Страшната трагедија во Кочани, во која загинаа 59 луѓе, повикува на неселективна и темелна истрага за лоцирање на одговорност. За жал, од досегашниот тек на истрагата гледаме дека се води селективно и не се опфатени актуелните функционери и службеници, иако биле на функции на денот кога се случила трагедијата, истакна Богданка Кузеска, портпаролка на СДСМ.

„Како тоа тие што се директно одговорни за безбедноста на самиот настан, во БЈБ и МВР, во ОВР Кочани и Штип како е можни тие да не се опфатени со истрагата?
Законот за јавни собири јасно определува кога и за какви настани полицијата има обврска да постапи и да превенира.
Доколку институциите постапеле согласно своите законски обврски, на терен ќе имало присуство на Противпожарна бригада, Брза помош, адекватен број полициски службеници и сите неопходни безбедносни протоколи за ваков тип јавен собир.
Се поставува прашањето како е можно да не се истражуваат лица кои вечерта биле на одговорни позиции со законска должност да постапат – но не го сториле тоа?
Понатаму, зошто актуелните директори на ДПИ и на УЈП не се опфатени со истрагата“, прашува Кузеска.

Според неа, истражниот процес, кој мора да биде непристрасен и целосен, се претвора во инструмент на политичко калкулирање.

Кузеска оценува дека се заштитуваат позиции, се менуваат стратегии.

„Пред само неколку недели, јавниот обвинител беше под притисок за разрешување и тоа директно од Мицкоски.
Владата започна постапка, се вршеа јавни напади, се создаваше јасен наратив за негова недоверба.
Одеднаш пресврт, станува „потребен“ – постапката е стопирана, Советот за јавни обвинители не заседава, а Мицкоски повикува да му се даде шанса.
Кога обвинителот од неподобен станува подобен, а истрагата ги допира само оние од минатото тогаш е јасно дека неселективна правда не може да се очекува“.

СДСМ, додава таа, нема да молчи.

„Ние нема да го оставиме јавниот интерес во рацете на политичари што правдата ја испорачуваат според нивната политичка потреба.
Повторуваме, секој што има одговорност, мора да одговара. Без оглед на политичка припадност или моментална функција.
Мицкоски треба да знае, граѓаните на улиците се борат токму протви овој систем, против овие влијанија, неодговорност и селективна правда. Ова е сржта на проблемот“, додава Кузеска.

Како што напоменува, семејствата на загинатите не заслужуваат таква истрага. Македонија, нагласува Кузеска, заслужува вистина и целосна одговорност за сите. „Се друго ќе значи доуништување на и така малата доверба на граѓаните во државата“.

Срамна, понижувачка и крајно неодговорна е одлуката на Владата за некакво бедно покачување на минималната плата од само 1.800 денари. Што да прават работниците со 1.800 денари во услови кога истата оваа Влада дозволи екстремно зголемување на цените на храната и на производите, прашува Кристина Костова, потпретседателка на СДСМ.

Владата на ДПМНЕ, вели таа, очигледно нема допир со реалноста и покажува тотална негрижа за најважното, стандардот на граѓаните.

„Како пресметаа дека 1.800 денари им се доволни на работниците?

Граѓаните секојдневно се борат да преживеат, со високи цени, високи сметки, а со мизерни плати.

Растот на трошоците за живот е сериозен притисок врз семејниот буџет и граѓаните едвај врзуваат крја со крај.

Потрошувачката кошница во февруари 2025 достигна 63.773 денари. За над 100 евра е зголемена во споредба со лани.

И со ова бедно зголемување, повторно две минимални плати не се доволни за да се покријат основните месечни трошоци на едно семејство“.

Додека граѓаните бираат дали да купат храна или да платат сметки, според неа, ДПМНЕ во историски најголемиот буџет не предвиде пари за работниците.

Но затоа, како што додава, има пари за папаја, манго, лосос, за приватни авиони и непродуктивни трошења на владата и нејзините функционери.

„За работниците остави трошки и ги остави во сиромаштија. Граѓаните да живеат на воздух а владата на манго и папаја. Срамота.

Дополнително, за прв пат откако е воведена минималната плата, оваа власт ја донесе срамната одлука за нејзина корекција сама без консултација и без да ги слушне барањата на работниците.
Оваа Влада се грижи само за себе и за богатите елити“

Оценува дека неспособноста на Владата за само девет месеци предизвикаа економска катастрофа и сериозно влошување на условите за живот. И сега ги турка работниците кон подлабока сиромаштија.

