Министерот за здравство, Венко Филипче, не чувствува одговорност за да поднесе оставка која од него ја бара опозициската ВМРО-ДПМНЕ.

Филипче по тој повод рече дека од почетокот на кризата работат професионално.

„Не внесовме политиканство во одлуките“, дециден е министерот.

Тој вели дека голем дел од предлозите на ВМРО-ДПМНЕ немаат медицинска логика, па оттука им порача да ја држат политиката настрана.

„Имаа шанса да помогнат, но за жал одмогнаа и тогаш кога требаше да се потпише заемот. Сега сите 16 ковид центри ни доцнат. Да не се слушеше тогаш таа блокада од тогашната заменичка министерка за финансии, сега сите ковид-центри ќе беа инсталирани во целата држава“, истакна Филипче, одговарајќи на новинарски прашања по посетата на Општата болница во Струмица.

Прширување на болничките капацитети и надополнување на кадарот најави министерот за здравство Венко Филипче, кој денеска ги посети болниците во Штип и Струмица.

Тој рече дека болниците се преполнуваат, па се прават припреми за болницата во Козле и дополнителни капацитети за болицата „8-ми септември“. Во однос на штипската болница, министерот вели дека постои целосна координација и комуникација за префрлање на пациенти во болницата во Кочани. Во Струмица, пак, станало збор за отворање на новото крило на струмичката болница и надополнување на кадарот.

„Разговаравме постепено да се отвори новото крило на струмичката болница, кое е целосно опремено. За неколку дена може да биде ставено во функција. Таму има капацитет од 100 кревети, но кадарот треба да се распредели соодветно, за еден дел од пациените да бидат лекувани таму“, рече министерот.

Тој вели дека доколку произлезе потреба од ангажирање на уште повеќе кадар, ќе се пренаменат и другите болнички капацитети, не само во инфективните туку и во интернистичките одделенија, нешто што почнало да се практикува во болниците во Битола, Прилеп, Охрид каде пациенти се сместуваат на интернистичките одделенија.

Министерот потсети и дека се зголемени термините, но и бројот на тестови за Ковид-19. За време на викендот има дополнителни термини за тестирања,  а вработените работат во три смени.

Министерството за внатрешни работи покрај на територијата на главниот град Скопје, спроведува засилени акциски контроли за санкционирање на непочитувањето на сообраќајните правила и прописи и во другите градови, меѓу кои и Делчево и Берово, соопшти портпаролот на МВР Тони Ангеловски на денешната прес конференција во Делчево.

„Се санкционираат сите сообраќајни прекршоци, а особено оние кои што се најчеста причина за сообраќајни незгоди со тешки последици. До сега за помалку од месец дена откако започнаа засилените сообраќајни контроли изречени се над 14.000 санкции, најчесто за возење со брзина над дозволената,нерегистрирани возила, а се санкционираат и возачите на мотори кои не ги почитуваат правилата“, рече Ангеловски.

Портпаролот на МВР апелираше до граѓаните на Делчево и Берово да ги почитуваат сообраќајните правила и прописи за да се зголеми безбедноста во сообраќајот.

„Само за еден час во денешната акциска контрола во Делчево и Берово се изречени над 60 санкции, пред се за нерегистрирани возила, возење без возачка дозвола и др. “, соопшти Ангеловски, кој потенцира дека акциските контроли продолжуваат и во наредните денови, а целосните податоци од денешната засилена акциска контрола во Делчево и Берово ќе бидат презентирани утре.