме за да одиме на гробишта, да си помуабетиме со нашите деца, да им раскажеме колку тие недостигаат дома, вели Јулија Златкова, чиј син настрада во пожарот.
Вели дека протестите ќе продолжат се додека не биде задоволена правдата.
– Ќе продолжиме да излегуваме и да ги потсетуваме челниците на оваа скапана држава дека сме тука и до наш последен здив ќе ја бараме правдата за сите починати и повредените на 16. март, бидејќи ги закопавме нашите деца поради нечии грешки, поради тоа што некој бил корумпиран, поради тоа што ја злоупотребил својата функција за пари, за корист за личен бенефит. Нашите деца ги нема, но правдата мора да излезе на виделина, рече Златкова.
Пред општинската зграда родителите порачаа дека будно ќе ја следат работата на надлежните инспекциски служби, а в.д. градоначалникот Венко Крстевски им даде целосна поддршка истакнувајќи дека нема да бидат осамени во барањето правда, затоа што, како што рече, сите заеднички треба да го променат системот што е нефункционален.
На собирот пред Полициската станица семејствата на настраданите прашаа зошто полициските службеници кои последни беа вклучени во истрагата на Обвинителството се пуштени дома.
Тагата и револтот, родителите на загинатите во трагичниот пожар ги искажаа и пред Судот и Обвинителството, секој одделно споменувајќи го името на своето дете и плановите што ги имале за во иднина.
Протестниот марш заврши во Паркот на револуцијата, а присутните најавија дека ќе се одржува секоја сабота сѐ додека не ја добијат бараната правда за своите најблиски.
Македонија
МВР и СВР Охрид ги преземаат сите потребни предуслови за сите туристи во претстојната сезона да уживаат во својот одмор

Министерот за внатрешни работи Панче Тошковски денеска беше во работна посета на СВР Охрид и Полициската станица за граничен премин „Св. Апостол Павле“ на која се наоѓа Аеродромот во Охрид.
Како што информираат од МВР, Тошковски од посетата констатирал дека има зголемување на патниците на овој граничен премин, како и на сите гранични премини во рамки на Регионалниот центар – Запад.
За разлика од лани, има за околу 20 проценти зголемен број на патници на граничниот премин на Аеродромот, а за околу 30 проценти на граничниот премин „Блато“ кај Дебар.
Се фокусираме на зголемување на техничките услови и човечките капацитети со кои ќе можеме соодветно да одговориме на овој зголемен број на патници коишто го имаме во овој временски период. Добро е што имаме зголемена размена на туристи и сакаме тој број контактно да расте, што повеќе туристи да ги видат убавините на Охрид и Македонија, потенцирал Тошковски.
Нагласил дека МВР и СВР Охрид ги преземаат сите потребни предуслови за сите туристи во претстојната сезона да бидат безбедни и да уживаат во својот одмор, како во рамки на СВР Охрид, така и на територија на целата држава.
Македонија
Утре и задутре бесплатен паркинг во зоните на „Градски паркинг“

Во текот на Велигденските празници, утре и задутре, на зонските паркиралишта кои се во надлежност на ЈП „Градски паркинг“ нема да се врши наплата за паркирање. Исклучок од ова е зоната А0 на Водно, каде граѓаните ќе мора да платат за паркирање.
Од претпријатието информираат дека во наредните два дена наплата нема да се врши и на јавните паркиралишта: Тутунски комбинат, Зоил и 8 Септември, додека пак редовна наплата ќе има во катните гаражи „Беко“ и „26 Јули“, како и на сите останати јавни паркиракишта – Кочо Рацин, Градска болница, Нова Македонија, АМСМ, Народен фронт, Треска и Клинички центар „Мајка Тереза“.