„Бидејќи власта ги игнорира работниците ние ќе поднесеме закон за зголемување на минималната плата“, дополни Костова.

Дојде време да избираме децата или партиите. Живееме во време кога луѓето повеќе веруваат во партиите отколку во самите себе. Ги бранат како да се нивно семејство, се караат со пријатели за нив, ги оправдуваат нивните грешки како да им должат нешто. Но, дали некогаш сте се запрашале што добивате за таа лојалност?
Политичарите се менуваат, партиите доаѓаат и си одат, но нашите проблеми остануваат исти, пишува во објавата на „Фејсбук“ на групата „Кочани“.

Во напишаното, како што додаваат, патиштата се распаѓаат, болниците се без основни услови, институциите не функционираат, а животот станува сѐ потежок.

„И секогаш слушаме едно исто ‘Кога ќе дојдеме ние, ќе биде подобро’. Но, дали некогаш навистина стана подобро? Проблемите не се нови, но никој не ги решава.
Зошто требаше да се случи трагедија за да се сети целата држава дека Кочани постои? Граѓаните пред само неколку месеци протестираа 19 дена без прекин барајќи конечно решение за депонијата. Им беше ветено дека ќе се донесе одлука да не се носи отпад од други општини. Ветувањето беше дадено, беше изгласано, но што се случи? На празникот Свети Никола, со полициска придружба, отпадот повторно беше фрлен на истата депонија.
Министерот за животна средина не дојде да ги слушне граѓаните. Пратеникот од Кочани ниеднаш не застанаа пред јавноста да бара решение за своите сограѓани. Истото ова се случува и со други проблеми и сѐ додека не дојде некоја трагедија, институциите се глуви.
Додека ние чекаме, тие се грижат само за себе“.

Додаваат дека додека граѓаните чекаат промени, политичарите си ги решаваат личните проблеми.

„Кога треба да се изгласа нов закон за привилегии, нов службен автомобил или покачување на платите, нема поделби, нема кавги. Сите се сложни. Секогаш има пари за нивните потреби, но за основните барања на народот нема буџет.
Во меѓувреме, здравството е пред колапс. Болниците со години не се реновирани, немаат доволно опрема, а условите се катастрофални. Брзата помош функционира со стари и дотраени возила, најчесто добиени преку донации. Противпожарните единици работат со застарени камиони и недоволен број луѓе.
Патиштата во државата стануваат сѐ поопасни, дупките не се крпат, а кога ќе се случи несреќа, виновни се граѓаните, а не институциите кои не ја завршиле својата работа.
Во Кочани, како и во многу други градови, се гради неконтролирано. Секој агол е претворен во градилиште, а никој не знае колку безбедно се градат тие згради. Трговскиот центар во Кочани е блокиран од доградби, а никој не поставува прашање што ако таму се случи несреќа? Кој ќе одговара?“, прашуваат.

Според нив, време е да сфатиме дека партиите не се државата.

„Граѓаните се тие што плаќаат даноци, што ги полнат буџетите, од кои живеат политичарите. Но, додека народот се кара кој политичар е ‘подобар’, сите тие си седат во удобните фотелји и ги уживаат своите привилегии.
Ако сакаме промена, треба да разбереме дека нема наши и „нивни политичари, сите се таму за да работат за нас, а не обратно. Кога последен пат сте виделе функционер да биде сменет затоа што не си ја завршил работата? Кога последен пат некој одговарал затоа што ветил, а не исполнил?
Додека не почнеме да бараме одговорност, додека дозволуваме да нѐ делат на нивни и наши, ништо нема да се смени. Секогаш кога ќе гласаме за лични интереси наместо за општо добро, ќе добиваме ист резултат.
Системот нема да се промени, сами ние сме системот. Ако почитуваме закони, ако не даваме мито, ако не прифаќаме празни ветувања, тогаш нешто ќе се промени. Но, додека веруваме дека некоја партија е поважна од нашите сопствени права, тие ќе продолжат да нѐ користат.
Време е да се запрашаме дали сме подготвени да се промениме самите ние и да почнеме да се почитуваме меѓусебе или ќе бидеме само навивачи на партии што никогаш нема да се грижат за нас?
Никогаш не заборавајте дека нашите деца си заминаа поради партиите. Наместо да ги гушнете и да се борите за нив, вие ги избравте партиите, што упорно ги гласате 33 години. И никогаш не си признавте, заминаа затоа што немавте храброст да им се спротивставите на партиите.
Ова е став на админите на оваа страна“, стои во објавата на социјалните мрежи.