Македонија
Спасовски и Агелер: Борбата против корупцијата останува наш заеднички приоритет
Министерот за внатрешни работи, Оливер Спасовски, заедно со амбасадорката на Соединетите Американски Држави, Анџела Агелер, оствари работна посета на граничниот премин Богородица, при што се сретнаа со раководството на Регионалниот центар за гранични работи „Југ“ и беа брифирани за постигнатите резултати на овој граничен премин. Спасовски и Агелер во оваа пригода ги посетија и вработените полициски службеници на овој премин донирајќи вредна поддршка од Амбасадата на САД, т.н. боди-камери за потребите на гранична полиција.
„Со донацијата на нови т.н. боди-камери за полициските службеници, наменети за документирање на полициското постапување во остварувањето на работните задачи и обврски, како и на двете специјализирани возила за откривање радиоактивен материјал или радиолошка заштита, едното за Регионалниот центар ‘Југ“, а другото за ‘Север’, дополнително ќе се зголемат квалитетот и ефикасноста на работењето во сите сегменти од полициското дејствување. Морам да кажам дека во досегашното работење употребата на боди-камерите се покажа како исклучителна алатка во борбата против корупцијата.
Само во рамките на оваа област во првите шест месеци годинава откриени се 49 кривични дела и овие кривични дела бележат намалување од 22 % во споредба со истиот период лани“, рече министерот Спасовски. Притоа тој сподели статистички податоци за резултатите на работата на РЦ „Југ“: „Имаме драстично намалување на илегалната миграција во рамките на овие осум месеци годинава во споредба истиот период лани за речиси 80 проценти, евидентирано е зголемување на откривачката функција во делот на шверцување стоки и недозволена трговија приближно 50 проценти, компаративно со истиот период лани, а истовремено граничната полиција продолжува успешно да ја извршува својата контролна улога независно што годинава се бележи рапиден пораст на протокот на патници во споредба со ланската година или со 2021“, информира министерот Спасовски.
Амбасадорката на САД, Агелер, ги изрази гордоста и задоволството од исклучителната соработка меѓу САД и Република Северна Македонија за позитивните и видливи резултати од таа соработка за што упати благодарност до министерот Спасовски. Таа потенцира дека изминативе неколку години, од 2016 година наваму, вложени се речиси 4 милиони долари како поддршка на граничната безбедност, а меѓу нив е и опремата од т.н. боди-камери, кои се алатка во борбата против корупцијата. Притоа амбасадорката Агелер, честитајќи му на министерот Спасовски за одличната работа на македонската полиција, потенцира дека Амбасадата на САД е силен партнер на МВР, а соработката ќе продолжи и во иднина бидејќи таа е критична за просперитетот на земјата.
Денешната работна посета министерот Спасовски и амбасадорката на САД, Агелер, ја искористија и да направат увид во поставено возило со термални камери на Вршник Баре, како и обиколка и презентација на Транзитниот центар „Винојуг“.
Во изјава за медиумите министерот Спасовски потенцира дека со заедничката посета имаат цел да се увиди на терен како дејствува македонската полиција, со поддршката од Амбасадата на САД преку вредна донација во техничка опрема за потребите на граничната полиција, а во насока на зајакнување на заедничката борба против корупцијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
На свечена церемонија, утре Пендаровски ќе и’ ја предаде функцијата на Силјановска-Давкова
Во Кабинетот на претседателот, утре – 12 мај ќе се одржи официјална церемонија на примопредавање на функцијата Претседател со највисоки државни и воени почести.
По свечената церемонија новоизбраната претседателка Гордана Силјановска Давкова и претседателот Стево Пендаровски предвидено е да остварат тет-а-тет средба.
Државната изборна комисија денеска и’ го издаде уверението за избран претседател на Гордана Силјановска-Давкова. ДИК ќе треба да достави извештајот до Собранието за да биде закажана седница за утрешната инаугурација на Силјановска Давкова. Потоа таа пред пратениците ќе треба да даде свечена изјава по која ќе почне нејзиниот мандат.
Мандатот на Пендаровски истекува утре.
Македонија
Aхмети тврди дека со челниците на „Вреди“ во јануари потпишале декларација дека ќе владеат само со партии што поддржуваат уставни измени
ДУИ тврди дека и првите луѓе на коалицијата „Вреди“ (Влен), со кои ВМРО-ДПМНЕ договара коалицирање во новата Влада, се потписници на декларација во која уверуваат дека ќе владеат заедно само со оние политички партии кои се согласуваат да ги поддржат уставните измени.
Лидерот на ДУИ, Али Ахмети на денешниот собир на претставниците и членството на коалицијата рече дека декларацијата била потпишана во јануари годинава.
Во неа, се наведува дека почетокот на преговорите со Европската Унија (ЕУ) носи стратешки и значајни придобивки за нашата земја, а потписниците со обединет глас се придружуваат да одговорат на итната потреба за решавање и стабилност во земјата.
„За овие цели ние како политички партии изјавуваме: ‘Ние, долупотпишаните политички партии, имајќи ја предвид состобата во која се наоѓа државата и должноста што jа имаме кон граѓаните, чувствуваме обврска да изјавиме дека сме целосно решени, сега и во иднина да соработуваме и да владееме заедно само со оние политички партии кои се согласуваат да ги поддржат уставните измени како услов за продолжуванье на процесот на интеграција на земјата во ЕУ. Потписи на партиски претставници (наредени по азбучен ред): Арбен Таравари, Африм Гаши, Али Ахмети, Билал Касами и Изет Меџити“, стои во документот што го прочита Ахмети.
Претпладнево се случи првата рунда на преговори помеѓу ВМРО-ДПМНЕ и Влен, по којашто партиите соопштија дека ги договориле општите начела за идната Влада, која ќе се базира на три постулати: евроинтеграции, забрзан економски развој, борба против криминалот и корупцијата и владеење на правото.
Од тука додадоа дека двете страни ќе формираат работни групи, на кое ниво ќе продолжат разговорите за коалицирање.
Во изборната кампања, ВМРО-ДПМНЕ и „Вреди“ излегоа со различни ставови за уставните измени, но во повеќе наврати беше потенцирано дека разговорите на таа тема ќе бидат ставени на маса по завршувањето на изборите.
Македонија
„Договорени се општите начела за идната Влада“ – заврши средбата на ВМРО-ДПМНЕ со Влен
Денеска беше остварена средба помеѓу ВМРО-ДПМНЕ и ВЛЕН. Од страна на ВМРО-ДПМНЕ беа присутни претседателот Христијан Мицкоски, потпретседателите Александар Николоски, Владо Мисајловски, Тимчо Муцунски и Гордана Кочоска Димитриеска, како и шефот на кабинет на претседателот Владимир Нелоски, од страна не ВЛЕН беа присутни Арбен Таравари, Изет Меџити, Биљал Касами и Африм Гаши.
„Договорени се општите начела на соработка за идната влада, која ќе се базира на три постулати: евроинтеграции, забрзан економски развој, борба против криминалот и корупцијата и владеење на правото“, објави ВМРО-ДПМНЕ по средбата.
Заклучено е дека двете страни ќе формираат работни групи, на кое ниво ќе продолжат разговорите до нивно финализирање.